საქართველოს ეროვნული გმირის, ზაზა დამენიას გარდაცვალებიდან 14 წელი გავიდა. ზაზას მეუღლე ხათუნა ხუხუნაიშვილი ფეისბუქზე სტატუსს აქვეყნებს, რომელსაც „გურია ნიუსი“ უცვლელად გთავაზობთ.
“ჩვიდმეტი წელი შენგან შორს – საუკუნედ მეჩვენება, რომელშიც მარტო ვარ…
ამბობენ, რომ „დრო მკურნალია, რომელიც დღეების, თვეებისა და წლების გასვლით ყოფას გვიმსუბუქებს..“ მაგრამ სულ უფრო და უფრო მძიმეა უშენობა, მონატრების შეგრძნებაც იზრდება და ყველგან, ყოველთვის თან დაატარებ…
ჩემი ყველაზე დიდი ბედნიერება ხარ და უბედურებაც, ჩემი მაცოცხლებელიც და მკვლელიც, ფრენაც მასწავლე და მიწაზე უმოწყალოდ დანერცხებაც, სიცოცხლე შემაყვარე და შემაძულე კიდეც….
2004-ში წახვედი და მას შემდეგ, ისევ 32 წლის ხარ.. მას შემდეგ სულ შიშით ვცხოვრობ და ველოდები 16 აგვისტოს დადგომისას, მაგრამ ვერაფერს ვცვლი… ისევ წახვალ ცხინვალის რეგიონში, კონფლიქტის ზონაში – ქართული სოფლების დასაცავად და 16 აგვისტოს ისევ ვეღარ დაბრუნდები, რადგან სანგარში ჩავარდნილ ხელყუმბარას გადაეფარები და საკუთარი სიცოცხლის ფასად თანამებრძოლებს დაღუპვისგან იხსნი…
გაუსაძლისმა მონატრებამ ბევრჯერ ამატირა…. ისევ შენთანაა და სულ შენთან დარჩება ჩემი გული… ახლა ვიცი, რას უნდა გავუფრთხილდე ყველაზე მეტად, რა არის ცხოვრების აზრი…. ვიცი რა ფერია სიყვარული და ბედნიერება…. ვიცი, რად ღირს შენთან გატარებული ყოველი წამი და რა მტანჯველია უშენობა…
ახლა კი რა შემიძლია?! ახლა შემიძლია გითხრა, რომ შენ ხარ საუკეთესო მოგონება და გრძნობა ჩემს ცხოვრებაში! ძალიან მიჭირს უშენობა, მაგრამ ვიცი და ვგრძნობ, რომ ჩვენს გვერდით ხარ! სიცოცხლის ძალას მაძლევს და მაძლიერებს ჩვენი ერთადერთი შვილი, რომლის განათლებულ, შენსავით მაღალი მორალური თვისებების მქონე საამაყო პიროვნებად ჩამოსაყალიბებლად ძალისხმევას არ დავიშურებ!
მხოლოდ ერთის მჯერა… მჯერა, რომ ჩვენი ხმა, ჩვენი სითბო და სიყვარული აღწევს შენს გულამდე და თითოეული აქ ნათქვამი სიტყვა მანდ გინათებს გზას, სადაც ხარ“,_ წერს ხათუნა ხუხუნაიშვილი ფეისბუქზე.
