ოთახის ყვავილების უამრავ სახეობას შორის, დღეს შევჩერდებით ბეგონიასა და ბალბაზე.
ეს ორი სახეობა ერთმანეთს ძალიან ჰგავს გამრავლების და ზრდის ტემპით.
ჩვენი მკითხველები, ხშირად ინტერესდებიან, რომელი ყვავილი მრავლდება და იზრდება ადვილად. ამიტომ, ვისაც სურს, მოკლე დროში (რამდენიმე თვეში) დიდ ქოთნებში კიდევ უფრო დიდი ზომის ფართოდ გადაშლილი ყვავილები ჰქონდეს, გთავაზობთ რჩევებს.
ულამაზესია მარჯნის ბეგონია, რომელსაც განსაკუთრებით ლამაზი ყვავილები არ აქვს, თუმცა, გამოირჩევა წინწკლებიანი, ულამაზესი ფოთლებით. ხარობს ძალიან ადვილად, ფოთლითაც კი და იზრდება სწრაფად. ასეთი სახეობის ბეგონია, სექტემბრის ბოლოდან, ხშირად უნდა ვამყოფოთ მზისგულზე, მანამდე კი ირიბად უნდა ხვდებოდეს მზის სხივები.
როგორ გავამრავლოთ?
ახლა, შემოდგომაზე (ზაფხულშიც შეიძლება) ბეგონიას ტოტი ჩვეულებრივად ჩავდოთ წყლიან ჭიქაში. ფესვს მალე გამოიღებს. რომც არ გამოიღოს, ერთი კვირის შემდეგ, შეგიძლიათ ჩარგოთ ქოთანში.
ნიადაგი აუცილებლად კარგად განოყიერებული უნდა იყოს. სოფლის პირობებში საუცხოო შედეგი აქვს ქათმის სკორეთი (ბევრი არ შეიძლება) გაჯერებულ მიწას. სანამ აცივდება, ოქტომბრის ბოლომდე, შეგიძლიათ აივანზე, მზისგულზე დადგათ. ძალიან უყვარს ზომიერი სითბო და სინათლე. სწრაფად გაიზრდება და სხვა სახეობის ოთახის ყვავილების მსგავსად, წლობით არ დაგჭირდებათ ლოდინი.
რაც შეეხება ბალბას, მასაც გამრავლების და ზრდის სწრაფი ტემპი ახასიათებს. უყვარს მზის ზომიერი სითბო, მორწყვა და ნორმალურად გაჯერებული ნიადაგი. განსაკუთრებით ლამაზია წითელყვავილიანი სახეობა. თითქმის მთელი წლის მანძილზე ჰყვავის თუ სინათლიან რაფაზე დადგამთ და ექნება ზომიერი ტემპერატურა.
ახლა, სექტემბრის შუა რიცხვებიდან, ოქტომბრის დასაწყისში, ძალიან კარგია ბალბას გასხვლა. ზედმეტი ზედა ტოტები გადავჭრათ და ჩავრგოთ ახალ , პატარა ქოთნებში. ის სწრაფად იწყებს ვეგეტაციას და ერთ წელიწადში, არც დაიჯერებთ, იმდენი წითლად აბრიალებული ბალბა გექნებათ. ის არის საუცხოო განწყობის მომნიჭებელი.
ჩვენს ერთგულ მკითხველებს კიდევ ერთხელ შევახსენებთ, რომ ყურადღება ამ ორ სახეობაზე შევაჩერეთ იმ ქალბატონებისთვის, ვისაც ძალიან ბევრი საქმე აქვს, ამავე დროს უყვართ ყვავილები და აღნიშნული მიზეზით ვერ ახერხებენ, იქონიონ და დაამშვენონ საცხოვრებელი გარემო.
თქვენ, ვისაც არ გყოფნით დრო, გამუდმებით “ეფეროთ” ლამაზ, თუმცა ჭირვეულ ოთახის ყვავილებს, იმეგობრეთ ბეგონიასთან და ბალბასთან. ისინი თვალხელშუა დაიზრდებიან და თქვენს საოჯახო სივრცეს და განწყობას თანაბრად გაასხივოსნებენ.
“კარმიდამო ჩემი”
