გუშინ ცნობილი გახდა რომ ესპანური „ვალენსია“ ახალი სეზონისათვის მზადებას მიმდინარე წლის პირველი ივლისიდან დაიწყებს. გამოცემა „Marca“-ს მტკიცებით, კლუბის ახალი თავკაცი ჯენარო გატუზოს ინიციატივით ესპანელებმა უკვე წინასასეზონო შეკრებაც დაგეგმეს და 4 ამხანაგურ შეხვედრასაც ჩაატარებენ.
ცნობილია პირველი ორი მეტოქის ვინაობა. 18 ივლისს „ვალენსია“ დორტმუნდის „ბორუსიას“ შეხვდება, 23 ივლისს კი კიდევ ერთ გერმანულ კლუბს, – „შტუტგარტს“ დაუპირისპირდება.
ესპანური „ლა ლიგის“ 2022-23 წლების სეზონი 13 აგვისტოდან დაიწყება.
გუშინ გამოცემამ „Il Messaggero“ ქართველი გულშემატკივრებისათვის საყურადღებო ინფორმაცია გაავრცელა. აღმოჩნდა რომ გიორგი მამარდაშვილს, მომავალ სეზონში, დიდი ალბათობით ახალი კონკურენტი ეყოლება.
„გადაწყვეტილია, რომ ნიდერლანდელი გოლკიპერი იასპერ სილესენი „ვალენსიას“ დატოვებს და ამით გიორგი მამარდაშვილის როლი კიდევ უფრო გაიზრდება, თუმცა, ისიც ცხადია, რომ კლუბში მეკარის პოზიციის გაძლიერება უფრო მეტად სურთ. ამ დროისთვის, „ვალენსიას“ ორი ალტერნატივა გააჩნია.
პირველ რიგში საუბარია ალბანეთის ნაკრების 27 წლის კარის დარაჯ ტომას სტრაკოშაზე, რომელიც იტალიურ „ლაციოში“ ირიცხება. რომაელებს გუნდის გაახალგაზრდება აქვთ გადაწყვეტილი და აქცენტს იტალიური ფეხბურთის ამომავალ ვარსკვლავებზე – გულიელმო ვიკარიოსა და მარკო კარნესეკიზე გააკეთებენ.
არის მეორე ვარიანტიც. 18 წლის ამერიკელი გაბრიელ სლონინა „MLS“-დან. მას „ჩიკაგოსთან“ კონტრაქტი 2023 წლის დეკემბერში ეწურება, თუმცა, ნაკლებად სავარაუდოა, რომ მანამდე აშშ-ში დარჩეს“.
21 წლის გიორგი მამარდაშვილი „ვალენსიაში“ გასულ ზაფხულს გადავიდა და 2021-22 წლების სეზონში გუნდის კარი ყველა ტურნირის 21 მატჩში დაიცვა, გაუშვა 22 გოლი, 9 შეხვედრაში კი კარი მშრალად შეინახა. საქართველოს ნაკრების მეკარეს ესპანურ კლუბთან კონტრაქტი 2024 წლის ზაფხულამდე აკავშირებს.
გუშინ ცნობილი გახდა რომ უკრაინის ნაკრების ყოფილი ფეხბურთელი და მთავარი მწვრთნელი, ანდრეი შევჩენკო ახალ კამპანიას იწყებს, რომელიც რუსი სპორტსმენების საერთაშორისო ასპარეზზე დისკვალიფიკაციას ემსახურება. ვეტერანი ფეხბურთელის განმარტებით, იმ სპორტსმენებს, რომლებიც ომში უკრაინას სოლიდარობას არ უცხადებენ და რუსეთის მხარდამჭერ განცხადებებს ავრცელებენ, საერთაშორისო ასპარეზზე მონაწილეობა უნდა აეკრძალოს.
„უკრაინაში ომის გამო ყველა სტადიონი დადუმდა. ეს სიჩუმე, რომელიც ჩვენს მოედნებზეა დაბომბვით და რაკეტების აფეთქებით ირღვევა. სიჩუმე უკრაინელი ქალებისა და ბავშვების ტირილმა დაარღვია. ამ ყველაფრის ფონზე კი რუსი სპორტსმენების უმრავლესობა ჩუმად არის. ამ დუმილის შედეგად კი უკრაინელი ხალხის მკვლელობა გრძელდება. იმის მიუხედავად, რომ უკრაინაში სტადიონები დადუმებულია, ჩვენ, სპორტსმენები არ უნდა გავჩუმდეთ. ყველას მოვუწოდებ, რომ რუსი სპორტსმენებისა და ნაკრებების ბოიკოტს მხარი დაუჭირონ სანამ უკრაინაში ომი არ დასრულდება. მხარი დაუჭირეთ უკრაინას სპორტულ ფრონტზე! სიჩუმე კლავს“, – განაცხადა ანდრეი შევჩენკომ.
ორი დღის წინ უკრაინა-რუსეთის ომს რუსეთის საფეხბურთო ნაკრების ყოფილი კაპიტანი იგორ დენისოვი გამოეხმაურა და საყურადღებო განცხადებაც გააკეთა.
„ეს ყველაფერი საშინელებაა. ომს წერტილი უნდა დაესვას. შეიძლება ამ სიტყვების გამო ციხეში ჩამსვან ან მომკლან, მაგრამ დუმილი მიუღებელია. მე მზად ვარ პუტინის წინაშე დავიჩოქო და ომის დასრულება ვთხოვო. აღარ ვამაყობ, რომ რუსი ვარ.“
დენისოვი რუსეთის ნაკრების კაპიტანი 2012-დან 2016 წლამდე იყო. იგორი ასევე „ზენიტს“ 2008 წლის უეფას თასის ფინალში კაპიტნობდა.
გამოჩენილ პორტუგალიელ მწვრთნელს ჟოზე მოურინიოს სულ სხვა პრობლემები აწუხებს, – მას ახალი სეზონისთვის „რომას“ გაძლიერება სურს. იტალიური მედიის მტკიცებით მოურინიო ცდილობს უელსელი გარეთ ბეილი დაარწმუნოს, კარიერა იტალიის დედაქალაქში გააგრძელოს.
32 წლის ბეილიმ მადრიდის „რეალი“ ორი კვირის წინ დატოვა, რადგან კონტრაქტი ამოეწურა და ის აღარ გაახანგრძლივა.
ჟოზე მოურინიოსა და გარეთ ბეილს ერთად აქამდეც უმუშავიათ. პორტუგალიელი სპეციალისტი უელსელს „ტოტენჰემში“ ყოფნის დროს, 2020-21 წლების სეზონში წვრთნიდა. იმ პერიოდში შემტევმა ყველა ტურნირზე ერთად 16 გოლის გატანა შეძლო.
მოურინიომ უკვე განახორციელა ზაფხულის პირველი ტრანსფერი. „რომაში“ პორტუგალიელმა თავისი ყოფილი ფეხბურთელი ნემანია მატიჩი მიიყვანა, რომელმაც „მანჩესტერ იუნაიტედი“ თავისუფალი აგენტის სტატუსით დატოვა.
ავტორი
