ორი დღის წინ გამოცემამ „CBS Sports“ გაავრცელა ინფორმაცია რომ პორტუგალიის ნაკრებისა და „მანჩესტერ იუნაიტედის“ 37 წლის ვარსკვლავი კრიშტიანო რონალდოს გადაბირებით დორტმუნდის „ბორუსია“ დაინტერესდა, კლუბი რომელიც ჩემპიონთა ლიგის ახალ გათამაშებაში იასპარეზებს. ანალოგიური „ნიუსი“ გერმანულმა გამოცემა „ბილდმაც“ დაადასტურა.
გავიდა ერთი დღე და აღმოჩნდა რომ „დორტმუნდს“ პორტუგალიელი არ სურდა. უმთავრესი მიზეზი კრიშტიანოს ხელფასია – ის ინგლისურ გუნდში წელიწადში 29 მილიონ ევროს იღებს.
გუშინ ამ „პოპულარულ თემას“ ახალი გაგრძელება მოყვა. რონალდო ამჯერად ხვიჩა კვარაცხელიას „ნაპოლის“ დაუკავშირეს.
ნეაპოლურმა გუნდმა შესაძლოა ერთ-ერთი ლიდერი ირვინგ ლოზანო გაყიდოს. მექსიკელი ფეხბურთელის სამსახურით სწორედ რომ „მანჩესტერ იუნაიტედია“ დაინტერესებული და შესაძლოა ტრანსფერში კრიშტიანო რონალდო ჩართონ.
გამოცემა „Sky Sports“-ის მტკიცებით, ინგლისელები პრემიერ ლიგაში საშინელი დასაწყისის შემდეგ შეტევის გაძლიერებას გეგმავენ, თავის მხრივ კი, „ნაპოლი“ ისტორიაში ერთ-ერთ საუკეთესო ფეხბურთელს მიიღებს. ბრიტანელებს მექსიკელის საყიდლად მსუყე შეთავაზების გაკეთება მოუწევთ. გუნდებმა შესაძლოა ფეხბურთელების გაცვლასაც მიმართონ. რამდენიმე დღის წინ იტალიურმა მასმედიამ დაწერა, რომ პორტუგალიელი შესაძლოა „სერია A“-ში დაბრუნებულიყო.
იტალიური კლუბის მფლობელი აურელიოს დე ლაურენტისი ლოზანოს სანაცვლოდ 40.3 მილიონ ევროს ითხოვს, კრიშტიანო კი 20 მილიონ ევროდაა შეფასებული. თუ პორტუგალიელი ქალაქ ნეაპოლს მიაშურებს, „მანჩესტერ იუნაიტედის“ ხელმძღვანელობას დაახლოებით 20 მილიონი ევროს დამატება მოუწევს.
ხვიჩა კვრაცხელიას „ნაპოლიში“ წარმატებულ დებიუტს ინგლისშიც გამოეხმაურნენ და ქართველ მოთამაშეს გამოცემამ „ Liverpool.com“ სპეციალური წერილი მიუძღვნა.
„სულ მალე ახალი მოჰამედ სალაჰი გამოჩნდება და ჯულიან უორდი (სპორტული დირექტორი) და „ლივერპული“ მას უნდა დააკვირდნენ. მაიკლ ედვარდსმა (ყოფილი სპორტული დირექტორი) ფურორი მოახდინა, როდესაც „ლივერპულში“ თავის დროზე მოჰამედ სალაჰი მოიყვანა და ამ სეზონში ჯულიან უორდმა შეიძლება პოტენციური სატრანსფერო სამიზნე „სერია A“-ში აღმოაჩინოს. ისევე როგორც თავის დროზე სალაჰი, ხვიჩა კვარაცხელიაც ცდილობს იტალიაში სახელის მოპოვებას. ამ ზაფხულში თავისი დანიშნულების პირველი ადგილი ნეაპოლი გახდა, სადაც ქართველმა საუცხოოდ დაიწყო ახალი კარიერა.
კვარაცხელიამ რუსეთ-უკრაინის კონფლიქტისას ფიფას წესით ისარგებლა და ბათუმის „დინამოში“ გადავიდა, საიდანაც იტალიაში გადაბარგდა. თავი დააღწია რა რუსეთის ლიგის ბორკილებს, საქართველოში 11 მატჩში 8 გოლი გაიტანა და 2 საგოლე გადაცემა გააკეთა. „ნაპოლიში“ კი სადებიუტო შეხვედრაში გოლი და საგოლე გადაცემა მიითვალა.
ფეთქებადი მოთამაშე, რომელსაც შეუძლია მეურვეებს გასცდეს, ბურთის ფლობისას მეტოქეთათვის მოუხელთებელია. ვერონაში დრიბლინგის 10 მცდელობიდან 8 წარმატებული ჰქონდა და მთელი მატჩის განმავლობაში საჯარიმოსთან და და საჯარიმოში სახიფათო მოქმედებით მოწინააღმდეგეს ბევრი პრობლემა შეუქმნა. შეუძლია ორივე ფლანგზე და ცენტრში იმოქმედოს. ჯერ კიდევ ძალიან ახალგაზრდაა, 21 წლისაა, მაგრამ დრიბლინგი და თამაშის პოზიციური უნარი იურგენ კლოპისთვის საინტერესო თავდამსხმელად აქცევს, რომელიც იდეალური ერთობლიობაა ლუის დიასის ერთი-ერთზე თამაშისა და მოჰამედ სალაჰის მოედნის ბოლო მესამედზე გავლენის მოხდენისა“.
გუშინ იტალიის ნაკრებისა და „ტორინოს“ ყოფილმა მთავარმა მწვრთნელმა ჯამპიერო ვენტურამ „ნაპოლის“ ფეხბურთელის, ხვიჩა კვარაცხელიას სადებიუტო თამაში შეაფასა.
„კვარაცხელიამ „ვერონასთან“ ხარისხი აჩვენა. ყველაზე მნიშვნელოვანი, რაც გააკეთა, ჟელინსკიზე საგოლე პასი იყო, მან თანაგუნდელი კართან იდეალურ დროს დატოვა. დრო უნდა მივცეთ მოთამაშეს, რომელიც არ იცნობს იტალიის ჩემპიონატს, მაგრამ ნიშნები ძალიან დადებითია“, – აღნიშნა ვენტურამ.
ჯამპიერო ვენტურა იტალიის ნაკრებს 2016-2017 წლებში ავარჯიშებდა, თუმცა სრული ფიასკო განიცადა და გუნდი მსოფლიოს ჩემპიონატზე ვერ გაიყვანა.
ბოლოს კი ერთი საინტერესო ინფორმაცია. თუ ყველაფერი ისე წარიმართა, როგორც დაგეგმილია, 22 წლის ოლიმპიური ჩემპიონი ლაშა ბექაური ძიუდოს ტატამს ხანგრძლივი პაუზის შემდეგ 3-4 სექტემბერს ავსტრიის ქალაქ ობერვარტში დაუბრუნდება, სადაც ევროპის ღია პირველობა გაიმართება.
ავტორი
