ოზურგეთში, უპოვართა სასადილოში, რომელიც მუნიციპალიტეტის მერიის მფარველობის ქვეშაა, 180 ბენეფიციარი ირიცხება. ისინი კვებით შემწეობას იღებენ ხელმწიფოსგან და ზოგი ადგილზე მიირთმევს, ზოგსაც, კუთვნილი ულუფა შინ მიაქვს. დღეისთვის, ეს სასადილო რესტორან “იზაბელას” ოფისშია განთავსებული და ბენეფიციარებს აქვე ემსახურებიან.
“გურია ნიუსის” მიერ მოპოვებული ინფორმაციით, უპოვართა სასადილოს ბენეფიციართა უმრავლესობა, ასზე მეტი ადამიანი, უკმაყოფილებას გამოთქვამს იმის გამო, რომ საკვები უხარისხოა. ასევე, გამოთქვამენ საყვედურს, რომ ულუფა არასდროსაა საკმარისი და იმ წონის, რაც ეკუთვნით. აწვდიან “წყალწყალა სუპს” და კისელს, პროტესტის გამოთქმისას კი ეჩხუბებიან…
ჩვენ უკმაყოფილო ბენეფიციარებმა მოგვაწოდეს ინფორმაცია, რომ აღნიშნულის თაობაზე, ოზურგეთის მუნიციპალიტეტის მერს, ავთანდილ თალაკვაძეს განცხადებით მიმართავენ. ასევე, მიმართავენ სხვადასხვა ორგანიზაციებს, რომ მათი უფლებები სრულად იქნეს დაცული.
“ჩვენ, უპოვართა სასადილოთი მოსარგებლე ადამიანები, მოგმართავთ თხოვნით, დაგვეხმაროთ. უკვე ერთ თვეზე მეტია, ვიმყოფებით ახალ სასადილოში. როცა იქ მივდივართ, ხშირად არ გვხვდება კუთვნილი საკვები. თუკი მოვითხოვთ, გვეჩხუბებიან. ულუფების რაოდენობა ცოტაა. კისელი წყალწყალაა. პურის გარდა არაფერი არ ვარგა. ვიცით, რომ ოზურგეთის მუნიციპალიტეტმა მეტი თანხა ვერ გამოყო, მაგრამ რასაც გვაძლევენ, გვინდა იყოს გემრიელი, რომ თავი ცხოველებად არ ვიგრძნოთ!” _ წერია განცხადებაში, რომლითაც მათ ოზურგეთის მუნიციპალიტეტის მერს მიმართეს.
ბენეფიციარები კიდევ ერთ საკითხზე არიან უკმაყოფილოები:
_ გვეგონა, აღრიცხვას აკეთებდნენ და მადლობის წერილზე ხელი მოტყუებით მოგვაწერინეს, _ ამბობენ ისინი “გურია ნიუსთან”.
ჩვენ იოანე პეტრიწის ქუჩაზე მდებარე რესტორან “იზაბელას” ვეწვიეთ, სადაც უპოვართა სასადილოა განთავსებული. თავად სასადილო დარბაზში სისუფთავე და წესრიგი სუფევდა. ადგილზე მყოფ მომსახურე პერსონალს, რომელსაც უკვე დაწყებული ჰქონდა ბენეფიციართათვის მომსახურება, ჩვენ გავაცანით ინფორმაცია, რაზეც ზემოთ ვისაუბრეთ.
_ ჩვენთან სულ 180 ადამიანი ირიცხება. საკვები დღეში ერთხელ მიეწოდებათ _ ათი საათიდან ორ საათამდე. უმეტესად საკვები შინ მიაქვთ, აქ უფრო ცოტა ადამიანი მიირთმევს. ახლავე გაჩვენებთ, რა დასახელების და როგორ მომზადებული საკვები გვაქვს. შეგიძლიათ, გასინჯოთ, ნახეთ ხარისხი, _ შემოგვთავაზა მომსახურე პერსონალიდან ერთ-ერთმა ფატი ტუღუშმა.
მისივე თქმით, ხშირად პრეტენზიებს ის ადამიანები გამოთქვამენ, რომლებიც სამი ან ოთხი დღის განმავლობაში არ მოდიან ულუფის მისაღებად. მერე კი, როცა მოვლენ, ერთად ითხოვენ, რაც არ მიუღიათ.
_ როცა საკუთარი პრობლემების გამო, აქ ოთხ დღეს არ მოვა ადამიანი და მერე ჩვენ გვთხოვს, მივაწოდოთ მთელი ოთხი დღის ულუფა, რა უნდა ვქნათ ასეთ დროს? რამდენჯერ მომხდარა, პური, საკვები გადავდეთ და დაძველდა, დაობდა. სანამ უნდა შევინახოთ? ასე შეიძლება? ჩვენ ყველა ღონეს ვხმარობთ, ამ ადამიანებს კეთილგანწყობილი გარემო შევუქმნათ და არაფერი მივაკლოთ, რაც მათთვის არის განსაზღვრული. თავს ზემოთ კი ძალა არაა, _ გვითხრა ქალბატონმა ფატიმ.
“გურია ნიუსი” ესაუბრა ბენეფიციარებს, რომლებიც ჩვენი იქ ყოფნისას მოდიოდნენ და იქვე მიირთმევდნენ კუთვნილ ულუფას ან სპეციალურად მოტანილ კონტეინერში ათავსებდნენ შინ წასაღებად.
სამსონ ვაჩნაძე, სასადილოს ბენეფიციარი:
_ მე, ჩემი ოჯახის ექვსი წევრით დავდივარ ამ სასადილოში. ყოველთვის კმაყოფილი ვარ. არ ვიცი, ვინ რატომ არის უკმაყოფილო. უფრო კი კონკურენციის ამბავი მგონია. ადრე სხვა ხელმძღვანელი გვყავდა, ახლა კი, ტენდერის შემდეგ, სხვა არის და აქ გადმოვედით. მეტს ვერაფერს გეტყვით, _ გვითხრა მან.
დარეჯან წიტაიშვილი, ბენეფიციარი:
_ მე არ ვარ უკმაყოფილო. ჩვეულებრივი საჭმელია, საშუალო დონის. აბა, კარგზე კარგი საკვები რესტორანშია. ეს რესტორანი ხომ არ არის? ხშირად შინ მიმაქვს საჭმელი. ზოგჯერ ვერ მოვდივარ. გლაუკომა მაქვს, ექიმთან დავდივარ და როცა ვერ გამოვცხადდი, მეორე დღეს კი დამახვედრეს ჩემი წილი. ერთ კვირას ვინ შეგინახავს? რომც შეინახონ, ივარგებს?
_ მე ილო მეგრელაძე ვარ! სულ დავდივარ აქ. ახლაც უნდა ვისადილო. ხან სახლშიც მიმაქვს კუთვნილი ულუფა. თქვენც ხომ ხედავთ, როგორი სისუფთავეა. ყველა სიყვარულით გვეპყრობა. საჭმელი ახალია. პურიც არის, კატლეტი, ბორში, ხილის კომპოტი… უკმაყოფილო არასდროს ვარ. ვინც არის, კი გეტყოდათ…
ბენეფიციარმა კახა მაღრაძემ თქვა, რომ მას გზაზე დახვდნენ უკმაყოფილო ბენეფიციარები და თხოვდნენ, ხელი მოეწერა ოზურგეთის მერთან წასაღებ განცხადებაზე.
_ არ მოვაწერე. რატომ მოვაწერდი? არ ვარ უკმაყოფილო, _ თქვა მან “გურია ნიუსთან”.
სასადილოს მომსახურე პერსონალიდან კიდევ ერთმა, მარინა ანთაძემ არაერთხელ შემოგვთავაზა, რომ კარგად დაგვეთვალიერებინა გარემო. ასევე, შემოგვთავაზა საკვები, თავად გვენახა, იყო თუ არა ძველი, უხარისხო ან უგემური:
_ ჩვენ გვაქვს მენიუ. შეგიძლიათ, წაიკითხოთ. რა სახეობებიც და რაოდენობა არის განსაზღვრული, ზუსტად ისე ვაწვდით. აქ წერია ყველაფერი და ყოველთვის შეგიძლიათ, გადაამოწმოთ, _ გვითხრა ანთაძემ.
მენიუში კვირის დღეების მიხედვით ჩამოწერილია კვების სახეობები. იქვე მითითებულია წონა.
ჩამონათვალში დასახელებულია შემდეგი სახეობები: ბორში, კატლეტი გარნირით, წვნიანი, ხორცის გუფთა, ოსპის წვნიანი, ხილის კომპოტი…
რაც შეეხება ადგილზე მყოფ ბენეფიციართა თვალსაზრისს, რომ კონკურენციის გამო ხდება ეს ყველაფერი, პროტესტის გამომხატველი განცხადების ავტორი ბენეფიციარები კატეგორიულად უარყოფენ ასეთ მიდგომას.
_ ჩვენ არანაირი დავალებით არ ვმოქმედებთ და არ მოგვითხოვია წინა მდებარეობაზე დაბრუნება. აქ ვართ და ვითხოვთ ისეთ კვებას, როგორიც გვქონდა ადრე და ახლა რასაც გვაძლევს სახელმწიფო, ის სრულად მოგვცენ. ძალიან ხშირად არის უგემური საჭმელი, წყალწყალა სუპი და კისელი. ყველას გვახსოვს, როგორი კვება გვქონდა წინა პერიოდში. ცხოველები არ ვართ. ადამიანები ვართ და გვსურს, თავი ადამიანებად ვიგრძნოთ. ხარისხიან საკვებს ვითხოვთ! _ ასე საუბრობენ ისინი “გურია ნიუსთან”.
მათ, ასევე, გვითხრეს, რომ 101 ადამიანის ხელმოწერით, განცხადებით მიმართეს მერს და ითხოვენ, მედიასაშუალებებიც იყვნენ საქმის კურსში.
“გურია ნიუსი”, თვალს მიადევნებს ამ პროცესს და შედეგებს გააცნობს ჩვენს მკითხველებს.
ავტორი
