რუისელია ჩვენი დღის ფოტოგმირი, ქარელის რაიონში ცხოვრობს პაპა ყარამანი. მეცხვარეობა, სულ რამდენიმე წელია, რაც დაიწყო. თუმცა განსაკუთრებით შეუყვარდა ეს საქმე მეურნე კაცს.
ახლა საშემოდგომო დოლია მის ფარეხში.
_ასი სული ცხვარი მყავს. ჩვენს სოფელში ყველაზე ბევრი მე მყავს. სხვა სოფლებში უფრო მეტი ჰყავთ. ახლა ვკრეჭთ მე და ჩემი მეუღლე. საშემოდგომო დოლია. ზოგჯერ მგელიც მაზარალებს. ამიტომ მყავს ოთხი ნაგაზი. ორი კავკასიურია… ძალიან მიყვარს ჩემი ფარა. დღეში 38 კილომეტრს გავდივარ, რომ წესიერად იბალახონ, მგელი არ შემოგვეპაროს ან ტურა, _ გვიამბობს მეცხვარე ყარამან ბერუაშვილი, რომელიც სოფელში თავისი შრომისმოყვარეობით და დიდი ადამიანური გულით გამოირჩევა.
_38 კილომეტრს რომ გადიხართ, როგორ დააზუსტეთ?
_ნაბიჯებით დავთვალე, თან ვიწერდი…საშუალოდ ცოტა მეტი ან ნაკლები მანძილი უნდა დავფარო ყოველდღიურდ…ეს, საქმესთან ერთად, დიდი ჯანმრთელობაცაა… კეთილი საქმე უნდა აკეთო ადამიანმა, უნდა იშრომო, სიკეთე სთესო, მეზობლებსა და მეგობრებს დაეხმარო, აბა, ცუდი საქმის კეთებას რა უნდა, ყველაზე ადვილია…გაიხარეთ, რომ შემეხმიანეთ…შრომას და კეთილ საქმეს გამსახუროთ უფალმა. მე კი, სანამ ვიცოცხლებ, ცხვარს ვდევ და დღეში 38 კილომეტრს გავივლი, ნაბიჯების დათვლით, – ჩვეული კეთილი ხმით დაგვემშვიდობა იგი.
ყარამან ბერუაშვილი „გურია ნიუსის“ ძველი მეგობარია.
გვეუბნება, რომ გაზეთზე უფრო, ინტერნეტსივრცესში ადევნებს თვალს ქვეყნის ამბებს და ცხვარში ყოფნისას, გურიაში მიმდინარე პროცესებსაც დიდი ინტერესით ეცნობა.
ავტორი
