“ყოველი ძლიერი წვიმის დროს ასეთ სიტუაციაში ვართ სოფელ ხიდისთავის ერთ-ერთი უბნის მოსახლეობა. არასწორად გაკეთებული სანიაღვრე არხების გამო ეზოები იტბორება. მადლობა ღმერთს, წყალი სახლში არ შემოდის. მიუხედავად არაერთი მიმართვის და თხოვნისა ადგილობრივ მოსახლეობას ყურადღებას დღემდე არავინ გვაქცევს”, _ ამ შინაარსის წერილი “გურია ნიუსმა” რამდენიმე დღის წინ მიიღო.
ხიდისთავი-ახალშენის გზაზე ერთ-ერთ უბანში, მცხოვრებლები მერისგან დაპირების შესრულებას ითხოვენ.
“გურია ნიუსი” ადგილზე მივიდა და ადგილობრივ მცხოვრებლებს გაესაუბრა.
როგორც მათი ნაამბობიდან ირკვევა, ძლიერი წვიმის დროს სანიაღვრე არხები, რომელიც ზედა ქუჩაზეა გაკეთებული, წყლის დიდ ნაკადს ვერ ატარებს და იქიდან გადმოსული წყალი მათ ეზოებს ტბორავს. პრობლემა მხოლოდ აღნიშნული ტერიტორიის მცხოვრებლებს არ ექმნებათ და იმ მოსახლეებზეც ვრცელდება, ვისაც მიმდებარედ საყანე ფართობები აქვთ.
“გასასუფთავებელია სანიაღვრე არხები, ზაფხულში დაგვპირდა მერი და ვნახოთ, რა იქნება, მაგრამ ზაფხულის მერე, ჯერჯერობით, ყურადღება არავის გამოუჩენია”, _ ამბობს ადგილობრივი მცხოვრები ნინო იაკობაშვილი.
კიდევ ერთი მცხოვრები, დარეჯან კალანდაძე ამახვილებს ყურადღებას მოუწესრიგებელი და არასათანადოდ გაკეთებული სანიაღვრე არხებისგან გამოწვეულ პრობლემაზე.
მისი თქმით, ძლიერი წვიმის დროს ეზოში შესულმა წყალმა ჭა დააბინძურა, ამიტომ ჭის წყალს ვეღარ სარგებლობს.
“ვითხოვთ არხის გაწმენდას. ორი წლის წინ, საკუთარი სახსრებით გავწმინდე ჩემი ტერიტორია, მაგრამ შემოვიდა წვიმის დროს ჩემს ეზოში წყალი და ჭის წყალიც დამიბინძურა, საყანე ადგილიც დამიზიანა. ყანა თავის დროზე ვერ დავთესე, დატბორა წყალმა, მერე, როცა დავთესე, კიდევ მოვიდა წვიმა და კიდევ დატბორა, მარტო მე არ ვარ ამ დღეში.
პრობლემა მას შემდეგ გაჩნდა, რაც ზედა ქუჩაზე სანიაღვრე არხები გაკეთდა. როგორც ჩანს, არ არის ნორმალურად დაგეგმარებული. წყლის დიდ დინებას პატარა მილები ვერ ატარებს და გადმოდის აქეთ. პრობლემის მოგვარების მიზნით, წერილობით არაერთხელ მივმართეთ ადგილობრივ ხელისუფლებას, ჯერ კიდევ ირაკლი კუჭავას მერობის პერიოდში. პრობლემის შესახებ დეპუტატ ჩიგოგიძესაც მოვახსენეთ, მაგრამ ეგ ჩემი პრობლემა არ არისო, _ ასეთი პასუხი გაგვცა.
ზაფხულში, განცხადებით, რომელსაც ხელს 14-15 ადამიანი აწერდა, მერს, დავით შარაშიძესაც მივმართეთ, მაგრამ ჯერ არავინ გამოჩენილა”, _ ამბობს დარეჯან კალანდაძე.
“გურია ნიუსი” გურიის მაჟორიტარ დეპუტატს საქართველოს პარლამენტში ვასილ ჩიგოგიძეს დაუკავშირდა:
_ ბატონო ვასილ, თუ ხართ ინფორმირებული ხიდისთავი-ახალშენის გზაზე მცხოვრებლების იმ პრობლემების შესახებ, რასაც სანიაღვრე არხები იწვევს? ადგილობრივი მოსახლეობა გვეუბნება, რომ საქმის კურსში ჩაგაყენეს, მაგრამ თქვენგან მიიღეს პასუხი, რომ ეს თქვენი პრობლემა არ იყო. შეგიძლიათ ამის დადასტურება? შედგა თქვენ შორის მსგავსი საუბარი?
_ არა. ჩვენ არასდროს გვქონია მსგავსი საუბარი. არავის მოუმართავს ჩემთვის. მერის რწმუნებული ხომ უნდა იყოს საქმის კურსში?_ გვიპასუხა ჩიგოგიძემ.
როდიდან დაიწყება მიცემული დაპირების შესრულება, ამის შესახებ ჩოხატაურის მუნიციპალიტეტის მერს, დავით შარაშიძეს ვესაუბრეთ:
“ახალშენი-ხიდისთავის შემაერთებელი გზა ჩასმული გვაქვს სამომავლოდ რეგფონდში. დაახლოებით, თებერვლიდან დავიწყებთ დაპროექტებას, რომლის ღირებულებაც 400 000-ამდე ჯდება. გაკეთდება ახალი სანიაღვრეები, ახალი გზა”, _ ამბობს ჩოხატაურის მუნიციპალიტეტის მერი, დავით შარაშიძე.
მაგრამ, სანამ მერი კიდევ სამომავლოდ გადადებული დაპირების შესრულებას შეუდგება, იმავე უბნიდან გვატყობინებენ, რომ ამავე უბანში, წუხანდელი უამინდობით ადიდებულ ღელეზე გადებულ გადასასვლელზე სკოლის მოსწავლეები ვერ გადავიდნენ და წყალში ჩაცვივდნენ.
იმედია, მუნიციპალიტეტის პირველი პირები აღნიშნულ პრობლემაზე სასწრაფო რეაგირებას მოახდენენ, თორემ წინ ზამთარია, ღელე გვიან გაზაფხულამდე სულ ადიდებული იქნება და უფროსებზე რომ აღარაფერი ვთქვათ, აღნიშნული უბნიდან მოსწავლეებმა სკოლაში უნდა იარონ.
ავტორი
