გუშინ, მსოფლიოს ჩემპიონატის გახსნით მატჩში მასპინძელი კატარი ეკვადორთან 0:2 დამარცხდა.
შეხვედრის წინ გავრცელდა ინფორმაცია, რომ კატარელებმა სამხრეთამერიკული გუნდის ფეხბურთელები მოისყიდეს, 1:0-ს მოიგებდნენ და გოლს მეორე ტაიმში გაიტანდნენ, რაც სიმართლე არ გამოდგა.
სტუმრები აშკარად სჯაბნიდენ მეტოქეს, პირველ ტაიმში ვალენსიას დუბლით დაწინაურდნენ, შესვენების შემდეგ თამაში დააწყნარეს და მშვიდად მიიყვანეს ლოგიკურ დასასრულამდე.
კატარი–ეკვადორის შეხვედრის შემდეგ მსოფლიოს პირველობაზე დღეს პირველი „სრულფასოვანი სამუშაო დღე“ იქნება. რასაკვირველია მონაწილე გუნდების შესაძლებლობებზე საუბარი ჯერჯერობით ნაადრევია და ამ თემაზე ბჭობა ალბათ ჯგუფებში პირველი ტურის დასრულების შემდეგ იქნება შესაძლებელი.
არგენტინა, ბრაზილია, საფრანგეთი, გერმანია ყოველთვის გამარჯვების უპირობო კანდიდატებად ითვლებიან. ამ გუნდებს ასევე ყოველთვის ინგლისი, ნიდერლანდები, ესპანეთი, პორტუგალია მოსდევენ. სხვა მონაწილეებიდანაც ყოველთვის ერთი–ორი აუცილებლად გაიბრძოლებს. სამხრეთ კორეა – იაპონიაში ეს როლი თურქეთმა შეასრულა, წინა მსოფლიოს პირველობაზე კი ხორვატიამ.
მიმდინარე მსოფლიო პირველობის უმთავრესი სპეციფიკა ის გახლავთ რომ ეროვნული გუნდის მოთამაშეებს სანაკრებო მზადება თითქმის არ გაუვლიათ. ამიტომ კატარის მუნდიალი ალბათ არაერთ ახალ ფავორიტ გუნდს წარმოაჩენს და დაუგეგმავი სენსაციებითაც გაგვანებივრებს.
დამდეგი მსოფლიოს ჩემპიონატი უარყოფითი კუთხითაც გამორჩეულია – ბევრი ტრავმირებული ფეხბურთელი გამოაკლდა საფეხბურთო ზეიმს. ბოლო კარიმ ბენზემაა, „ოქროს ბურთის“ მოქმედი მფლობელი. ზოგადად, საფრანგეთის ნაკრებს სხვებთან შედარებით ყველაზე დიდი დანაკლისი აქვს და ბენზემას გარდა, ნგოლო კანტე, პოლ პოგბა, პრისნელ კიმპემბე და კრისტოფერ ნკუნკუ. მეტ–ნაკლები დანაკლისი აქვთ სხვა გუნდებსაც. ტრავმების გამო მუნდიალს ფეხბურთელები სხვა დროსაც დაკლებიან, მაგრამ ახლა ამას მაინც აქვს გამომწვევი მიზეზი – მჭიდრო კალენდარი და სეზონის შუაში დაგეგმილი მსოფლიოს ჩემპიონატი.
ამ სტრიქონების ავტორს რაც შეეხება, უმთავრეს ფავორიტად მაინც არგენტინის ეროვნულ გუნდს მივიჩნევ, რომელსაც წაუგებელი სერია დიდი ხანია რაც გაუგრძელდა. ამის გარდა ალბათ დადგა დრო და ლეო მესი მსოფლიო ჩემპიონის ტიტულს იმსახურებს. თუ მიმდინარე წლის შეხვედრებს თვალს გადავავლებთ, გამარჯვების მეორე უპირობო კანდიდატი ბრაზილიის ნაკრები იქნება.
მიმაჩნია რომ კატარში გერმანიის, საფრანგეთისა და ინგლისის ეროვნულ გუნდებს წარმატების მიღწევა გაუჭირდებათ. ბოლო დროს მათ ერთგვარი კრიზისული დროება დაუდგათ და ამის ნათელსაყოფად თუნდაც ევროპის „ერთა ლიგის“ ბოლო თამაშები გამოდგება. რადგან სიტყვამ ევროპა მოიტანა, უპირატესობას ნიდერლანდებისა და პორტუგალიის ნაკრებებს ვანიჭებ.
როგორც წესი, ბუქმეიქერები მსოფლიოს ჩემპიონატის ფავორიტებს ყოველთვის ასახელებენ და შესაბამის კოეფიციენტებსაც გვთავაზობენ. ანალიტიკოსების აზრით, კატარის მუნდიალის მოგების ყველაზე მეტი შანსი ბრაზილიის ნაკრებს აქვს, რაზეც კოეფიციენტი 5,0-ს უტოლდება.
შემდეგ მოდიან არგენტინის ნაკრები – 6,5 და საფრანგეთი 7,5. მათივე მოსაზრებით, ნაკლები შანსები აქვთ ინგლისსა და ესპანეთს – 10,0-10,0, გერმანიას – 12,0, ხოლო ნიდერლანდებს – 15,0.
ყველაზე მაღალი (1000,0) კოეფიციენტი კი მინიჭებული აქვს კოსტა რიკის ნაკრებს, რომელმაც ყველაზე ბოლოს მოიპოვა მსოფლიოს ჩემპიონატის საგზური.
ბრაზილიელმა წინასწარმეტყველმა ათოს სალომემ, მეტსახელად „ცოცხალმა ნოსტრადამუსმა“, გამოცემა „დეილი სტარს“ გაუმხილა, რომელი გუნდები გავლენ მსოფლიოს ჩემპიონატის ფინალში. ადრე მან კორონავირუსის პანდემია და დიდი ბრიტანეთის დედოფლის ელიზაბეტ II-ის გარდაცვალება იწინასწარმეტყველა.
სალომე დარწმუნებულია, რომ ხუთ საუკეთესოთა შორის არგენტინა, ბრაზილია, ბელგია, საფრანგეთი და ინგლისი იქნებიან. ბრაზილია ჩემპიონატს ვერ მოიგებს, მაგრამ ფინალში გასვლის შანსი აქვს. მან განაცხადა, რომ გადამწყვეტ მატჩში ერთმანეთს სამხრეთამერიკული (დიდი ალბათობით არგენტინა) და ცენტრალური ევროპის (საფრანგეთი) ნაკრებები შეხვდებიან.
პოლონეთის ნაკრების კაპიტანი რობერტ ლევანდოვსკი მსოფლიოს ჩემპიონატის ფავორიტად არგენტინას მიიჩნევს.
“არგენტინა მარტო ჩვენი ჯგუფის კი არა, მთელი ტურნირის ფავორიტია. მესი შესანიშნავ ფორმაშია. ბარსელონაში ყოველ ფეხის ნაბიჯზე შეიგრძნობ, რომ ის ლეგენდაა. ჩვენ გვესმის, ვის წინააღმდეგ მოგვიწევს თამაში“, – განაცხადა რობერტ ლევანდოვსკიმ.
არგენტინის ნაკრებისა და „პსჟ“–ის ვარსკვლავმა ლიონელ მესიმ მუნდიალზე სამი ფავორიტი ნაკრები დაასახელა.
მესის მიაჩნია, რომ გამოსარჩევები ბრაზილიის, საფრანგეთისა და ინგლისის ნაკრებები არიან, თუმცა მსოფლიო ჩემპიონატი რთული და დამაბნევებელი ტურნირია, ამიტომ წინასწარ რაიმეს თქმა რთულია.
მესიმ ასევე აღნიშნა, რომ რთულ ჯგუფში არიან, ჩემპიონატი თავიდანვე კარგად უნდა დაიწყონ, რაც ძალიან მნიშვნელოვანია.
ახლო წარსულში „მილანის“ ლეგენდარულმა მცველმა კაფუმ მსოფლიო ჩემპიონატის წინ ფავორიტების შესახებ ისაუბრა.
კაფუს თქმით, მუნდიალის მასპინძელი კატარის ნაკრები მეოთხედფინალში გასვლას შეძლებს, თუმცა ტურნირის ფავორიტად ბრაზილიის ნაკრებს მიიჩნევს.
„ბრაზილია, ინგლისი, არგენტინა და საფრანგეთი მუნდიალის ფავორიტები არიან. ბრაზილიისა და არგენტინის დაპირისპირება საინტერესო იქნება, ისევე, როგორც პორტუგალიისა და საფრანგეთის. თუმცა მჯერა, რომ ჩვენი გამარჯვების დროა.
ბოლო წლებში, კატარში ფეხბურთის დონე ამაღლდა. მათ გამოცდილი ფეხბურთელები და სამწვრთნელო შტაბი ჰყავთ. მართალია, ჯგუფურ ეტაპზე თამაში რთულ მეტოქეებთან მოუწევთ, მაგრამ, ვფიქრობ, მეოთხედფინალში აღმოჩნდებიან“. – განაცხადა კაფუმ.
ლეგენდარულმა იტალიელმა მეკარე ჯანლუიჯი ბუფონმა თქვა, რომ 2022 წლის მსოფლიო ჩემპიონატზე „სკუადრა აძურას“ არყოფნაში, კამერუნის ნაკრებს უქომაგებს.
ვეტერანმა კარის დარაჯმა თავისი გადაწყვეტილებაც ახსნა:
„ჩვეულებისამებრ, როდესაც იტალია დიდ ტურნირზე მონაწილეობას არ იღებს, მხარს იმ გუნდებს ვუჭერ, სადაც ჩემი მეგობრები და თანაგუნდელები თამაშობენ. ასევე იმათ, ვინც აუტსაიდერის როლშია.
ამ შემთხვევაში კამერუნს ვუქომაგებ, რადგან 1990 წლის მუნდიალზე მათი მეკარის თამაშმა გადამაწყვეტინა გავმხდარიყავი კარის დარაჯი“, – განაცხადა ბუფონმა.
ლონდონის „ტოტენჰემის“ თავდამსხმელ ჰარი კეინს კი მიაჩნია, რომ ინგლისის ნაკრებს 2022 წლის მუნდიალზე ჩემპიონობა შეუძლია:
„10 წლის წინ ჩვენ გვეშინოდა გვეთქვა, რომ დიდ ტურნირებზე ჩემპიონობა შეგვიძლია, გარეთ საუთგეიტის ხელმძღვანელობით კი ეს ყველაფერი შეიცვალა და ახლა ამაზე საუბრის აღარ გვეშინია.
მსოფლიო ჩემპიონატზე თასის მოსაპოვებლად მივდივართ და გვჯერა, ეს შეგვიძლია! სხვაგვარად ფიქრი არასწორი იქნებოდა!
რა აზრი აქვს ტურნირზე წასვლას, თუ არ გჯერა, რომ სახლში თასით შეგიძლია დაბრუნდე“, – ამბობს კეინი.
ავტორი
