გუშინ, იტალიურ მასმედიასთან საუბრისას ცნობილმა შვედმა ფეხბურთელმა, ამჟამად „მილანის“ თავდამსხმელმა ზლატან იბრაჰიმოვიჩმა ხვიჩა კვარაცხელიას შესახებ კომენტარი გააკეთა.
„მომწონს კვარაცხელია, ძლიერი ფეხბურთელია. ვიქტორ ოსიმენიც შესანიშნავი თავდამსხმელია. საიდუმლო არ არის, რომ „ნაპოლი“ კარგად თამაშობს. ეს ჩანს შედეგებიდან, „სერია A“-ს სატურნირო ცხრილში და ჩემპიონთა ლიგაზე ასპარეზობაში, „ნაპოლის“ დროა.
თუ კვარა და ოსიმენი ასე კარგად თამაშობენ, ეს გუნდის დამსახურებაცაა, რადგან განსხვავებას არ ქმნის ინდივიდუალური ხარისხი, არამედ ყოველთვის კოლექტიური თამაში. ლუჩანო სპალეტი ძლიერი მწვრთნელია, სკუდეტო ჯერ არ მოუგია, მაგრამ წელს ყველაფერი „ნაპოლის“ გამარჯვებისკენ მიდის“, – განაცხადა ზლატან იბრაჰიმოვიჩმა.
ესპანეთის ქალაქ ვალენსიაში კი დიდი ამბებია… „ვალენსიას“ გულშემატკივრებმა შაბათს, „სოსიედადთან“ მოგებული მატჩის წინ და კვირას, 26 თებერვალს ქალაქის ქუჩებში მრავალათასიანი აქცია-პროტესტი მოაწყვეს და კლუბიდან სინგაპურელი ინვესტორ პეტერ ლიმის წასვლა მოითხოვეს.
აქციაზე ისმოდა შეძახილები „პიტერ, წადი“, „პიტერ ლიმი ბო***შვილია“, „ვალენსია“ ჩვენ ვართ“ და „პიტერ, მოკვდი“. მანიფესტაციაზე, რომელშიც მონაწილეობა, დაახლოებით, 20 000-მა ვალენსიელმა მიიღო, იყო წარმოდგენილი ბანერები: – „თუ გუნდს სეგუნდა დივიზიონში გააგდებ, სინგაპურშიც ვერ დაგვემალები!“
პიტერ ლიმი კლუბის მთავარი მეწილე და მმართველი 2015 წელს გახდა, თუმცა გუნდის თამაშს ბოლოს 2019 წელს დაესწრო და ქალაქ ვალენსიაში მნიშვნელოვანი საკითხების გადასაწყვეტადაც აღარ ჩადის.
პიტერმა 2015 წელს „ვალენსიაში“ მისვლისას გასცა დაპირებები, რომ კლუბში საკმარის ინვესტიციებს ჩადებდა, რათა ევროტურნირებზე წარმატებული გამოსვლისა და ესპანეთის ჩემპიონატში მაღალი ადგილების დასაკავებლად ძლიერი გუნდი შეექმნათ. თუმცა სიტყვა არ შეასრულა და ამჟამად კლუბს ესპანური „ლა ლიგიდან“ გავარდნა ემუქრება.
2021 წლიდან „ვალენსიას“ რიგებში გიორგი მამარდაშვილი ასპარეზობს. კლუბს „ლა ლიგაში“ ჩატარებული 23 ტურის შემდეგ მხოლოდ 22 ქულა აქვს და სატურნირო ცხრილში მე-18 ადგილს იკავებს. მომდევნო შეხვედრას მამარდაშვილის გუნდი 5 მარტს, გასვლაზე „ბარსელონას“ წინააღმდეგ ჩაატარებს.
გუშინ ცნობილი გახდა, რომ ახლო წარსულში ცნობილი გერმანელი ფეხბურთელი იურგენ კლინსმანი სამხრეთ კორეის ნაკრების მთავარ მწვრთნელად დაინიშნა.
58 წლის გერმანელმა აზიელებთან კონტრაქტი 2026 წლის ზაფხულამდე გააფორმა. კლინსმანმა პორტუგალიელი პაულუ ბენტუ შეცვალა, რომელმაც გუნდი მსოფლიოს ჩემპიონატის შემდეგ დატოვა.
იურგენ კლინსმანი სამწვრთნელო საქმიანობას სამწლიანი შესვენების შემდეგ დაუბრუნდა. ბოლოს ის 2019-2020 წლებში ბერლინის „ჰერტას“ ავარჯიშებდა. მანამდე კლინსმანის კარიერაში იყო გერმანიის ნაკრები (2004-2006), „ბაიერნი“ (2008-2009) და აშშ-ს ნაკრები (2011-2016).
„პარი სენ-ჟერმენმა“ საფრანგეთის „ლიგა 1“-ის მორიგი ტურის შეხვედრაში „მარსელი“ სტუმრად დაამარცხა – 3:0.
შეხვედრის 25-ე წუთზე კილიან მბაპემ ანგარიში გახსნა. ოთხი წუთის შემდეგ მასპინძლების კარი ლეო მესიმ დალაშქრა. არგენტინელისათვის ეს გოლი მე-700 გამოდგა საკლუბო დონეზე.
მბაპემ პარიზულ კლუბში 200 გოლის ნიშნულს უწია და ამ მაჩვენებლით „პსჟ“-ის ისტორიაში საუკეთესო ბომბარდირს – ედინსონ კავანის გაუტოლდა.
თურქეთში მომხდარი დამანგრეველი მიწისძვრის შემდეგ სტამბულის „ბეშიქთაშმა“ პირველი შეხვედრა გამართა და „ანტალიასპორს“ დაუპირისპირდა. მატჩი ფრედ – 0:0 დასრულდა.
შეხვედრის მიმოხილვაზე მნიშვნელოვანი თურქი გულშემატკივრების საქციელი გახდა, რომელიც სხვადასხვა სოციალურ ქსელს ვირუსულად მოედო.
ფანებმა მიწისძვრის შედეგად დაზარალებული ბავშვებისთვის სათამაშოები ისროლეს.
ავტორი
