ჩემპიონთა ლიგაზე „ნაპოლი“ – „მილანის“ განმეორებით მეოთხედფინალურ შეხვედრას მთელი საფეხბურთო მსოფლიო დიდი მოლოდინით ელოდებოდა. საინტერესო იყო, შეძლებდა კი კრიზისში მყოფი ნეაპოლური კლუბი ძალების მოკრეფას და მეტოქის სასურველი ანგარიშით დამარცხებას. სამწუხაროდ იმედი იმედად დარჩა და „მილანი“ ჩემპიონთა ლიგის ნახევარფინალში იასპარეზებს. „მარადონაზე“ ჩატარებული შეხვედრა ხვიჩა კვარაცხელიას დიდ იმედგაცრუებაშიც გადაიზარდა, როდესაც მატჩის საუკეთესო მოთამაშემ თერთმეტმეტრიანი დარტყმის გამოყენება ვერ შეძლო.
შეხვედრის დასრულების შემდეგ გულშემატკივრებმა „ნაპოლის“ წარუმატებლობის მიზეზების ძიება დაიწყეს. რა განსხვავებულ მოსაზრებას არ მოისმენდით, დაწყებული ლუჩანო სპალეტის დაბალი სამწვრთნელო კვალიფიკაციით, არბიტრის არაობიექტურობით და დასრულებული ხვიჩა კვარაცხელიას თამაშში დამდგარი კრიზისული პერიოდით.
სიმართლე კი ერთია. ყველა კლუბს სეზონის განმავლობაში ერთი სერიოზული ჩავარდნა გააჩნია, მნიშვნელობა არ არის საქმე მადრიდის „რეალსა“, „ბარსელონასთან“, „ბაიერნთან“ თუ „მანჩესტერ სიტისთან“ გვაქვს. იმისდა მიხედვით, თუ როგორი სიძლიერის მოთამაშეები გააჩნია, ესა თუ ის გუნდი ამ პერიოდს მეტნაკლები წარმატებით უმკლავდება. „ნაპოლი“ ე.წ. „გრანდების“ რიცხვს არასოდეს მიეკუთვნება. კი, დიეგო მარადონას დროს იტალიის პირველობა ორჯერ მოიგო, მაგრამ ეს წარმატება უფრო დიდი ფეხბურთელის გამონათების ბრალი უფრო იყო.
წლევანდელი „ნაპოლი“ უდაოდ იტალიის უპირველესი გუნდია, მაგრამ ძირითადი შემადგენლობის მოთამაშეები სათადარიგოებს ლამისაა ერთი თავით აღემატებიან. სეზონი გრძელია და ტრავმების ალბათობაც მაღალი. ნეაპოლურმა კლუბმა მიმდინარე სეზონში სასწაული უკვე მოახერხა და ნანატრ იტალიის ჩემპიონობას უახლოეს თამაშებში გაიფორმებს. ერთდროულად სამ სხვადასხვა ტურნირზე (იტალიის პირველობა, თასი, ჩემპიონთა ლიგა) ასპარეზობა კი მისთვის მძიმე ტვირთი აღმოჩნდა…
„ნაპოლის“ მთავარმა მწვრთნელმა ლუჩანო სპალეტიმ „მილანთან“ მატჩის (1:1) შემდეგ შემდეგი განცხადება გააკეთა:
„სანაკრებო პაუზამ რაღაც წაგვართვა, მანამდე სრულ მენტალურ და ფიზიკურ მდგომარეობაში ვიყავით. ამ მატჩების გამართვამდე კი ისეთ პირობებში აღმოვჩნდით, რომ ზოგიერთი ფეხბურთელი დაიღალა, ზოგიერთის გამოჯანმრთელების დაჩქარება მოგვიწია. დავმარცხდით იმის გამო, რომ ამ ორ შეხვედრაში ორი მცირე ჯარიმა არ ავიღეთ.
მსაჯი? პირველ მატჩში მსაჯობაზე ყველა შეთანხმდა მილანისტების გარდა. დღეს ლოზანოზე 37-ე წუთზე აშკარა პენალტი იყო. ამას ვიდეოზეც უყურეს და შეუძლებელია ეს ვერ დაინახო, ეს არ იყო კონტაქტი, არამედ დარტყმა იყო! ამ ორი მატჩიდან გამომდინარე გამოდის, რომ ჩემპიონთა ლიგაზე „მილანის“ ისტორიამ მსაჯებზე იმოქმედა“.
მსაჯობაზე განსხვავებული მოსაზრება გააჩნდა „მილანის“ მთავარ მწვრთნელ სტეფანო პიოლის:
„მირჩევნია ამ გამარჯვებით დავტკბე, ვიდრე ვიფიქრო ვის შევხვდებით, „ინტერს“ თუ „ბენფიკას“. ვინც იქნება, ნებისმიერ შემთხვევაში შესანიშნავი ნახევარფინალი იქნება. „ნაპოლი“ „სერია A“-ს დამსახურებულად მოიგებს და ჩვენ უფრო ვამაყობთ, რომ მათი დამარცხება მოვახერხეთ.
კალაბრიამ შესანიშნავად ითამაშა, თანაგუნდელებიც ძალიან დაეხმარნენ. ადვილი არ არის ისეთი ძლიერი ფეხბურთელის შეჩერება, როგორიც კვარაცხელიაა. ლოზანოზე პენალტი იყო? ყველა მატჩში არის მსაჯის გადაწყვეტილებები, რომელთა განხილვა შეიძლება. დღეს თამაში მსოფლიოს საუკეთესო მსაჯმა იმსაჯა“.
ვეტერანმა იტალიელმა ფეხბურთელმა ანტონო კასანომ ხვიჩა კვარაცხელიაზე ისაუბრა:
„ერთადერთი, ვინც რაღაც სცადა, არის კვარაცხელია. შთაბეჭდილება დამრჩა, რომ არ არცერთხელ ქართველი ორმაგი მეურვეობის გარეშე არ იყო. პიოლიმ იდეალურად იმუშავა და ბლოკავდა „აძურის“ თამაშის წყაროებს. „ნაპოლიმ“ კარგად ითამაშა, მან შექმნა მომენტები და ყველანაირად ცდილობდა გოლის გატანა, მაგრამ როგორც ვიერიმ თქვა, ჩემპიონთა ლიგა „მილანის“ სახლია“.
ხვიჩა კვარაცხელია დაიცვა მანდილოსანმაც, იტალიელმა ჟურნალისტმა ანა ტრიესტემ:
„ხელები შორს კვარაცხელიასგან! კარგი, მან პენალტი ვერ გაიტანა, მაგრამ თუ ამ საღამომდე მოვედით და რაღაცაზე ვიოცნებეთ, ეს უპირველეს ყოვლისა მისი დამსახურებაა“, – დაწერა ანამ სოციალურ ქსელში.
იტალიურმა მედიამ ხვიჩა კვარაცხელიას თამაში „მილანის“ წინააღმდეგ შემდეგნაირად შეაფასა.
Eurosport 4.5 ქულა: „მხრებზე „ნაპოლის“ მთელი სიმძიმე ჰქონდა. ის ცდილობდა, მაგრამ გალიის წინაშე აღმოჩნდა, რომლისგან თავის დახსნა ძნელი იყო. რასაკვირველია, ბოლოს გაცუდებული პენალტი საბოლოოდ კლავს დიდ ევროპულ ოცნებებს“.
Sportmediaset 4.5 ქულა: „კატასტროფის დარქმევა გაზვიადებულია იმის გათვალისწინებით, რომ მთელ თამაშს დრიბლინგებში ატარებს და ცდილობს საგოლე მომენტების შექმნას, მაგრამ საბოლოოდ ჯამში კი ისაა, რომ ბევრჯერ ვერ გადალახა კალაბრიას წინააღმდეგობა, როდესაც ამას ახერხებს, ფუჭად კარისკენ ურტყამს, როცა შეეძლო თანაგუნდელები მოეძებნა. საბოლოოდ კი პენალტი ვერ გაიტანა, რომელიც ვინ იცის, „ნაპოლის“ ბედს როგორ შეცვლიდა. მოკლედ, კატასტროფაა“.
Goal Italia 4.5 ქულა: „მყისიერად კარგად იწყებს, თავიდანვე ცდილობს თამაშის საკუთარ თავზე აღებას, მაგრამ კალაბრია მის წინააღმდეგ ზომებს იღებს. მეორე ტაიმის სტარტზე რამდენჯერმე სახიფათოა, თუმცა, გოლს ვერ იტანს. პენალტიდან მისი შეცდომა „მარადონას“ იმედს ყოველგვარ ნათელს უკარგავს“.
Calciomercato 5 ქულა: „ის არის ადამიანი, რომელიც ყველაზე მეტად ცდილობს, რომელიც ქმნის შანსებს. მეორე ტაიმის დასაწყისში ორი შესანიშნავი მოქმედება, მაგრამ კარის წინ სიზუსტის გარეშე. თუმცა, საბოლოო ჯამში ის არის ის, ვინც პენალტს აცუდებს, რომელსაც შეეძლო სხვა თამაშზე გვესაუბრა“.
Corriere Dello Sport 5 ქულა: „მილანის“ ორმაგი, სამმაგი და მეტი მეურვეობის მიუხედავად… ის სცდება. არა ყოველთვის, არა მისთვის დამახასიათებელი სიხშირით, მაგრამ სცდება. განსაკუთრებით მეორე ტაიმში ახერხებს გალიისგან თავის დაღწევას, როგორც მხოლოდ ის შეძლებდა, ჰქონდა მუხტი და აფხიზლებდა გუნდსაც. ბოლოს დანებდა, პენალტამდე… ამ შეცდომამ „ნაპოლი“ იმედი წაართვა და ვინ იცის, რა შეიძლებოდა მომხდარიყო“.
მაგრამ იყო განსხვავებული მოსაზრებაც. ვნახოთ, როგორ შეაფასა ანალიტიკურმა საიტმა „WhoScored“ ხვიჩას თამაში.
ქართველმა ფეხბურთელმა მანიოს კარისკენ 6-ჯერ დაარტყა (მატჩში საუკეთესო), აქედან 2 კარში წავიდა („ნაპოლიში“ საუკეთესო), გააკეთა 5 მნიშვნელოვანი პასი (პასი, რომელსაც კარში დარტყმა მოყვა) – ესეც მატჩში საუკეთესოა. ის ბურთს 98-ჯერ შეეხო (მატჩში საუკეთესო). 10 წარმატებული დრიბლინგი მიითვალა (ლეაოს, რომელიც მეორე იყო ამ ასპექტში 4 წარმატებული დრიბლინგი ჰქონდა, რამდენიც ხვიჩას მხოლოდ პირველ ტაიმში).
8.16 – ასეთი შეფასება მიიღო ხვიჩამ შეხვედრაში. ის ერთადერთი ფეხბურთელი იყო, რომელიც 8-ქულიან ზღვარს გადაცდა. 7.95 ჰქონდა რაფაელ ლეაოს, რომელმაც მართლაც ფანტასტიკურად ითამაშა. პორტუგალიელმა სულ მეასედი ქულით აჯობა „მილანის“ მეკარე მაიკ მანიოს. 7,78-ით მე-4 ადგილზე ალექს მერეტი გავიდა. 7.60 ჰქონდა ხვიჩას უშუალო ვიზავის დავიდე კალაბრიას, რომელიც თანაგუნდელთა დიდი დახმარებით ანეიტრალებდა კვარაცხელიას დაუსრულებელ რეიდებს.
„ნაპოლისა“ და „მილანის“ მატჩის შემდეგ მსაჯის მუშაობა ვეტერანმა არბიტრმა ლუკა მარელიმ შეაფასა:
„ლოზანოს წინააღმდეგ სუფთა პენალტი იყო. მოედნიდან შესაძლოა მსაჯი შეცდეს, ვერც ასისტენტი დაეხმაროს, რადგან არ ჰქონდეს მხედველობის კარგი არეალი, მაგრამ VAR სწორედ ამისთვისაა. საუბარი არ არის კონტაქტის ინტენსივობის შეფასებაზე, აშკარაა, რომ ლეაუმ ბურთი კუთხურზე გადააგდო, მაგრამ ამავდროულად აშკარაა, რომ ბურთის გადაგდებამდე ლოზანოს ფეხში ჩაარტყა, რომელიც წაიქცა. VAR უნდა ჩარეულიყო“, – განაცხადა ლუკა მარელიმ.
