“პრინცესას დღიურები” გრძელდება

ცნობილი გახდა, რომ მალე დღის სინათლეს „პრინცესას დღიურების“  მესამე ნაწილი იხილავს. „Disney“-მ გადაწყვიტა, მია თერმოპოლისის შესახებ მესამე ფილმიც გადაიღოს. სცენარზე მუშაობა უკვე დაიწყო, თუმცა ენ ჰეთეუეი ჯერჯერობით ოფიციალურად ჩართული არაა პროცესში. მიუხედავად ამისა, მსახიობმა საჯაროდ გამოხატა მხარდაჭერა ფილმის მიმართ, ამიტომ ყველა იმედოვნებს, რომ კვლავ იხილავენ პრინცესა მიას როლში.

2001 წელს გადაღებულ პრინცესას დღიურების პირველ ნაწილში ჰეთეუეი მორცხვი, დაბნეული ამერიკელი თინეიჯერის როლს ასრულებდა, რომელიც მოულოდნელად გაიგებს, რომ ევროპაში მდებარე ქვეყნის, ჟენოვიის, პრინცესა და ტახტის მემკვიდრეა. მართალია, ჟენოვია გამოგონილი სახელმწიფოა, მაგრამ ამას მაყურებლისთვის ხელი არ შეუშლია, დამტკბარიყო პრინცესასა და სამეფო კარის წევრების თავგადასავლებით.

ფილმი მეგ ქებოტის წიგნის მიხედვით გადაიღეს და ენთან ერთად მასში მონაწილეობდა ჯული ენდრიუსიც. პირველმა ფილმმა სტუდიას $165,3 მილიონი მოუტანა, ხოლო მისმა გაგრძელებამ „პრინცესას დღიურები: სამეფო ნიშნობა“ — $134,7 მილიონი.