ჩოხატაურში ნიკო ბერძენიშვილის სახელობის მხარეთმცოდნეობის მუზეუმის 65 წლის იუბილესთან დაკავშირებით ფერწერული და გრაფიკული ნამუშევრების მუდმივმოქმედი ექსპოზიცია გაიხსნა.
როგორც ა(ა)იპ არაფორმალური განათლების, კულტურისა და მემკვიდრეობის დაცვის ცენტრის დირექტორმა, მარი შოშაშვილმა განაცხადა, ექსპოზიცია ერთიანებს 80-ზე მეტი მხატვრის 120 ნამუშევარს.
“წარმოდგენილია 80-ზე მეტი მხატვრის, 5 თაობის მხატვრების 120-ზე მეტი ნამუშევრის გამოფენა. ეს არის ძალიან მნიშვნელოვანი პროექტი”,_ განაცხადა მარი შოშაშვილმა.
პროექტი ლევან ცუცქირიძის სახელობის ხელოვნების ფონდისა და ადგილობრივი თვითმმართველობის მხარდაჭერით განხორციელდა.
მამუკა ცუცქირიძე, ლევან ცუცქირიძის სახელობის ხელოვნების ფონდის დირექტორი ამბობს, რომ ჩოხატაურში არსებული სივრცე მთელი ქვეყნის მასშტაბით მეორეა, რომელიც მის მეგობარ მხატვრებთან ერთად შექმნა.
“ეს არის მეორე სივრცე ხარაგაულის მუზეუმის შემდეგ, რომელიც აქ ჩემს მეგობარ მხატვრებთან ერთად შევქმენი. ეს არის ედმუნდ კალანდაძის სახელობის ფერწერის კოლექცია, სამუზეუმო კოლექცია და დიმიტრი ერისთავის გრაფიკის სამუზეუმო კოლექცია. მჯერა, რომ ეს კოლექცია, რომელიც არის ამ სუპერთანამედროვე სივრცეში გამოფენილი, ერთვარი სინთეზი და პრეცენდენტია რეგიონებში ასეთი კულტურული კერების ცენტრების შექმნაში, ეს არის ძალიან მნიშვნელოვანი მოვლენა.”
მოწვეულ მხატვრებს ედმონდ კალანდაძის სახელობის ფერწერული და დიმიტრი ერისთავის სახელობის გრაფიკული სამუზეუმო კოლექციების შექმნაში შეტანილი წვლილისთვის მადლობის სიგელები გადაეცათ.
დაჯილდოებულ მხატვრებს შორის არიან ლადო თევდორაძე, ცირა კალანდაძე, ავთო თავართქილაძე, თამაზ დარჩია, ირაკლი ცინცაძე, გოგი ხახუტაშვილი, დავით პოპიაშვილი, მამუკა ტყეშელაშვილი, ქეთევან დავლიანიძე, თეონა ღლონტი, გურამ ღლონტი, ნინო ჯიშკარიანი, ოთარ ჯიშკარიანი, გურამ ხეცურიანი, გოგა თანდიშვილი, კახა დემურაძე, ირაკლი ჩოგოვაძე, ლუკა ბესელია, გურამ ფუტკარაძე, იოსებ აროშიძე, სერგო გოგოლაძე, მამუკა ცუცქირიძე, მზია კვინტრაძე, გიზო გიორგაძე.
აღსანიშნავია, რომ ამ 80 მხატვრის 120 ნამუშევარს შორის ბეგი მამალაძის ნახატი “დიდგორი” მოხვდა. სამწუხაროდ, ბეგი წლებია უკვე ცოცხალი აღარ არის, თუმცა ახალგაზრდა ბიჭის შემოქმედება და ნამუშევრები დროს უძლებს.
“ეს გამოფენა არის ეროვნული მეხსიერება და მისი მნიშვნელობა თითოეული ჩოხატაურელი ბავშვის გულამდე უნდა მივიდეს”,_ ამბობს მარიკა ზედელაშვილი, ბეგი მამალაძის დედა.
ავტორი
