“ხშირად მიწევს გავაკეთო არჩევანი _ მედიკამენტი თუ საჭმელი”

ჯერ კიდევ ოქტომბერში “ქართულმა ოცნების” საარჩევნო პროგრამის წარდგენისას, პრემიერ–მინისტრმა ირაკლი კობახიძემ თქვა:

“ეკონომიკური ზრდა გვაძლევს საშუალებას, რომ მომავალი წლისთვის არა ინდექსაციით გათვალისწინებულ 335/435 ლარამდე, არამედ 350/450 ლარამდე გაიზარდოს პენსიები. 2012 წლიდან სამჯერ არის გაზრდილი პენსია“.

ჰოდა, ფინანსთა სამინისტროს ინფორმაციით, “სამთავრობო პროგრამის შესაბამისად, 70 წლამდე ასაკის პირთა პენსია იზრდება 35 ლარით და 2025 წლის იანვრიდან განისაზღვრება 350 ლარით. 70 წლის და მეტი ასაკის პირთათვის პენსია ასევე იზრდება 35 ლარით და განისაზღვრება 450 ლარის ოდენობით; მაღალმთიან დასახლებებში მცხოვრები პენსიონერებისთვის, განსაზღვრული 20-პროცენტიანი დანამატების გათვალისწინებით, 70 წლამდე პირთა პენსია იქნება 420 ლარი, ხოლო 70 წლის და მეტი ასაკის პირთა პენსია _ 540 ლარი“.

იმის გათვალისწინებით, რომ საქართველოში ადამიანების შემოსავალი ძირითადად მხოლოდ სასიცოცხლო მოთხოვნილებების დაკმაყოფილებას ხმარდება, ყველაზე დიდი წილი კი სურსათზე იხარჯება და მოსახლეობას ნაკლები ფული რჩება თუნდაც ჯანმრთელობისთვის, “გურია ნიუსი” დაინტერესდა, რა შეფასებას აძლევენ ლანჩხუთელი პენსიონერები ზემოთ ნახსენებ სამთავრობო პროგრამას და როგორ აისახება მათ ჯიბეზე პენსიის 35 ლარიანი მატება.

მით უმეტეს, თუ იმასაც გავითვალისწინებთ, რომ საქართველოს სტატისტიკის ეროვნული სამსახურის მიერ სამ დეკემბერს გამოქვეყნებული მონაცემებით წლიური ინფლაცია 1,3% იყო, წინა თვესთან შედარებით კი სამომხმარებლო ფასები 0,7%-ით გაიზარდა.

მათივე ცნობით, საბაზო ინფლაციამ კი 2024 წლის ნოემბერში, გასული წლის შესაბამის პერიოდთან შედარებით 1.6 პროცენტი შეადგინა, ხოლო თამბაქოს გარეშე წლიური საბაზო ინფლაციის მაჩვენებელი ასევე 1.6 პროცენტით განისაზღვრა.

“ყოველთვიური ინფლაციის მაჩვენებლის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე:

სურსათი და უალკოჰოლო სასმელები: ჯგუფში ფასები გაიზარდა 2.2 პროცენტით, რაც თვის ინფლაციაზე 0.74 პროცენტული პუნქტით აისახა. ფასები მომატებულია ქვეჯგუფებზე: ბოსტნეული და ბაღჩეული (17.9 პროცენტი), შაქარი, ჯემი და სხვა ტკბილეული (3.4 პროცენტი), ზეთი და ცხიმი (3.3 პროცენტი), თევზეული (2.6 პროცენტი), მინერალური და წყაროს წყალი, უალკოჰოლო სასმელები და ნატურალური წვენები (1.9 პროცენტი), რძე, ყველი და კვერცხი (1.0 პროცენტი), პური და პურპროდუქტები (0.7 პროცენტი). ამასთან, ფასები შემცირდა შემდეგ ქვეჯგუფებზე: ხილი და ყურძენი (-3.6 პროცენტი), ყავა, ჩაი და კაკაო (-1.2 პროცენტი), ხორცი და ხორცის პროდუქტები (-0.4 პროცენტი);

ჯანმრთელობის დაცვა: ჯგუფში ფასები მომატებულია 0.9 პროცენტით, რაც თვის ინფლაციაზე 0.09 პროცენტული პუნქტით აისახა. ფასები, ძირითადად, გაიზარდა სამედიცინო პროდუქციის, აპარატურის და მოწყობილობის (1.4 პროცენტი) და ამბულატორიული სამედიცინო მომსახურების (0.3 პროცენტი) ქვეჯგუფებზე”.

პენსიონერთა თქმით, გაძვირებული ცხოვრების ფონზე ხშირად უწევთ არჩევანი გააკეთონ წამალსა და საკვებს შორის. არც იმას მალავენ, რომ სასურველი საკვები პროდუქტის შეძენას, სიღარიბის გამო ვერ ახერხებენ და მხოლოდ იმით კმაყოფილდებიან, რასაც მათი ჯიბე გაწვდება.

ლამარა ფირცხალაიშვილი 72 წლის პენსიონერია, რომელიც მარტო ცხოვრობს და თვიდან თვემდე მხოლოდ პენსიით გააქვს თავი. იგი მიიჩნევს, რომ 35 დანამატი პენსიაზე ძალიან ცოტაა:

“ვისაც, ფული და შემოსავალი აქვს, ფასის მიუხედავად პროდუქტის ყიდვა არ უჭირს, ასეთები კი ძალიან ცოტაა. ფასები იზრდება, ცხოვრება კი, ყოველდღიურად უფრო და უფრო რთულდება. ადამიანებს საკვების შეძენა გვიჭირს. პენსიიდან 100 ლარი წამლებში ვხარჯავ, ზამთრის სეზონზე კომუნალური გადასახადიც საშუალოდ 100 ლარი გამომდის და დარჩენილი 215 ლარით მგონი ბაზარში ერთხელ წასვლას თუ მოვახერხებ. ხშირად მიწევს გავაკეთო არჩევანი _ მედიკამენტი თუ საჭმელი.

35 ლარი თუ გვემატება პენსიაზე, ნახონ მაღაზიაში, როგორ იზრდება პროდუქტზე ფასები“.

69 წლის რუსუდან ბერიძე შვილთან და შვილიშვილებთან ერთად ცხოვრობს და მარტო ცხოვრების პირობებში მხოლოდ პენსიით ვერ შეძლებდა თავის გატანას:

“ჩემი პენსიით მე კომუნალურ გადასახადს ვიხდი და რაც დარჩება ფქვილს, შაქარს და ზეთს თუ ვიყიდი, ნორმალურად კვებისთვის კი ეს პენსია ძალინ ცოტაა. 35 ლარიანი დანამატი დიდი ვერაფერი ხეირია, მინიმუმ გაორმაგდეს უნდა პენსია, რომ სასიცოცხლო მოთხოვნილების დაკმაყოფილება შეძლოს ადამიანმა“.