გურიაში თხილის სეზონი უკვე დასასრულს უახლოვდება. როგორც ვწერდით, წლევანდელი სეზონი თხილის ფასის მზარდი ტემპით დაიწყო და მოულოდნელად, თვენახევარში, ერთი კილოგრამი “გულშიშველას” ფასი ორი ლარი გახდა. მიმღები პუნქტებიდან თან ულტიმატუმიც მოაყოლეს _ რაც უნდა კარგი და ხარისხიანი იყოს, ფასი არ მოიმატებსო.
უარი თქვეს გატეხვის პრიმიტიულ, თუმცა, რამდენიმე წლის წინ დამკვიდრებულ მეთოდზე, როცა მეპატრონეს თანხას თხილის გულის ვარგისიანობის მიხედვით უხდიდნენ.
ამ ეგრეთწოდებულ სიახლეს, ამჯერად “ბერძნულას” ფასიც დაუმატეს, უფრო სწორად, ისიც “გულშიშველას” გზას გაუყენეს, მხოლოდ ერთლარიანი სხვაობით.
ახლა ოზურგეთში ერთ კილოგრამ “ბერძნულას”, გაუტეხავს, როგორი კარგიც უნდა იყოს, სამ ლარად იბარებენ.
_ თუ გინდა პატარძალს ჰგავდეს, გაუტეხავად სამ ლარს ვიხდით, _ამბობენ თხილის მიმღები ოპერატორები.
_ თათქარიძის დარეჯანს რომ ჰგავდეს, მაინც?
_ კი, მაინც, _ მწარე იუმორით კენწლავენ ერთმანეთს გურულები.
ორლარიანი “გულშიშველას” და სამლარიანი “ბერძნულას” ტანდემის მხარდამხარ, მილევად რეჟიმში მყოფი ერთი კილოგრამი ლეღვი ხუთი ლარი ღირს.
_ ადამიანო, გადევირიე, ამ გატყლარწულ ლეღვს ხუთ ლარს აფასებენ, თან ნაწვიმარია და თხილიც ორი ლარი?!!
ასეთ შეფასებას ყოველდღე მოისმენთ ახლა ოზურგეთის ქუჩებში.
მთავარი ისაა, რომ უკვე სამი წელია, თხილის პროგრამის ფარგლებში მილიონები იხარჯება; მაგალითად, 2025 წელს 22 მილიონი ლარი იყო გამოყოფილი, თუმცა, თხილის, როგორც მცენარის მდგომარეობა და ხარისხი, როგორც პროდუქტისა, არ უმჯობესდება _ პირიქით, იმის თქმაც შეიძლება, რომ უარესობა სახეზეა.
ავტორი
