უფრო მკაცრი უნდა იყოს ჩვენი ხელისუფლება და ინსტიტუტები საქართველოს იმ მოქალაქეების მიმართ, რომლებიც საკუთარი სახელმწიფოს წინააღმდეგ მოქმედებენ და გადაუმოწმებელ, დაუდასტურებელ ინფორმაციას მტკიცებით ფორმაში აწვდიან უცხო ქვეყნებს, – ასე უპასუხა მიხეილ ყაველაშვილმა ჟურნალისტის კითხვას თინა ხიდაშელის მიერ სახელმწიფო დეპარტამენტისთვის გაგზავნილ დოკუმენტთან დაკავშირებით, სადაც ის ამტკიცებს, რომ საქართველოს ხელისუფლება ირანულ კომპანიებს სანქციებისგან თავის არიდებაში ეხმარება.
როგორც ყაველაშვილმა აღნიშნა, სახელმწიფო უნდა იდგეს თავის მოწოდების სიმაღლეზე და ყველა მსგავს ქმედებას გაეცეს პასუხი.
„რა თქმა უნდა ეს გამოძიების საგანია და ამ ადამიანების სამართლებრივი პასუხისმგებლობა უნდა დადგეს. რამდენნი იყვნენ ამ რადიკალური ფრთის წარმომადგენლები, როგორ ამუნათებდნენ საკუთარ ქვეყანას, თითქოს აქ რაღაც შავი ხვრელები იყო, რომ ჩვენი საშუალებით რაღაც მიეწოდებოდა ჩრდილოელ მეზობელს და ა.შ. შემდეგ ევროკავშირის, ბრიტანეთის და ამერიკის შეერთებული შტატების წარმომადგენლები ჩამოსული იყვნენ, ეს ყველაფერი უარყვეს და პირიქით, შეაქეს საქართველოს სახელმწიფო, რომ ძალიან გამჭვირვალედ მუშაობდა ამ პროცესში.
ეს ადამიანები საკუთარ ხელისუფლებას, საკუთარ სახელმწიფოს ადანაშაულებენ სხვა ქვეყანაში, სხვა ქვეყნის ტელევიზიებით. აუცილებელია, რომ ამ ადამიანების სამართლებრივი პასუხისმგებლობა დადგეს, რომ არ ჰქონდეთ უფლება, დეზინფორმაციით იმოქმედონ საკუთარი სახელმწიფოს წინააღმდეგ და შეცდომაში შეიყვანონ საერთაშორისო საზოგადოება მოარული ხმებით.
ეს ხომ ვიცით რატომ ხდება – ვერ დაამტკიცეს, რომ ჩვენ რაიმე სახით ვართ დაკავშირებული რუსეთის ხელისუფლებასთან, ვერ დაამტკიცეს, რომ არჩევნები გაყალბდა, ვერ დაამტკიცეს, რომ რაიმე სახით ჩვენ რაღაცა შავი ხვრელები გვაქვს და ასე შემდეგ. ჩვენი საზოგადოების დიდი ნაწილი გათვითცნობიერებულია ამ ყველაფერში, მაგრამ სახელმწიფო თავის მოწოდების სიმაღლეზე უნდა იდგეს და გასცეს პასუხი ყველა ამდაგვარ მოვლენას”, – განაცხადა მიხეილ ყაველაშვილმა.
