ოზურგეთის მუნიციპალიტეტის საკრებულოს 2019 წლის ბოლო სხდომაზე, მთავარი საფინანსო დოკუმენტის ირგვლივ სასაუბროდ სიტყვით გამოვიდა სივრცით ტერიტორიული დაგეგმარების და ინფრასტრუქტურის კომისიის თავმჯდომარე, დეპუტატი ლავრენტი ბიგვავა. მან კრიტიკის ქარცეცხლში გაატარა ოზურგეთის მუნიციპალიტეტის 2020 წლის ბიუჯეტი.
ლავრენტი ბიგვავამ დააკონკრეტა, რომ ყველა ის კითხვა, რომელიც განხილვის პროცესში დაისვა, მერიის მიერ პასუხგაუცემელია, შენიშვნები არ არის გათვალისწინებული და აღნიშნა ისიც, რომ სხდომიდან ნაადრევად გასული ოზურგეთის მუნიციპალიტეტის მერი, კონსტანტინე შარაშენიძე, კარგი იქნებოდა, ბოლომდე დარჩენილიყო, რადგან მასთან კითხვები ჰქონდა.
_ კითხვები მქონდა მერთან… ბიუჯეტის დამტკიცება არ არის მხოლოდ პრიორიტეტებს შორის ფასების განაწილება და, ვთქვათ, მოცულობითი განსაზღვრა: ამას _ იმდენი, იმას _ ამდენი… ბიუჯეტი უნდა იყოს გამჭვირვალე! მით უფრო, როცა ეს არ არის პროგრამული ბიუჯეტი. მეთოდოლოგია, რომელსაც თქვენ იცნობთ, სრულიად სხვა მოთხოვნებს უყენებს ბიუჯეტს. რატომ უყენებს? იმიტომ კი არა, რომ ვიღაცას მხოლოდ მოსაზრებები ჰქონდეს… _ თქვა ლავრენტი ბიგვავამ და დეპუტატებს და მერიის წარმომადგენლებს განუცხადა, რომ არსებობს მუხლები, სადაც ღიად იკვეთება დიდი ბუნდოვანება, რაც საკმაოდ სოლიდურ თანხებთან არის დაკავშირებული. მისივე თქმით, სწორედ აქ არის საჭირო გამჭვირვალობა და უნდა მიეჩვიონ იმას, რომ როცა პროგრამულ ბიუჯეტზე საუბრობენ, იცოდნენ, რა უნდა მოითხოვონ.
_ მე ეს სულ არ მჭირდება. მე ვიცი ჩემი როლი და ადგილი, რა უნდა ვაკეთო! ეს მერიას ჭირდება! შენიშვნების ის ნაწილი, რომელიც ჩვენ დავდეთ, არც დანართშია მოცემული, არც პირველ და არც მეორე ვარიანტში! დღეს აქ არც ერთ კითხვაზე პასუხი არ გაცემულა. მართალია, ეს ბიუჯეტი ჯობს წინას, მაგრამ რატომ უნდა დარჩეს ისეთი კითხვები, რომელიც ეჭვს იწვევს? _ იკითხა ბიგვავამ და კიდევ ერთხელ გაუსვა ხაზის ბიუჯეტის გაუმჭვირვალობას, თან მაგალითების მოხმობას შეუდგა:
_ როგორ გავიგო სოფლის შიდა გზებზე ასფალტ-ბეტონის და ბეტონის მოწყობა? როგორც გავიკითხე, ეს თურმე მოხრეშვითი სამუშაოები ყოფილა. თუ მოხრეშვაა, მოხრეშვა უნდა იყოს მითითებული. შეიძლება, აქ ბევრი აყენებს საკითხს, რომ ეს გვინდა, ის გვინდაო, მაგრამ რატომ არ არის ეს გაშიფრული? პრობლემაა რაიმე? _ იკითხა მან და მეორე “საოცრებაზე” გადავიდა:
_ ახლა ავიღოთ მეორე საკითხი _ “შიდა გზების მოვლა-შენახვა და გასწორხაზოვნება”! საოცარია პირდაპირ! მე ძალიან გამიჭირდა ამ კვანძის გახსნა. რას ნიშნავს ეს გასწორხაზოვნება?! მე არ ვარ ინჟინერი, მაგრამ გამიგია მდინარის კალაპოტის გასწორხაზოვნება. მერე ძლივს მივხვდი, რომ ეს მდინარის კალაპოტის რეგულაციაა. 700 ათასი ლარის ღირებულების სამუშაოებია შიდა გზების ე. წ. მოვლა-შენახვა გასწორხაზოვნებისთვის. არის თუ არა ეს ბიუჯეტის გაუმჭვირვალობის ერთ-ერთი ძირითადი ფაქტორი? დიახ, არის!
ლავრენტი ბიგვავამ არაერთხელ გაიმეორა, რომ ამ ყველაფრის ირგვლივ, ბიუჯეტის პროექტის განხილვის დროს, არა ერთი შენიშვნა ჰქონდათ და მერიას ეს არ გაუთვალისწინებია.
ლავრენტი ბიგვავამ, ასევე, ისაუბრა დასუფთავებისა და გარემოს დაცვის მიზნით, რა როგორ არის ბიუჯეტში გათვალისწინებული.
_ კითხვა დავსვი _ დასუფთავებული ტერიტორია კი არა, მუნიციპალიტეტში რამდენია დასასუფთავებელი ფართობი?! ეს არის აქ მთავარი და არა ის, რომ რამდენს ასუფთავებ დღეს! ძალიან მნიშვნელოვანი მაჩვენებელია ეს. ეს უნდა ვისწავლოთ არა ფართობში, არამედ მოცულობით სიდიდეში! არის ეს ბიუჯეტის გაუმჭვირვალობა? დიახ, არის!
ლავრენტი ბიგვავამ მიმართა საფინანსო სამსახურის უფროსს, გია მამაკაიშვილს:
_ სხვა თემებიც არის, ბატონო გია, რომელზეც ინდიკატორი უნდა გამოიყვანო! ძალიან მარტივია ეს. ამიტომ მინდა ვთქვა, რომ ეს ან ნაჩქარევად გამოყვანილია, ან უყურადღებობის ბრალი, ან…ან… არ მინდა სხვა სიტყვა ვიხმარო! _ კვლავ მკაცრად გამოხატა თავისი აზრი საფინანსო-საბიუჯეტო კომისიის თავმჯდომარემ.
რაც შეეხება სოფლის მხარდასაჭერ პროგრამებს, ამ მიმართულებით მუშაობა, ლავრენტი ბიგვავამ, რომ იტყვიან, მიწასთან გაასწორა. მან ყოვლად უარგუმენტო უწოდა იმ გადაწყვეტილებას, რომ ეს პროგრამები, თურმე, 2020 წელს უნდა იქნეს დადგენილი.
_ ნახეთ, რამხელა შეუსაბამობაა. გვაქვს საშუალო ვადიან პერსპექტივაში სამწლიანი პროგრამა. თუ ჩვენ ერთ წელზე ვართ ორიენტირებული, მაშინ რატომ არის საჭირო საშუალოვადიანი პროგრამა? ვერ გავიგე ეს! ანუ, რა _ სოფლის მხარდასაჭერი პროგრამების გაწერა არ შეიძლება სამი წლის ვადით? რა თქმა უნდა, შეიძლება! წლების წინ მუშაობდა ერთი კაცი, არ დავასახელებ ახლა, და საკმაოდ კარგად. იყო ძალიან კარგად გაწერილი პროგრამა და არა მხოლოდ ინფრასტრუქტურულ ნაწილში. მე გაძლევთ პირობას, თვენახევარი დამიჯექით, რომ შევადგინოთ სამწლიანი პროგრამა და ამას შევძლებთ. საბიუჯეტო წელი იწყება 1 მარტს და დღეს გვეუბნებიან, რომ 2020 წელს ჩასატარებელი სამუშაოების კრებებს აწი ჩაატარებენ! ეს მაშინ, როცა 2020-ში 2021 წელს შესასრულებელ სამუშაოებს უნდა გეგმავდნენ. არის ეს ბიუჯეტის გაუმჭვირვალობის ერთ-ერთი ნიშანი? არის! _ თქვა ბიგვავამ და დაამატა, კიდევ ბევრია სათქმელი, მაგრამ ეს სამი არგუმენტი არის გაუმჭვირვალობის დიდი ფაქტორი და სრულიად საკმარისია იმისთვის, რომ ბიუჯეტის პროექტი არ იქნას დამტკიცებულიო.
მან, ასევე, დააზუსტა, რომ თუ მაინც შესთავაზებს კომისიას, რომ ეს ბიუჯეტი მიიღოს, მხოლოდ იმიტომ, რომ აქვს დადებითი მხარეებიც. კერძოდ, ადგილობრივი შემოსავლები ანუ საკუთარი შემოსავლები მნიშვნელოვნად არის გაზრდილი:
_ ეს მაჩვენებელი 42% არასდროს ყოფილა _ 25-27%-ს არ შორდებოდა და ეს არის ძალიან კარგი. ბიუჯეტის პრიორიტეტების ნაწილიც ძალზე სრულყოფილად არის წარმოდგენილი. მაგრამ ის არგუმენტი, რომ რაღაც მიმართულებით კარგად იმუშავეთ და ის მნიშვნელოვანი ნაწილი, რაზეც აქ მქონდა საუბარი, ყურადღების მიღმა დატოვეთ. ეს არის მეტისმეტი! _ მიმართა მან საფინანსო -საბიუჯეტო სამსახურის უფროსს, გია მამაკაიშვილს. ამავდროულად დეპუტატებს შეახსენა, რომ საკრებულოს წევრმა ნაბიჯი არ უნდა გადადგას ისე, თუ საკუთარი უფლება-მოვალეობა კარგად არ აქვს გაცნობიერებული.
უეჭველია, დეპუტატ ლავრენტი ბიგვავას საკმაოდ მკაცრი და არგუმენტირებული გამოსვლა იმ ბიუჯეტის გაუმჭვირვალობის შესახებ, რომელიც უკვე დამტკიცებულია, შესაძლოა, კვლავ გახდეს მიზეზი იმისა, რომ ბიუჯეტში მნიშვნელოვანი ცვლილებები შევიდეს. ეს მოხდება ახლა, წლის დასაწყისში, როცა ნაშთები გადაანგარიშდება და საკრებულოზე უნდა შემოვიდეს ბიუჯეტის ცვლილების პროექტი, რაც კანონმდებლობით პროცედურულად არის განსაზღვრული. წინა წლიდან გადმოსული ნაშთების გადაანგარიშება-განაწილების პარალელურად, უნდა მოხდეს იმ გაუმჭვირვალე საკითხების გათვალისწინება, რაზეც ფაქტებით ისაუბრა დეპუტატმა.
ძნელი მისახვედრი არაა, რატომ შეახსენა ბიგვავამ დეპუტატებს საკუთარი უფლება-მოვალეობები _ დეპუტატებს, რომლებიც საკმაოდ კარგად გრძნობენ თავს ამ ღიად დასანახი გაუმჭვირვალობის დროს და უბრალო კრიტიკული შენიშვნისთვისაც კი, თითო-ოროლას გარდა, თავს არავინ იწუხებს.
საფინანსო-საბიუჯეტო სამსახურის უფროსმა, გია მამაკაიშვილმა “გურია ნიუსთან” მოკლე კომენტარი გააკეთა:
_ ჩვენ გავითვალისწინებთ მხოლოდ იმას, რაც არის გასათვალისწინებელი.
