საკანონმდებლო ორგანოდან კანაფის კულტივაციის შესახებ კანონპროექტის გაწვევის შემდეგ, მმართველი პარტია, საპრეზიდენტო არჩევნების მეორე ტურამდე, კიდევ ერთ პოლიტიკურ კომპრომისზე წავიდა. სასამართლომ ყოფილ მთავარ პროკურორ ოთარ ფარცხალაძეს ბრალი ფარულად წაუყენა და 5 000-ლარიანი გირაო შეუფარდა.
საქმე ეხება 2017 წლის მაისში მომხდარ შემთხვევას, როდესაც ყოფილი მთავარი პროკურორი ოთარ ფარცხალაძე ყოფილ მთავარ აუდიტორ ლაშა თორდიას კლუბ „ელცენტროში“ თავს დაესხა. მთავარ საგამოძიებო უწყებას ამ საქმეში ოთარ ფარცხალაძის ბრალეულობის დამადასტურებელი მასალები დიდი ხნით ადრე ჰქონდა, თუმცა განაჩენის გამოტანა მხოლოდ ახლა, წინასაარჩევნოდ გახდა საჭირო.
საპრეზიდენტო არჩევნების მეორე ტურამდე ქართული მართლმსაჯულების მხრიდან ფარცხალაძესთვის ბრალის წაყენებას „ქართული ოცნების“ პიარ კამპანიად აფასებს პოლიტიკის ექსპერტი ვახტანგ ძაბირაძე. როგორც პოლიტოლოგი აღნიშნავს, „ქართული ოცნება“ აღნიშნული ქმედებით ამომრჩევლის გულის მოგების ნაცვლად, საკუთარ პარტიას აზიანებს.
„საპრეზიდენტო არჩევნების პირველი ტურის შემდეგ, „ქართული ოცენება“ ამომრჩევლის გულის მოგებას ცდილობს, თუმცა ოთარ ფარცხალაძისთვის ბრალის წაყენება არ არის გამოსავალი, ეს არის პიარკამპნია, რომელიც ხელისუფელბას არა თუ რაიმე სახის სარგებელს შესძენს, არამედ კიდევ უფრო დაზარალებს.
მმართველი პარტია გადაწყვეტილების მიღებისას შედარებით ფრთხილი და მოზომილი უნდა იყოს. მეორე ტურის შემდეგ „ქართულ ოცნებას“ პიარი ისე უნდა დაეგეგმა, რომ ამომრჩეველს მათი სისუსტე არ დაენახა. ახლა კი ყველაფერი სააშკარაოზე გამოიტანეს და დამატებით, სხვადასხვა საქმესთან დაკავშირებით კითხვები გააჩინეს. სად იყო ამ დრომდე მართლმსაჯულება?! „ქართული ოცნება“ საკუთარი ხელით ინადგურებს იმ რეპუტაციას, რომელიც ამ დრომდე აქვს შემორჩენილი“, _ აღნიშნა ძაბირაძემ.
ოთარ ფარცხალაძის ბრალდებულად ცნობის შემდეგ, მთვარმა პროკურატურამ ყოფილი აუდიტორი ლაშა თორდია დაზარალებულად ცნო.
ოთარ ფარცხალაძე მთავარი პროკურორის რანგში 2013 წლის 7 ნოემბერს გამოჩნდა. ამა წლის 30 დეკემბერს კი თანამდებობის დატოვება მოუწია, რაც, სავარაუდოდ, მის შესახებ სკანდალური ფაქტების გასაჯაროებას, კერძოდ, დიპლომის გაყალბებასა და გერმანიაში მის ნასამართლეობას უკავშირდება.
მთავარ პროკურორად ყოფნის პერიოდში ოთარ ფარცხალაძის მიმართ არაერთი ბრალდება ისმოდა. მათ შორის, საპატიმროში მყოფი ვანო მერაბიშვილი ოთარ ფარცხალაძეს საკნიდან გაყვანისთვის და ექსპრეზიდენტ სააკაშვილის ფინანსური საქმიანობის შესახებ ჩვენების მიცემის იძულებისთვის სდებდა ბრალს.
ამ საქმეზე გამოძიება 2016 წელს დაიწყო, მაგრამ ფაქტის დაუდასტურებლობის გამო, 2017 წლის თებერვალში გამოძიება შეწყდა. ამის შემდეგ საქმე სტრასბურგის სასამართლომ განიხილა და შემთხვევის არასათანადოდ გამოძიება დაადგინა.
2018 წელს ოთარ ფარცხალაძის სახელი და გვარი ფარულ ჩანაწერებშიც გამოჩნდა, რაც სპორტის ყოფილი მინისტრის, ლევან ყიფიანის სარდაფში შესაძლო ჩაკეტვასა და მისი ცემის ფაქტს უკავშირდება. ამასთან, “ომეგა ჯგუფის” მფლობელი, ბიზნესმენი ზაზა ოქუაშვილი ოთარ ფარცხალაძეს, ბიძინა ივანიშვილის სახელით, 4 მილიონი ლარისა და სიგარეტის ბიზნესიდან წილის მიღების მოთხოვნაში ადანაშაულებს.
აღსანიშნავია, რომ მთავარ პროკურორად დანიშვნის შემდეგ, ოთარ ფარცხალაძის ქონება საგრძნობლად გაიზარდა.
ფარცხალაძის ადვოკატის, გაგი მოსიაშვილის განცხადებით, უკვე 5 წელია ოთარ ფარცხალაძე ბიზნესშია ჩართული. მოსიაშვილის თქმით, მისი შემოსავლის მთავარი წყარო ქართულ-ებრაული კომპანია Elbit-ის ბიზნესპროექტია, რასაც კომპანიის მფლობელი „საპარტნიორო ფონდი“ არ ადასტურებს.
დღეს ცნობილი გახდა, რომ მთვარ პროკურატურში ოთარ ფარცხალაძეს „ომეგა ჯგუფის“ საქმესთან დაკავშირებით გამოკითხავენ.
