ოზურგეთის მუნიციპალიტეტის გამგეობასა და შპს “ვიგორას“ შორის დავამ, შესაძლოა, სასამართლოში გადაინაცვლოს. აღნიშნულმა შპს-მ ოზურგეთის მუნიციპალიტეტში, სოფელ ოზურგეთისა და სოფელ ცხემლისხიდის ადმინისტრაციულ ერთეულებში საბავშვო ბაღი ააშენა. ოფიციალური ინფორმაციით, ორივე სოფელში ბაღის მშენებლობა აღნიშნულმა კომპანიამ ხელშეკრულებით განსაზღვრული ვადების დარღვევით შეასრულა და მას მუნიციპალიტეტის მიერ ჯარიმის გადახდა 61 213 ლარი და 50 თეთრით დაეკისრა.
მუნიციპალიტეტს კი შპს “ვიგორას“ მიმართ, საბოლოო ანგარიში 75 708, 42 ლარი აქვს გასასწორებელი, თუმცა, როგორც ოფიციალურ დოკუმენტშია აღნიშნული, თუ შპს ჯარიმას 20 დღეში არ გადაიხდის, მუნიციპალიტეტი მას საბოლოო ანგარიშს არ გაუსწორებს.
ოფიციალური დოკუმენტების საფუძველზე, “ოზურგეთის მუნიციპალიტეტის გამგებლის მერაბ ჭანუყვაძის და შპს “ვიგორას“ დირექტორის რამინ შავაძის, წარმოდგენილ მინდობილ პირს ამირან მამალაძეს შორის, ელექტრონული ტენდერის შესაბამისად, 2016 წლის 7 აპრილს გაფორმდა ხელშეკრულება. ხელშეკრულების თანახმად, აღნიშნულ კომპანიას ოზურგეთის მუნიციპალიტეტის სოფელ ოზურგეთში საბავშვო ბაღი უნდა აეშენებინა. ხელშეკრულების საერთო ღირებულება შეადგენდა 392334, 00 ლარს. ხელშეკრულების მიხედვით, შესყიდვის ბოლო ვადა იყო 2016 წლის 1 ნოემბრამდე”.
2017 წლის 23 თებერვალს ინფრასტრუქტურის სამსახურის უფროსი გოჩა აბაშმაძე მოხსენებითი ბარათით მიმართავს გამგებლის მოადგილეს ბადრი გობრონიძეს:
“07 04 2016 წლის სახელმწიფო შესყიდვების #73 ხელშეკრულების შესაბამისად, შპს “ვიგორას“ მიერ წარმოდგენილია სოფელ ოზურგეთში საბავშვო ბაღის მშენებლობის სამუშაოს შესრულების საბოლოო აქტი (სამუშაოს ჩაბარების ვადების დარღვევით), ინსპექტირების დასკვნის თანახმად შესრულებული სამუშაოს მთლიანი ღირებულება განისაზღვრა 385041,14 ლარით. ასანაზღაურებელი თანხა შეადგენს 75 708, 42 ლარს.“.
ასევე, ოფიციალური დოკუმენტების თანახმად, 2016 წლის 27 ოქტომბერს ოზურგეთის მუნიციპალიტეტის გამგეობასა და მეორეს მხრივ, შპს “ვიგორას“ შორის გამარტივებული ელექტრონული ტენდერის პირობების შესაბამისად, გაფორმდა ხელშეკრულება #284. ხელშეკრულებაში აღნიშნულია, რომ შესყიდვის ობიექტი იყო სოფელ ცხემლისხიდში საბავშვო ბაღის მშენებლობა, რომლის ღირებულებაც შეადგენდა 398885,00 ლარს. შესყიდვის ობიექტის მიწოდების საბოლოო ვადა ხელშეკრულების გაფორმებიდან 2016 წლის 1 ივნისის ჩათვლით უნდა ყოფილიყო.
ამის შემდეგ ხდება ოფიციალური შეთანხმება მუნიციპალიტეტის გამგეობასა და შპს “ვიგორას“ შორის 2016 წლის 30 სექტემბერს:
“ერთის მხრივ, ოზურგეთის მუნიციპალიტეტის წარმომადგენლის გამგებლის მერაბ ჭანუყვაძის სახით და მეორეს მხრივ, შპს “ვიგორას“ წარმომადგენელი დირექტორის რამინ შავაძის მინდობილი პირის, ამირან მამალაძის სახით, 2015 წლის 27 ოქტომბერს გაფორმებულ ხელშეკრულება #284 (სოფელ ცხემლისხიდში საბავშვო ბაღის მშენებლობა) მოხდეს შემდეგი ცვლილება _ “ხელშეკრულების მოქმედების ვადა განისაზღვროს 1 ნოემბრამდე“.
2017 წლის 27 თებერვალს #1293 ბრძანებით, ოზურგეთის მუნიციპალიტეტის გამგებლის მოადგილე ბადრი გობრონიძე ოფიციალური წერილით მიმართავს შპს “ვიგორას“ დირექტორს რამინ შავაძეს:
“ოზურგეთის მუნიციპალიტეტსა და თქვენ შორის 2015 წლის 27 ოქტომბერს გაფორმებული სახელმწიფო შესყიდვების შესახებ #284 ხელშეკრულების თანახმად, თქვენ აწარმოებდით ცხემლისხიდის ადმინისტრაციულ ერთეულში ახალი საბავშვო ბაღის მშენებლობას. ხელშეკრულებით გათვალისწინებული შესყიდვის ობიექტის მიწოდების ვადების დარღვევისთვის დაგეკისრათ პირგასამტეხლო, ხელშეკრულების საერთო ღირებულების 0.1%, სულ თანხით 59 994 ლარი.
ასევე, ოზურგეთის მუნიციპალიტეტსა და თქვენ შორის 2016 წლის 7 აპრილს გაფორმებული #73 ხელშეკრულების თანახმად, თქვენ აწარმოებდით სოფელ ოზურგეთის ადმინისტრაციულ ერთეულში ახალი საბავშვო ბაღის მშენებლობას. ხელშეკრულებით გათვალისიწინებული შესყიდვის ობიექტის მიწოდების ვადების და ვალდებულების დარღვევისთვის დაგეკისრათ პირგასამტეხლო, სულ თანხით _ 1 218 ლარი და 68 თეთრი.
თქვენ ოზურგეთის მუნიციპალიტეტის წინაშე, აღნიშნული ხელშეკრულებებით (#284 და #73) გათვალისწინებული დარღვევისათვის გადასახდელი გაქვთ პირგასამტეხლო სულ _ 61 213 ლარი და 50 თეთრი.
გთხოვთ, 20 კალენდარული დღის ვადაში უზრუნველყოთ ოზურგეთის მუნიციპალიტეტის წინაშე არსებული დავალიანების გადახდა. წინააღმდეგ შემთხვევაში, ოზურგეთის მუნიციპალიტეტის გამგეობა მოკლებულია შესაძლებლობებს, მოახდინოს 7.04.2016 წლის #73 ხელშეკრულებით განსაზღვრული სამუშაოების საბოლოო ანგარიშსწორება _ 75 708, 42 ათ.ლარის“, _ აღნიშნულ წერილს ხელს წერს ოზურგეთის მუნიციპალიტეტის გამგებლის მოადგილე ბადრი გობრონიძე.
სოფელ ოზურგეთში საბავშვო ბაღი გახსნილია და ფუნქციონირებს, ხოლო სოფელ ცხემლისხიდში კი ბაღი ჯერ კიდევ არ გახსნილა.
“გურია ნიუსი“ შეეცადა, კომენტარები მოეპოვებინა გამგეობის წარმომადგენლისა და შპს “ვიგორას“ დირექტორისგან. გამგებლის მოადგილემ ბადრი გობრონიძემ, რომელიც უშუალოდ ხელმძღვანელობს ინფრასტრუქტურულ სამუშაოებს ოზურგეთის მუნიციპალიტეტში, კომენტარის გაკეთებაზე უარი განაცხადა:
“თქვენ გამოითხოვეთ საჯარო ინფორმაცია. მიიღეთ ოფიციალური წერილი, მაქ ყველაფერია აღნიშნული, სხვა კომენტარის გაკეთება არაა საჭირო“, _ გვითხრა გობრონიძემ.
შპს “ვიგორას“ დირექტორმა რამინ შავაძემ კი “გურია ნიუსთან“ საუბრისას აღნიშნა, რომ ის არაკანონიერად დააჯარიმეს და დავას სასამართლოში განაგრძნობს:
“ჩვენმა კომპანიამ ვალდებულებები შეასრულა, ოღონდ დაგვიანებით. ეს არის პრევენციული ღონისძიება, დაგვიანებისთვის უნდა გადავიხადოთ პირგასამტეხლო, ჯერ არ გადაგვიხდია, არ შეიძლება მეწარმეს ხუთი დღე დააგვიანდეს? ამით ქვეყანა იქცევა? მე ამით რაიმე ზიანი კი არ მიმიყენებია. უბრალოდ, პირგასამტეხლო არ შეიძლება გასცდეს პრევენციის ხასიათს, ან ჯარიმა ხომ არ შეიძლება იყოს უსასრულოდ დიდი? როგორ შეიძლება 400 000 ლარად ავაშენო ბაღი და დამაჯარიმო 60 000 ლარით? მერე რა, რომ დავაგვიანე, ამით არავინ დაზარალებულა. იმ ბაღში დღესაც არ შეუყვანიათ ბავშვები, როცა მე ჯერ კიდევ ნოემბერში ჩავაბარე პროექტი, არ ეჩქარებოდათ. კი, ბატონო, დამაგვიანდა, მაგრამ იყო რაღაც გარკვეული პრობლემები, ოზურგეთიდან მყავდა წარმომადგენლები, რომლებმაც არ იმუშავეს კარგად, ცუდად იმუშავეს, მაგრამ ეს არ ნიშნავს იმას, რომ 60 000 ლარით დამაჯარიმო. დღეში 400 ლარით მაჯარიმებდნენ, ეს არ არის სამართლიანი, მაგრამ ამას სასამართლო გადაწყვეტს. რა თქმა უნდა, გააუქმებს ამ გადაწყვეტილებას დამოუკიდებელი სასამართლო და რასაც მომისჯის იმას გადავიხდი, მე ხაზს ვუსვამ, იმას, რომ ეს ჯარიმა განუზომლად დიდია, შესყიდვების სააგენტოს აქვს რეკომენდაციები, არ შეიძლება გასცდეს პრევენციას და ჯარიმა არ უნდა გახდეს გამგეობის გამდიდრების საშუალება. როგორ შეიძლება 60 000 ლარით დააჯარიმო კომპანია, რომელმაც დააგვიანა რამდენიმე დღე და ამ დროს, შენ არსად გეჩქარებოდა?! გამგეობა ხელფასს ზუსტად ჩვენი გადასახადებისგან იხდის, მუშები, მეწარმეები, ეს არასამართლიანია. თუ მეორე ბაღზე დამაჯარიმეს 1 500 ლარით, აქ რატომ შეიცვალა სიტუაცია? შეიცვალა პოლიტიკა? აბა, ასე როგორ შეიძლება? ამიტომ სასამართლო დაადგენს კანონიერებას. სოფელ ოზურგეთის შემთხვევაში ჯარიმა 30 ლარი იყო დღეში, შეიძლება ასეთი სხვაობა?
_ ბატონო რამინ, თქვენ აღნიშნეთ, რომ ოზურგეთში გყავდათ წარმომადგენლები, რომლებმაც არ იმუშავეს კარგად და დაგვიანება მათი ბრალია, დაგვისახელეთ აღნიშნული პიროვნებები…
_ ყველამ იცისნ ვინც იყო და ვინც მუშაობდა. რა საჭიროა სახელი და გვარები. წავიდნენ ისინი და წაიღეს მთლიანი თანხა და გაქრნენ. არ გამოვა ეს საუბარი. მე უნდა გითხრათ მათ შესახებ, მერე თქვენ ისინი გეტყვით ჩემს შესახებ. არ იქნება ლამაზი, რომ გაზეთის საშუალებით ვილაპარაკო და ვარჩიო მათთან საქმე, ეს არასწორია, ეს უნდა გაირკვევს სასამართლოში, გვექნება ამ საქმეზე სასამართლო დავა და იქ გაირჩევა მტყუან-მართალი. ეს არის ჩემი პრობლემა!
გეტყვით ერთსაც _ აბა, დაინტერესდით, რატომ არ მირიცხავს გამგეობა დარჩენილ 80 ათას ლარს. მოსაცემი აქვთ, წარმოგიდგენიათ? ბაღი გაიხსნა, ბავშვები შევიდნენ, ფუნქციონირებს და დარჩენილ ფულს არ მიხდიან. იცით, რას მეუბნებიან? ჯერ ჯარიმა გადაიხადეო. აი, ამიტომ მივალ სასამართლოში. თუ ჯარიმას არ გადაიხდით, იმ ძველ თანხას არ მოგცემთო. კიდევ ერთხელ გეუბნებით, ეს არ არის სატელეფონო საუბარში გასარკვევი, აუცილებლად შევხვდებით ოზურგეთის სასამართლოში! “_ ამბობს რამინ შავაძე.
ოზურგეთის მუნიციპალიტეტში ჭანიეთის, წვერმაღალის, სოფელ ოზურგეთის, ცხემლისხიდისა და ბახვის ტერიტორიულ ერთეულებში 5 ახალი საბავშვო ბაღი აშენდა. ჭანიეთის, სოფელ ოზურგეთის, ცხემლისხიდისა და ბახვის საბავშვო ბაღების მშენებლობა დაფინანსდა რეგიონებში გასახორციელებელი პროექტების ფონდიდან.
