მიუხედავად იმისა, რომ ივლისში გურიის რეგიონში მავნებელ _ აზიურ ფაროსანას წინააღმდეგ ღონისძიება გატარდა და ძირითადად თხილის პლანტაციები შეიწამლა, მავნებლის წინააღმდეგ ამან არსებითად ვერ იმოქმედა და ამჯერად ის სიმინდის ყანებზე გადავიდა.
როგორც ცნობილია, ფაროსანა ძირითადად სანაყოფე კვირტს ან ნაყოფს ეტანება. ამჯერად ცუდი მდგომარეობაა ლანჩხუთის მუნიციპალიტეტში.
როგორც სურსათის ეროვნული სააგენტოს გურიის რეგიონულ სამსახურში გვითხრეს, ლანჩხუთში უკვე დაიწყო საყანე ფართობების შეწამვლა, რათა მავნებლისგან იხსნან მოსავალი.
კითხვაზე, გახორციელდება თუ არა ოზურგეთის მუნიციპალიტეტის საყანე ფართობებში იგივე ღონისძიება, აღნიშნულ სამსახურში გვითხრეს, რომ ჯერ აქ ფერომონიანი საჭერები არ დადგმულა:
_ საკმაოდ ცუდი მდგომარეობაა _ მავნებელი სიმინდის ფართობებს მოედო და ახლა დაწყებულია შეწამვლა. ვერ გეტყვით როდის, მაგრამ ეტაპობრივად მოხდება ოზურგეთის მუნიციპალიტეტში გადმოსვლა და საყანე ფართობებში სიმინდის შეწამვლა, _ გვითხრა სპეციალისტმა მადონა ჩიტაიშვილმა.
