ბიზნესგარემოს გაუმჯობესებისა და გამარტივების მიმართულებით, საგადასახადო კანონმდებლობაში ცვლილებათა ახალი პაკეტი შემუშავდა.
აღნიშნული ცვლილებები, ქვეყანაში არსებული მაკროეკონომიკური მდგომარეობა, ასევე, დამატებული ღირებულების გადასახადის ზედმეტობის დაბრუნების ავტომატიზებული სისტემის დანერგვის შესახებ რეფორმა ფინანსთა მინისტრმა, მამუკა ბახტაძემ დამსაქმებელთა ასოციაციის წევრებს გააცნო.
“კანონპროექტი ითვალისწინებს კაპიტალის ბაზრის განვითარების ხელშეწყობას, ევროკავშირთან გაფორმებული ასოცირების შესახებ შეთანხმების ფარგლებში საქართველოს მიერ აღებული ვალდებულებების შესრულებას და გადამხდელთა დაბეგვრის ცალკეული საკითხების დაზუსტებას”, _ განაცხადა უწყების ხელმძღვანელმა
მისივე განმარტებით, კიდევ ერთი ცვლილება სავაჭრო ზონების მოწყობის განვითარებას, გადასახადის გადამხდელთა დაბეგვრის ცალკეული საკითხების დაზუსტებას ითვალისწინებს. აღნიშნული ცვლილებები ხელს შეუწყობს სექტორის განვითარებას, მისი თანამედროვე სტანდარტების შესაბამისად ფუნქციონირებას, დაბეგვრის საკითხების მოწესრიგებას, მცირე ბიზნესის ხელშეწყობას.
მინისტრის განცხადებით, მუშავდება, ზედმეტობის დაბრუნების ავტომატიზებული სისტემის დანერგვა. რათა, მეწარმეებს დამატებით არანაირი ბიუროკრატიასთან არ ჰქონდეს შეხება.
“დაინერგება ბიზნესისთვის ზედმეტობის დაბრუნების ავტომატიზებული სისტემა, რათა მეწარმეს არანაირ დამატებით ბიუროკრატიასთან არ ჰქონდეს შეხება და მხოლოდ ელექტრონული განაცხადის შევსების საფუძველზე, შესაძლებელი იყოს დღგ-ის ზედმეტობის დაბრუნება 5-7 სამუშაო დღეში. ეს განსაკუთრებით მნიშვნელოვანია საშუალო და მცირე ბიზნესისთვის, მათი სტიმულირებისთვის, რადგან მათ ექნებათ დამატებითი ფინანსური რესურსი განვითარებისთვის”, _ აღნიშნა ფინანსთა მინისტრმა მამუკა ბახტაძემ
ცვლილებების პროექტი საჯაროა და გამოქვეყნებულია „საკანონმდებლო მაცნეს” ვებგვერდზე. დოკუმენტი რამდენიმე დღეში განსახილველად წარედგინება საქართველოს პარლამენტს.
