ცნობისთვის, მართვის მოწმობა 1-ელი იანვრიდან ერთჯერადად აღუდგებათ იმ პირებს, რომლებსაც აღნიშნული უფლება ჩამორთმეული აქვთ ალკოჰოლური სიმთვრალის, შემთხვევის ადგილის მიტოვების, ნარკოტიკული საშუალების მცირე ოდენობით შეძენის/ მოხმარების გამო, ან თუ მათ ქულები გაუნულდათ.
როგორც მევლუდ მელაძე აცხადებს, გადაწყვეტილებამ შესაძლოა, ავტომობილის ალკოჰოლური თრობის ქვეშ მართვის შემთხვევები წაახალისოს, რაც ავტოსაგზაო შემთხვევების სტატისტიკის კუთხით ქვეყნისთვის ისედაც დიდი გამოწვევაა.
“არსებობს ზოგადად ასეთი პრაქტიკა და ეს აქ მოგონილი არ არის. როცა გარკვეული სამართალდარღვევები გროვდება, ამნისტიის ფორმის განკარგულებები გამოდის სხვადასხვა მიმართულებით. თუმცა, რადგანაც ჩვენთან ყველაზე მძიმე და დიდი პრობლემა ნასვამი მძღოლია, ჩემს ხელში რომ იყოს ამ განკარგულების მომზადება, ნასვამ მძღოლებს ამ სიაში არ შევიყვანდი. ეს შეიძლება შეეხოს სხვადასხვა დანაშაულს, რის გამოც ადამიანს მართვის მოწმობა ჰქონდა ჩამორთმეული. მაგალითად, ქულები ამოეწურა ან სხვადასხვა უწყინარ დარღვევას ჰქონდა ადგილი. თუმცა, მე პირადად ნასვამი მძღოლების მიმართ, ლოიალური არ ვიქნებოდი. ეს იმიტომ, რომ ყველაზე მეტ შემთხვევაში, სავალალო შედეგით დასრულებული ავარიების დროს, სწორედ ნასვამი მძღოლი იყო საჭესთან.
მომხრე ვარ ზოგადად ჩანართების, რომ გარკვეული ამინისტიები იყოს ხოლმე და მართვის მოწმობების დაბრუნება მოხდეს კონკრეტული მიმართულებებით. თუმცა, უშუალოდ ნასვამ მძღოლებზე რომ გავრცელდეს მსგავსი კანონპროექტი, ამისი მომხრე ვერ ვიქნები. ეგ არის რაც მადარდებს. როცა ნასვამ მძღოლებს ეხება საქმე, აქ ყველა გადაწყვეტილება უნდა იყოს ძალიან ფრთხილი. რაიმე სახის წახალისების ფორმა არ უნდა მიიღოს ამან. როგორც საგზაო მოძრაობის ერთ-ერთი ექსპერტი, შემიძლია ეს ვთქვა შეჯამებისას, რომ ამ კანონპროექტიდან ნასვამი მძღოლების ნაწილს ამოვაკლებდი. ამას შემდეგ უფრო მეტი სიღრმეები რომ არ მოჰყვეს“, – განაცხადა მელაძემ.
„ბიზნესპრესნიუსის“ კითხვის საპასუხოდ, როგორია მისი შეფასება კანონის სამომავლო გამკაცრებასთან დაკავშირებით, რაზეც აქცენტი გაკეთდა სამთავრობო გუნდის წევრების მხრიდან, საავტომობილო ფედერაციის პრეზიდენტი ამბობს, რომ უკვე მკაფიოდ უნდა იყოს გაცხადებული, კონკრეტულად რა იგულისხმება ზომების გამკაცრებაში.
„თუ არსებობს რაიმე ნაბიჯები, რაც ამ ყველაფერს მომავალში უნდა მოჰყვეს, ყველაფერი წინასწარ გაცხადებული უნდა იყოს. ფორმულა უნდა არსებობდეს თავიდან ბოლომდე. ახლა რომ ეს მოხდება, მერე რა მოყვება ამ ყველაფერს. იმის თქმას, რომ რაღაც დოზით გამკაცრდება, რაც ჯერ წინასწარ არ ვიცით, ჩემი აზრით, საერთოდ არაფრის თქმა სჯობს. როცა ამბობ, მერე უფრო მკაცრი ვიქნები, უნდა ვიცოდე, რას გულისხმობ ამაში. როდესაც რაიმე კანონპროექტია ინიცირებული, მასში მკაფიოდ უნდა იყოს გაწერილი დასაწყისიც და დაბოლოებაც“, – აცხადებს მელაძე.
ინფორმაციისთვის, ოფიციალური მონაცემებით, 2025 წლის 3 კვარტალში ალკოჰოლური თრობის გამო 326 ავტოსაგზაო შემთხვევა მოხდა, რომლის დროსაც დაშავდა 458 და დაიღუპა 44 ადამიანი.
