თამარ მიქაძე, სამოქალაქო აქტივისტი:
“მე ვარ თამარ მიქაძე, 26 წლის, გურიიდან და მინდა ვისაუბრო იმ სიკეთეების შესახებ, რომლებსაც ევროკავშირი ქართველ ახალგაზრდებს სთავაზობს. მინდა გესაუბროთ ჩემს მოხალისეობრივ გამოცდილებაზე პოლონეთსა და ესპანეთში. პოლონეთი იყო პირველი ქვეყანა, სადაც ამ პროგრამის მეშვეობის წავედი და ეს მოხდა უნივერსიტეტის დასრულებისთანავე, რაშიც დამეხმარა ადგილობირივი არასამთავრობო ორგანიზაცია “სტუდენტურ-ახალგაზრდული სათათბირო“. ეს გამოცდილება ჩემს ცხოვრებაში გარდამტეხი აღმოჩნდა, რადგან, მოგეხსენებათ, ჩვენს ქვეყანაში არაა ადვილი უნივერსიტეტის დასრულების შემდეგ, დაიმკვიდრო თავი, იპოვო ღირსეული სამსახური და რეალიზდე. ამიტომ, ამ გამოცდილებამ მომცა როგორც პროფესიული, ასევე პიროვნული განვითარების საშუალება და ეს იყო უმნიშვნელოვანესი.
რამდენიმე წლის შემდეგ, იგივე მოხალისეობრივი პროგრამით, ოღონდ უფრო ხანგრძლივი დროით, წავედი ესპანეთში. აქაც არასამთავრობო ორგანიზაციაში ვმუშაობდი, ვასწავლიდი ინგლისურს და ვიყავი მასწავლებლის ასისტენტი _ დამხმარე დაწყებით კლასებში და ამ გამოცდილებამ ძალიან მნიშვნელოვანი რამ დამანახა… და ვფიქრობ, რომ მნიშვნელოვანია ამაზე ვისაუბრო: როდესაც, შენი ქვეყნის მდგომარეობას უფრო შორიდან უყურებ, უფრო თვალსაჩინო ხდება, თუ რა მძიმე მდგომარეობაშია შენი ქვეყანა. როდესაც ვუყურებდი იქაურ ბავშვებს, იქაურ სწავლის მეთოდებს, ვუყურებდი, რომ იქ არც ერთ ბავშვს არ შიოდა, არც ერთ ბავშვს არ ჰყავდა ემიგრანტი დედა, არც ერთ ბავშვს არ ეშინოდა კითხვის დასმის…. მათ არ უწევდათ სწავლა სტრესულ გარემოში, კიდევ უფრო სევდიანი სანახავი იყო, რაც ჩვენს ქვეყანაში იყო. ამ განსხვავებებსა და ევროპულ კეთილდღეობებზე საუბარი შორს წაგვიყვანს…
და მინდა მოკლედ ვთქვა, რომ ის შესაძლებლობები, რაც მე მომეცა და რამაც უდიდესი წვლილი შეიტანა ჩემი პიროვნების ჩამოყალიბებაში, მინდა, რომ სხვა ახალგაზრდებსაც მიეცეთ… მინდა, რომ ისევე ლაღად ცხოვრობდნენ ქართველი ბავშვები, როგორც ესპანელები; მინდა, რომ ისეთივე მშვიდი, უზრუნველი და ღირსეული სიბერე ჰქონდეთ ქართველ მოხუცებს, როგორც ეს ევროპაში აქვთ.
სწორედ იმიტომ, რომ ასეთი მომავალი გვქონდეს, უნდა გავიაზროთ ყველამ, რომ ჩვენი ქვეყნის ერთადერთი ჭეშმარიტი და ნათელი მომავალი არის ევროპული! და თუ დავუშვებთ, და ვინმეს საშუალებას მივცემთ, ამ გზიდან გადაგვახდევინოს, ეს იქნება დამღუპველი შეცდომა ჩვენი ქვეყნისთვის, რომელსაც, ალბათ, ვერასდროს გამოვასწორებთ… მნიშვენლოვანია, ეს ყველამ გავიაზროთ და დავრწმუნდეთ იმაში, რომ ჩვენი ქვეყნის მომავალი მხოლოდ ევროპაშია!”
“გურია ნიუსმა” მიიღო დაფინანსება ამერიკის შეერთებული შტატების საერთაშორისო განვითარების სააგენტოსგან (USAID).
“გურია ნიუსი” ინარჩუნებს სრულ სარედაქციო დამოუკიდებლობას. “გურია ნიუსის” მიერ გამოქვეყნებული მასალა არ ასახავს USAID-ის ან ამერიკის შეერთებული შტატების მთავრობის პოზიციას
