გუშინ, კატარის მუნდიალზე ოქროს მედლებისათვის გადამწყვეტი დაპირისპირება გაიმართა. არგენტინამ და საფრანგეთმა ნამდვილი საფეხბურთო თრილერი გაითამაშეს და მთელ მსოფლიოს დაუვიწყარი საფეხბურთო ზეიმი აჩუქეს. გუშინდელი შეხვედრა ფეხბურთის ისტორიაში ერთ–ერთი საუკეთესო ფინალური დაპირისპირება აღმოჩნდა, თავისი დრამატიზმით და მოვლენათა განვითარების მოულოდნელი სცენარით.
გუშინდელი დაპირისპირების ძირითადი დრო ფრედ – 2:2 დასრულდა. დამატებითი ოცდაათი წუთის შემდეგ ტაბლოზე – 3:3 ეწერა. თერთმეტმეტრიანების სერიაში ლეო მესიმ და მისმა თანაგუნდელებმა – 4:2 იმარჯვეს. არგენტინა – საფრანგეთის ფინალს კიდევ დავუბრუნდებით, მანამდე კი მატჩისწინა პერიპეტიები მიმოვიხილოთ.
გუშინდელ ფინალურ დაპირისპირებას სრულიად მსოფლიო დიდი მოუთმენლობით ელოდა. ამისი ძირითადი მიზეზი ორი ფაქტორი გახლდათ: აისრულებდა თუ არა ლეო მესი საკუთარი ცხოვრების უმთავრეს ოცნებას და გახდებოდა თუ არა კილიან მბაპე ზედიზედ მეორედ მსოფლიოს ჩემპიონი.
ინტერესი ისეთი დიდი გახლდათ რომ მას თვით ლეგენდარული კალათბურთელი ლებრონ ჯეიმსიც გამოეხმაურა.
„არგენტინასა და საფრანგეთს შორის არჩევანის გაკეთება არ მსურს, უბრალოდ მინდა თამაშით ვისიამოვნო. რომელ საათზეა მატჩი? დილის 7 საათი შესანიშნავი დროა, ავდგები და ვუყურებ. მთელი მსოფლიოს მსგავსად მეც მინდა დიდებული მატჩი ვიხილო. შესანიშნავი შეხვედრა უნდა გამოვიდეს, რადგან სპორტის ამ სახეობაში ორ საუკეთესო მოთამაშეს ვნახავ“. – განაცხადა ლებრონ ჯეიმსმა.
1998 წლის მსოფლიო ჩემპიონმა, დავიდ ტრეზეგემ კი განაცხადა, რომ ფინალში მესის ჩემპიონობას მიესალმება.
„პირადად ჩემთვის ეს ფინალი ძალიან ემოციური იქნება. დიდებული მატჩი იქნება, რადგან ეს ის არის, რასაც ყველა ელოდა. ხასიათით, ისტორიით, ეს ორი საუკეთესო გუნდია მსოფლიოში. ვიცი, რომ მესის ბოლო მსოფლიო ჩემპიონატია და ის ამ ტიტულს იმსახურებს. იგი ხალხს აოცნებებს, თუმცა ეს საფრანგეთის ამბიციებს, ტიტული შეინარჩუნოს, სულაც არ აკნინებს.
საფრანგეთი კატარში მსოფლიო ჩემპიონობისთვის ჩამოვიდა. მესისა და მბაპეს შორის განსხვავება ასაკშია. ლეო კარიერის ბოლო პერიოდშია, კილიანმა კი ახლახანს დაიწყო და ყველაფერს გაიღებს რეკორდებისთვის. ისინი „პსჟ“–ში დიდებულ კომბინაციას ქმნიან, თუმცა არგენტინა მესისთვის თამაშობს, ყველაფერი მის გარშემო ხდება.“ – განაცხადა დავიდ ტრეზეგემ.
არგენტინული გამოცემა „TYC Sports“-ის ინფორმაციით, ლეო მესი მუნდიალის ფინალის წინ კვლავ თავის ძველ მეგობართან, სერხიო აგუეროსთან ერთად იმყოფებოდა.
კატარში ჩასვლის დღიდან მესიმ გადაწყვიტა, რომ სასტუმროს ოთახში მარტო ეცხოვრა, რათა მსოფლიოს ჩემპიონატზე სრული კონცენტრაცია მოეხდინა და ბოლომდე შემართებით ყოფილიყო.
წლების განმავლობაში მესი ტურნირებზე სასტუმროს ოთახს აგუეროსთან ერთად იყოფდა. ფინალის წინ კი სამხრეთამერიკელთა კაპიტანი მარტო არ იყო და მას საფინალო მატჩისთვის მომზადებაში ძველი მეგობარი დაეხმარა.
სერხიო აგუერო მუნდიალის პირველი დღიდან კატარში გულშემატკივრის სტატუსით იმყოფებოდა. აგუერომ არგენტინის ნაკრების ფინალისწინა სავარჯიშო სესიაშიც მიიღო მონაწილეობა.
ფინალურ მატჩს დაესწრო საფრანგეთის პრეზიდენტი ემანუელ მაკრონი.
მუნდიალის გადამწყვეტ შეხვედრაში არგენტინას 50 ათასმა გულშემტკივარმა დაუჭირა მხარი, საფრანგეთს კი 6 ათასმა.
ფინალურ დაპირისპირებას, დაწყებამდე, ერთი ანტიგმირი უკვე ჰყავდა. საფრანგეთის პრეზიდენტმა, ემანუელ მაკრონმა, მატჩზე ეროვნული გუნდის ტრავმირებული თავდამსხმელი ქარიმ ბენზემა დაპატიჟა, მაგრამ მადრიდის „რეალის“ შემტევმა პრეზიდენტის მიპატიჟება არაფრად ჩააგდო და შეხვედრის მადრიდში ყურება არჩია. არადა, რამდენიმე დღის წინ, ფრანგულ მას მედიაში გავრცელდა ცნობა, რომ ქარიმ ბენზემა გამოჯანმრთელდა და შეიძლება ფინალშიც ეთამაშა. საბოლოოდ არც ითამაშა და არც კატარში ჩაფრენილა.
ფინალური შეხვედრა არგენტინის ნაკრებმა ძალიან მოტივირებულმა დაიწყო და თავიდანვე უდიდესი სათამაშო უპირატესობა მოიპოვა. საფრანგეთის ნაკრებს არაფერი გამოსდიოდა და პირველი 45 წუთი კარისკენ დარტყმის გარეშე დაასრულა.
ანხელ დი მარიას მოპოვებული პენალტი ლეო მესიმ გოლად აქცია, შემდეგ კი დი მარიამ თავადაც გაიტანა. პირველი ტაიმის შემდეგ სამხრეთამერიკელები – 2:0-ს იგებდნენ და კილიან მბაპეს გუნდი განწირული სჩანდა.
მეორე ტაიმშიც არგენტინა მდგომარეობას აკონტროლებდა და შეხვედრა ლოგიკურ დასასრულამდე მშვიდად მიჰყავდა. ასე გაგრძელდა 79-ე წუთამდე. შემდეგ კი დაიწყო და რა დაიწყო…
თავდაპირველად რანდალ კოლო მუანიმ თერთმეტმეტრიანი მოიპოვა და კილიან მბაპემ სხვაობა შეამცირა. გავიდა მხოლოდ წუთნახევარი და მბაპემ წონასწორობა აღადგინა!!! არგენტინის ნაკრებს აშკარა დაბნეულობა შეეტყო და ძირითადი დროის დარჩენილ ნაწილში საფრანგეთს მოგებაც კი შეეძლო.
დამატებით ოცდაათ წუთში არგენტინა უფრო მწვავედ უტევდა და სახიფათო მომენტებიც შექმნა, რამაც შედეგი გამოიღო. 109-ე წუთზე ლიონელ მესიმ დუბლი შეასრულა და არგენტინა ისევ წინ გავიდა, მაგრამ 118-ე წუთზე მბაპემ პენალტი მოიპოვა, რომელიც გაიტანა და ანგარიში კიდევ ერთხელ გაათანაბრა. დამატებული დროის უკანასკნელ წამებზე დიდიე დეშამის გუნდს ჩემპიონობის მოპოვებაც შეეძლო, მაგრამ ჩინებული შესაძლებლობა ქარს გაატანა.
საქმე თერთმეტმეტრიანების სერიამდე მივიდა, სადაც არგენტინელ ფეხბურთელებს უფრო ძლიერი ნერვული სისტემა აღმოაჩნდათ. მათ ოთხიდან ოთხი პენალტი გაიტანეს, კინგსლი კომანმა და ორელინ ჩუამენმა კარის დალაშქვრა ვერ შეძლეს და არგენტინის ნაკრები 36-წლიანი პაუზის შემდეგ კვლავ მსოფლიოს ჩემპიონია, ისტორიაში მესამედ.
ლეო მესიმ ოცნება აისრულა და მსოფლიო ჩემპიონის ტიტული მოიპოვა. ამის გარდა მან კიდევ რამდენიმე რეკორდი დაამყარა: მატჩების რაოდენობით მუნდიალზე პირველია (26), ერთ მუნდიალზე მასზე მეტი პენალტი არავის გაუტანია. გარდა ამისა, მესი პირველი ფეხბურთელია, რომელმაც ერთ მუნდიალზე გოლის გატანა ჯგუფურ ეტაპზე, მერვედფინალში, მეოთხედფინალში, ნახევარფინალსა და ფინალში მოახერხა.
საინტერესოა რომ კილიან მბაპეს 23 წლის ასაკში მსოფლიოს ჩემპიონატებზე უკვე 12 გოლი დაუგროვდა.
მსოფლიოს 2022 წლის ჩემპიონატის საუკეთესო ფეხბურთელი ლიონელ მესი გახდა.
მუნდიალის საუკეთესო ბომბარდირი კი კილიან მპაბეა, რომელმაც არგენტინასთან შეხვედრაში ჰეთ–თრიკი შეასრულა და საერთო ჯამში 8 გოლი მოუგროვდა.
მსოფლიოს პირველობის საუკეთესო მეკარის პრიზი არგენტინის ნაკრების 30 წლის გოლკიპერმა ემილიანო მარტინესმა ჩაიბარა. „ასტონ ვილას“ კარის დარაჯმა შვიდივე თამაში შეუცვლელად ჩაატარა.
მუნდიალის საუკეთესო ახალგაზრდა მოთამაშედ არგენტინის ეროვნული გუნდის 21 წლის ნახევარმცველი ენცო ფერნანდესი აღიარეს.
