დეკორატიული წიწაკა _ კაპსიკუმი, რომელსაც უფრო “ქოთნის პილპილის” სახელწოდებით იცნობენ, კარგად ეგუება ჩვენს გარემოს, ხარობს ყველგან, როგორც ქოთანში, ისე, ღია გრუნტში და არომატული გემოთი ამდიდრებს კერძებს, გარემოს კი, როგორც დეკორატიული მცენარე, დამახასიათებელ ესთეტიურ ხიბლს მატებს.
კაპსიკუმის სამშობლო მექსიკაა, თუმცა, მისი რამდენიმე ჯიში ჩვენში კარგად არის დამკვიდრებული. ის გაცილებით ცხარე და დამახასიათებელი გემოს მატარებელია, ვიდრე ჩვეულებრივი წიწაკა.
დეკორატიულ მნიშვნელობაზე როცა ვსაუბრობთ, სასურველია, შევარჩიოთ მრავალწლიანი ჯიში, რათა გაზაფხულსა და ზაფხულში ღია აივნები თუ ბაღები გავალამაზოთ, ზამთარში კი ჩვენი საოჯახო ინტერიერი.
კაპსიკუმი _ ქოთნის პილპილი _ განსაკუთრებულ მოვლას არ საჭიროებს. მცირე ზომის მოგრძო ნაყოფი არის როგორც ყვითელი, იასამნისფერი, მწვანე, ასევე, კაშკაშა წითელი. უყვარს სინათლე, ამიტომ ზამთრის პერიოდში, როცა ქოთანს სახლში შევიტანთ, განათებულ ადგილზე უნდა მოვათავსოთ. წინააღმდეგ შემთხვევაში, დაჩიავდება და სილამაზეს დაკარგავს. საკმარისია ოთახის ტემპერატურა.
ტენიანობას რაც შეეხება, წყალი არ უნდა მოვაკლოთ და არც ზედმეტი მოგვივიდეს. მორწყვის დროს ვაპკუროთ ფოთლებზეც.
კაპსიკუმი დიდხანს და ლამაზად რომ გამოიყურებოდეს, ზოგჯერ გასხვლის მაგვარი ოპერაცია უნდა ჩავუტაროთ. უმეტესად კი, მაშინ როცა მცირე ზომის ნაყოფს შევამჩნევთ, 2-3 სმ-ით დავუმოკლოთ ტოტები, “დავბუჩქოთ”. ნიადაგს ჩვეულებრივ კარგად განოყიერებული უნდა, როგორც სხვა მსგავს აგრარულ თუ დეკორატიულ მცენარეს.
კაპსიკუმი, ეზოებსა თუ ქოთნებში, ზამთარ-ზაფხულ უნდა გვქონდეს. ზამთრობით იგი ძალიან ალამაზებს გარემოს, დიასახლისებს კი კერძისთვის მუდამ ცოცხლად მოსაკრეფი ეგზოტიკური სიცხარის მქონე წიწაკა ექნებათ.
