ადამიანის უფლებათა ცენტრმა 15-17 აპრილს ჩატარებული საპროტესტო აქციების მონიტორინგის მოკლე ანგარიში გამოაქვეყნა.
გავრცელებული ინფორმაციით, ჯგუფი სხვადასხვა ლოკაციიდან აკვირდებოდა 15, 16 და 17 აპრილს ორგანიზებულ აქციებს – ,,არა რუსულ კანონს!”, რომელთა მსვლელობისას გამოიკვეთა რამდენიმე მნიშვნელოვანი დარღვევა.
“კერძოდ, მიუხედავად იმისა, რომ აქცია სამივე დღის განმავლობაში სრულად მშვიდობიანად მიმდინარეობდა და არ არსებობდა შეკრების დაშლის საფუძველი, შსს-ს თანამშრომლებმა 16 აპრილის 22:00 და 17 აპრილს 00:40 საათისთვის, პარლამენტის უკანა შესასვლელთან გამოიყენეს წიწაკის სპრეი მონაწილეთა დასაშლელად. ამ სპეციალური საშუალების გამოყენებას წინ არ უძღვოდა გაფრთხილება, რაც ეწინააღმდეგება ეროვნული კანონმდებლობით დადგენილ მოთხოვნას. გარდა ამისა, პოლიციის თანამშრომლებმა 16-17 აპრილს დაკავებული პირების მიმართ გამოიყენეს არაპროპორციული ძალა. უმეტეს შემთხვევაში, უცნობი იყო დაკავებულთა ადგილსამყოფელი და მათი სასამართლოში წარდგენის ვადა, სავარაუდოდ, გახანგრძლივდა კანონით განსაზღვრული საფუძვლის არსებობის გარეშე.
ამასთან, საპროტესტო აქციის სამივე დღეს, ადამიანის უფლებათა ცენტრის მონიტორებმა პარლამენტისა და კანცელარიის მიმდებარე ტერიტორიაზე დააფიქსირეს წყლის ჭავლის მანქანები, ე. წ. „დაკავების მანქანები” და გადაიღეს ფოტოები, რომლებზეც შსს-ს თანამშრომლების აღჭურვილობას შორის ნათლად ჩანს არალეტალური იარაღი (რეზინის ტყვიების გამოსაყენებლად). 16 აპრილის ღამეს და 17 აპრილის ღამის 00:30 საათისთვის, ადამიანის უფლებათა ცენტრის მონიტორების შეფასებით, აქციის მონაწილეთა რაოდენობის გათვალისწინებით, პარლამენტის უკანა შესასვლელთან და ზურაბ ჟვანიას ქუჩაზე, შსს სპეციალური დანაყოფის თანამშრომლები არაპროპორციული რაოდენობით იყვნენ მობილიზებულნი.
მონიტორინგის მოკლე ანგარიშში, წარმოდგენილია რეკომენდაციები შესაბამისი სახელმწიფო ორგანოებისადმი.
სპეციალურ საგამოძიებო სამსახურს:
უზრუნველყოს შსს-ს თანამშრომლების მხრიდან უფლებამოსილების შესაძლო გადამეტებასთან დაკავშირებული შემთხვევების დროული, სრულყოფილი და ობიექტური გამოძიება;
მოახდინოს სწრაფი რეაგირება აქციის მიმდინარეობისას ჟურნალისტურ საქმიანობაში უკანონოდ ხელის შეშლის, ასევე, ძალადობის ფაქტებზე.
საქართველოს შინაგან საქმეთა სამინისტროს:
უზრუნველყოს აქციის მონაწილეებისთვის კონსტიტუციით გარანტირებული მშვიდობიანი შეკრების უფლების რეალიზება და არ დაუშვას უფლებაში თვითნებური ჩარევა;
არ გამოიყენოს სპეციალური საშუალებები მშვიდობიანი აქციის მონაწილეების წინააღმდეგ და იმოქმედოს აქციის მიმდინარეობისას ცალკეული სამართალდარღვევის შემთხვევების აღმოსაფხვრელად;
არ დაუშვას აქციის მონაწილეების დაკავების მიზნით ე.წ. „დევნის ოპერაციის“ განხორციელება, რომელიც ძალის გადამეტების სახეს იღებს;
პატივი სცეს დაკავებულ პირთა უფლებებს და არ გამოიყენოს დაკავებული პირის მიმართ არაპროპორციული ძალა; ასევე, დაასაბუთოს აქციის მონაწილეების დაკავების კანონიერების საკითხი დამაჯერებელ მტკიცებულებათა ერთობლიობით”,_ ნათქვამია ანგარიშში.
