თბილისის ყოფილი მერი გიგი უგულავა დღეს სასამართლომ დამნაშავედ ცნო. უგულავას 1 წლითა და 3 თვით თავისუფლების აღკვეთა შეეფარდა, თუმცა, სააპელაციო სასამართლოს მიერ სხვა სისხლის სამართლის საქმეზე გამოტანილმა განაჩენმა შთანთქა დღეს გამოტანილი განაჩენი, შესაბამისად, სასჯელი უგულავას მოხდილად ჩაეთვლება.
როგორ შეიძლება შეფასდეს თბილისის ყოფილ მერთან დაკავშირებით სასამართლოს მიერ დღეს მიღებული გადაწყვეტილება _ ამ საკითხზე ,,გურია ნიუსი“ პოლიტიკურ მეცნიერებათა დოქტორს, დემოკრატიული აუდიტის ცენტრის ხელმძღვანელს, არმაზ ახვლედიანს ესაუბრა.,,ამ საქმის სამართლებრივ დეტალებს არ ვიცნობ, თუმცა, ნათელია, რომ ის და მისი წარსულში მხარდამჭერი ,,ნაციონალური მოძრაობა“ ვერასდროს ასცდება იმ მორალურ და სამოქალაქო პასუხისმგებლობას, რომელიც ამ ძალას აკისრია ქვეყანაში განვითარებული უმძიმესი პროცესების გამო. შესაბამისად, ჩემი პოლიტიკური შეფასება სწორედ ეს არის. ნამდვილად არ ვიცი, ერთ წელზე მეტით ან ნაკლებით უნდა ყოფილიყო თუ არა ესა თუ ის ადამიანი ციხეში, თუმცა, ამ პარტიის პოლიტიკური პასუხისმგებლობა იმდენად დიდია, რომ ისინი მრავალი წელი ვერ გაიმართებიან წელში წარსულში ჩადენილი მძიმე დანაშაულების გამო.
ერთი მხრივ, ,,ნაციონალური მოძრაობა“ თავიდანვე იყო მკაცრად სტრუქტურირებული პოლიტიკური ძალა, სადაც ადამიანები გაერთიანებულნი იყვნენ ერთი კონკრეტული იდეის ირგვლივ და ზოგიერთები დღესაც ამ იდეის ერთგულები რჩებიან. მე, რა თქმა უნდა, შორს ვარ იმ აზრისგან, რომ ამ პოლიტიკური ძალის რიგითი წევრები გარეული იყვნენ იმ უკანონო ქმედებებში, რომლებშიც ჩართულნი იყვნენ პარტიის ხელმძღვანელები და ლიდერები.
პოლიტიკური ლიდერების პასუხისმგებლობა ერთია და თავად პოლიტიკური ძალა, რომელსაც ამომრჩეველი ყოველ არჩევნებზე მეტად თუ ნაკლებად უჭერს მხარს _ მეორე, თუმცა, მე მეჩვენება, რომ გაყოფილი “ნაციონალური მოძრაობაც“ კი კარგახანს ვერ შეძლებს ფეხზე წამოდგომას. უკეთეს შემთხვევაში, მყარად და დიდხანს შეიძლება იყოს პოზიციაში“, _ გვითხრა ახვლედიანმა.
ცნობისთვის, უგულავას ბრალად ედებოდა თბილისის განვითარების ფონდიდან 48 მილიონი ლარის მითვისება-გაფლანგვა. მოსამართლის გადაწყვეტილებით, უგულავას სისხლის სამართლის კოდექსის 182-ე მუხლით წარდგენილი ბრალი ამავე კოდექსის 333-ე მუხლით გადაუკვალიფიცირდა, რაც სამსახურებრივი უფლებამოსილების გადამეტებას გულისხმობს.
თბილისის განვითარების ფონდიდან 48 მილიონი ლარის გაფლანგვაში ბრალდებული კიდევ 5 პირიდან სასამართლომ თავისუფლების აღკვეთა მხოლოდ ერთს, თბილისის განვითარების ფონდის ყოფილ ხელმძღვანელს გიორგი საბანაძეს შეუფარდა.
მოსამართლის გადაწყვეტილებით, საბანაძე დიდი ოდენობით საბიუჯეტო თანხების გაფლანგვაში იქნა დამნაშავედ ცნობილი და 8 წლით თავისუფლების აღკვეთა შეეფარდა. საბანაძეს სასჯელი დაუსწრებლად შეეფარდა, ვინაიდან ის მიმალვაში იმყოფება.
რაც შეეხება დანარჩენ ბრალდებულებს, მოსამართლემ ძველი თბილისის გამგებლის ყოფილი მოადგილე დიმიტრი ჩხეიძე საქმეზე უდანაშაულოდ ცნო, დანარჩენ ბრალდებულებს კი მუხლი გადაუკვალიფიცირდა. კერძოდ, მოსამართლემ თბილისის მერის ყოფილი მოადგილე დავით ალავიძე, მერიის შესყიდვების სამსახურის ყოფილი უფროსი ალექსანდრე თაბუაშვილი, ძველი თბილისის ყოფილი გამგებელი დავით ავალიანი დამნაშავედ სამსახურებრივი უფლებამოსილების გადამეტებაში ცნო.
მოსამართლის გადაწყვეტილებით, ყველა ბრალდებულს 1 წლითა და 2 თვით პირობითი მსჯავრი დაედო.
reestr.jpg)
