“დებილები ყველგან არიან, ჟურნალისტებშიც ბევრი დებილი მინახავს”, _ ეს “ბრძნული“ გამონათქვამი “ქართული ოცნების“ დეპუტატს კახა ოქრიაშვილს ეკუთვნის;
ოპერატორების მიმართ პრეზიდენტობის ყოფილმა კანდიდატმა და “ნაციონალების“ ერთ-ერთმა ლიდერმა გრიგოლ ვაშაძემ შემდეგი სიტყვები გამოიყენა: “კამერები იქით მიატრილეთ, თქვე ჩემისებო!”
ვაშაძეს მხარი მისავე კოლეგამ და თანაგუნდელმა ნიკა მელიამ მიბაძა და ტვ პირველის ჟურნალისტს შემდეგნაირად მიმართა: “იდიოტურ კითხვას სვამ!“
ტელეკომპანია ტვ პირველის ნინო ჟიჟილაშვილის და აჭარის მაუწყებლის ტელევიზიის საინფორმაციო გამოშვების წამყვანის თეონა ბაკურაძის კითხვები არ მოეწონა პარლამენტის ყოფილ თავმჯდომარეს ირაკლი კობახიძეს _ მან ორივე ჟურნალისტს “ნაცმოძრაობისგან“ გამიჯვნისკენ მოუწოდა.
ამის შემდეგ იყო აჭარის ტელევიზიის ახალარჩეული დირექტორის გიორგი კოხრეიძის დიალოგი “მთავარში“ _ კოხრეიძე ძალიან აგრესიული იყო ჟურნალისტის მიმართ: “შენთან სახლში სტუმარი რომ არ მოვა, ეს ვისი ბრალია, სტუმრის თუ შენი? გამეცი პასუხი, თეონა!“ “შენ უქმნი ისეთ პირობას, რომ ის არ მოდის გადაცემაში. ეს არის მეთოდი, ეს არის ტექნოლოგია“, _ უთხრა გიორგი კოხრეიძემ თეონა ბაკურიძეს.
პოლიტიკოსებს არ ჩამოუვარდა ცნობილი კომპოზიტორი ჯემალ სეფიაშვილი _ „გური ნიუსის“ ჟურნალისტის გიორგი გირკელიძის კითხვაზე, რა აზრის იყო ფილმის _ „და ჩვენ ვიცეკვეთ“ ირგვლივ განვითარებულ მოვლენებზე, ის უცებ გაღიზიანდა: „არ მსურს ამ თემზე საუბარი!“ როცა ჟურნალისტმა კვლავ ჰკითხა, მხოლოდ საკუთარი მოსაზრება გამოეთქვა, ასეთი პასუხი გასცა: „ნუ გამიტრ….ეთ!“.
ეს მცირე ჩამონათვალია, რაც ხდება საქართველოში ბოლო დროს.
ჟურნალისტური ეთიკის ქარტიის აღმასრულებელი დირექტორი გიორგი მგელაძე “გურია ნიუსს“ ექსკლუზიურ კომენტარს აძლევს ზემოთ აღნიშნულ საკითხებზე.
“სამწუხაროდ, მედია ყველა არჩევნებზე მთავარი დარტყმის ერთ-ერთი ობიექტი ხდება მიუხედავად იმისა, რომ ჯერ შუა საარჩევნო პერიოდში არ გადასულა ქართული პოლიტიკური საზოგადოება.
ჩვენ ბოლო აქციების დროს და წინა დღეებში ვნახეთ არაერთი შეურაცხყოფა, შეუსაბამო ფრაზეოლოგიით თუ ტერმინოლოგიით მიმართვა ჟურნალისტების მიმართ როგორც ოპოზიციის, ასევე ხელისუფლების მხრიდან, რასაც ქარტია განცხადებითაც გამოეხმაურა.
მსგავს ფაქტებზე მომავალშიც მკაცრ და მყისიერ რეაგირებას ვაპირებთ, რაც ჩვენი კომპეტენციის ფარგლებში შეგვიძლია. ჟურნალისტების მიმართ მსგავსი დამოკიდებულება არის მიუღებელი, რაც, პირველ რიგში, მეტყველებს პოლიტიკოსების უკულტურობაზე, მათ შესახებ იძლევა ინფორმაციას, რომ ისინი არ არიან მზად კრიტიკული კითხვებისთვის, არ არიან მზად საკუთარი პოზიციების ჟურნალისტებისთვის შეურაცხყოფის გარეშე მიწოდებისთვის“, _ გვითხრა გიორგი მგელაძემ.
მისივე თქმით, ჟურნალისტის მიმართ ასეთი დამოკიდებულება არ არის მხოლოდ ერთი ადამიანის შეურაცხყოფა, ეს არის ამ ჟურნალისტის, ამ მედიასაშუალების უკან მდგომი აუდიტორიის უპატივცემულობა:
“რატომ უნდა უწოდოს ჟურნალისტის კითხვას პოლიტიკოსმა იდიოტური?! რატომ უნდა იხსენიებდეს პოლიტიკოსი ჟურნალისტებს ისეთი ტერმინოლოგიით, რომლის განმეორებაც არ მინდა, თქვენი მკითხველის და აუდიტორიის წინაშე.
მე, მაგალითად, როგორც ერთი ჟურნალისტი, როგორც ქარტიის წარმომადგენელი ვისურვებდი, რომ მსგავს რესპონდენტებს, რომლებიც შეურაცხყოფას აყენებენ მედიის წარმომადგენლებს, სათანადო პასუხი ჰქონდეს მედიის მხრიდან.
ეს იყოს ბოიკოტი (თუნდაც, მცირე ხნით) ანდა უარი ვთქვათ მათ მიერ გამართული პრესკონფერენციის გაშუქებაზე, ან მათი განცხადებების გავრცელებაზე.
თვითონ პოლიტიკოსებიც თუ იქნებიან მედიის და საზოგადოების წარმომადგენლების მიმართ სოლიდურები კარგი იქნება, თუ თვითონვე გაემიჯნებიან მათ კოლეგას რომელიც მედიას შეუსაბამოდ მოექცევა.
ბოლო კვირეებმა კარგად დაგვანახა, რომ ამ კუთხით პროგრესი არ გვაქვს. პირიქით, რაც უფრო მეტად იწევს დუღილის ტემპერატურა, მით უფრო აგრესიულები ხდებიან ჩვენი პოლიტიკოსები, რაც ჩემთვის, მედიის წარმომადგენელისთვის არის მიუღებელი“, _ აღნიშნა “გურია ნიუსთან“ გიორგი მგელაძემ.
