4 ივლისს, ოზურგეთში, გამოჩენილი ქორეოგრაფის, ხელოვნების დამსახურებული მოღვაწის, ჯუმბერ დუნდუას მემორიალური დაფა გაიხსნა.
ცნობილ ხელოვანს დაბადებიდან 80 წელი 20 ივნისს შეუსრულდა.
ცერემონიალს ესწრებოდნენ, როგორც ოზურგეთის საზოგადოების, მხარის და მუნიციპალიტეტის ხელისუფლების, ასევე, თბილისიდან ჩამოსული ხელოვნების დარგის წარმომადგენლები.
ღონისძიება ჯუმბერ დუნდუას შვილმა კობა დუნდუამ გახსნა.
მან ისაუბრა ჯუმბერ დუნდუას შემოქმედებით გზაზე, რომლის ცხოვრების კრედო ქართული ხალხური ქორეოგრაფია და მისი მსახურება იყო, მერე კი სიტყვა გადასცა საქართველოს ქორეოგრაფიული აკადემიის ხელმძღვანელს, ალექსანდრე ქართველიშვილს:
_ მინდა მადლობა გადაგიხადოთ, რომ ჯუმბერ დუნდუას საქმეს და სახელოვან გზას ასე აგრძელებთ. ის დიდი ხელოვანი იყო. უდიდესი წვლილი შეიტანა ქართული ქორეოგრაფიის განვითარების საქმეში. მიხარია, რომ დღეს მისი მემორიალური დაფა სწორედ მისსავე სახლთან იხსნება. ეს არის ხსოვნის უკვდავყოფა, რაც ისედაც დაიმსახურა ბატონმა ჯუმბერმა ხელოვნებისადმი თავდადებული მსახურებით, _ თქვა მან.
ოზურგეთის “შვიდკაცას” სოლისტი, ცნობილი მომღერალი, ოზურგეთის საკრებულოს წევრი ლევან ნინიძე:
_ საქართველოსთვის დაუვიწყარ ხელოვან კაცთან გვაქვს საქმე. როცა ოზურგეთის საკრებულოს წინაშე დაისვა საკითხი, რომ, მოქმედი წესის მიხედვით, მხოლოდ 20 წლის შემდეგ შეიძლებოდა ბარელიეფის გახსნა, ჩვენ გადავწყვიტეთ და მხარი დავუჭირეთ, რომ ეს, ახლა, გამონაკლისის სახით, გარდაცვალებიდან 15 წლისთავზე მომხდარიყო.
ბატონ ჯუმბერს ახლახან შეუსრულდა 80 წელი. სამწუხაროდ, ის ადრე წავიდა წუთისოფლიდან.
ჯუმბერ დუნდუა იყო იშვიათი ქორეოგრაფი, ქართულ ფოლკლორზე შეყვარებული, ბრწყინვალე პედაგოგი, რომელმაც გაიარა სუხიშვილების დიდი სკოლა და მერე დიდ ანსამბლებს თავად უწყვეტ რეჟიმში უმზადებდა საუკეთესო კადრებს. ამასთანავე ის იყო საოცარი მეურნე _ ყველანი მომსწრე ვართ, აქ, თავის ეზოში, როგორ გააშენა მან ჩხავერი და როგორ მზრუნველობდა მასზე.
იყო ძლიერი ორგანიზატორი. მოკლედ, ის იყო კაცი, რომელსაც არ ეშლებოდა არაფერი. მიხარია, რომ დღეს აქ მემორიალური დაფა გაიხსნა, _ თქვა ნინიძემ და მადლობა გადაუხადა ღონისძიებაზე დამსწრეებს.
საზოგადოების წარმომადგენლებს მიესალმნენ და ჯუმბერ დუნდუას ღვაწლის შესახებ ისაუბრეს ოზურგეთის მუნიციპალიტეტის მერმა, კოტე შარაშენიძემ, საკრებულოს თავმჯდომარემ დავით დარჩიამ.
მხარის გუბერნატორმა, გიორგი ურუშაძემ განაცხადა, რომ ის პირველად გამოვიდა საჯარო შეხვედრაზე და მოხარულია, ეს ჯუმბერ დუნდუას მემორიალური დაფის გახსნის დროს ხდება.
_ ბედნიერი ვართ და მინდა მოგილოცოთ, რომ ჩვენ გვყავდა ჯუმბერ დუნდუა! _ თქვა მან.
ბარელიეფს ფარდა ხელოვანის შვილიშვილებმა _ გიორგი და ჯუმბერ დუნდუებმა ჩამოხსნეს.
“ეპოქის შემქმნელი ქართულ ქორეოგრაფიაში”, “საქართველოს დაუვიწყარი შვილი”, “დაფა სიმბოლოა, როგორ უნდა იღვაწოს და დაიფერფლოს ხელოვნებისთვის ადამიანი”, “მან დასაწყისიდანვე გაიარა სუხიშვილების სკოლა და მერე იმდენი მოცეკვავე არავის გაუზრდია რეგიონიდან ამ ანსამბლისთვის, რამდენიც ბატონმა ჯუმბერმა”, _ ისმოდა სიტყვით გამომსვლელებისგან.
განსაკუთრებით ემოციური სიტყვით გამოვიდნენ ბათუმის მერიის კულტურის სამსახურის და ასევე, ენვერ ხაბაძის სახელმწიფო ანსამბლის სახელით მოსული სტუმრები:
_ ჯუმბერ დუნდუა არის ავტოგრაფი ქართულ ხალხურ ქორეოგრაფიაში, მემორიალური დაფის გახსნა კი სიმბოლოა იმისა, თუ როგორ უნდა იღვაწოს ხელოვანმა, როგორ ემსახუროს ქართულ ქორეოგრაფიას და დაიფერფლოს მის სიყვარულში! ამის თვალსაჩინო მაგალითი იყო თავისი ცხოვრებით ჯუმბერ დუნდუა! _ გაისმა ოზურგეთის თეატრის სცენაზე აჭარის რეგიონიდან მოსული სტუმრების ხმა.
მემორიალურ დაფაზე, რომელიც ამიერიდან სახლის კედელზე იქნება გაკრული, ასეთი წარწერაა: “ამ სახლში 1986-2014 წლებში ცხოვრობდა და მოღვაწეობდა გამოჩენილი ქორეოგრაფი, ხელოვნების დამსახურებული მოღვაწე და ღირსების ორდენის კავალერი, ჯუმბერ დუნდუა”.
საზეიმო ცერემონიალის შემდეგ, ოზურგეთის სახელმწიფო თეატრში, მაყურებლის წინაშე დიდი კონცერტით წარდგა სახელმწიფო ანსამბლი “გურია”, რომელსაც ახლა კობა დუნდუა ხელმძღვანელობს.
მაყურებლის წინაშე შესრულდა “ფუნდრუკი”, რომლის ავტორი გიორგი სალუქვაძეა და მის აღდგენაზე თავად ჯუმბერ დუნდუა, ვაჟა ახვლედიანი, უჩა დვალიშვილი და კობა დუნდუა მუშაობდნენ. ანსამბლ “გურიას” მოცეკვავეებმა, ასევე, ჩვეული მაღალი პროფესიონალიზმით და სახელოვნებო შესრულებით წარმოადგინეს ცეკვები: “ქართული”, “ტაშფანდური”, მუსიკალური კომპოზიციები, “ფარცა”, “ხევსურული” და მრავალი სხვა.
კონცერტი ორ განყოფილებად ჩატარდა და პირველი განყოფილება, ძირითადად, დატვირთული იყო გურული ცეკვებით.
თეატრის სცენაზე გამოსვლისას, კობა დუნდუამ აღნიშნა, რომ ამ დღისთვის სპეციალურად შეიქმნა ცეკვა “ტაშფანდური”, რომლის ავტორიც თავად არის:
_ იუბილესთვის გვინდოდა განსხვავებული პროგრამით წარდგომა მაყურებლის წინაშე. აქედან გამომდინარე, სპეციალურად შეიქმნა საკონცერტო პირველი განყოფილება , რომელიც, ძირითადად, დაიტვირთა გურული ცეკვებით. ასევე, ამ დღის აღსანიშნავად სპეციალურად შეიქმნა ცეკვა “ტაშფანდური”, რომელიც გურულ მოტივებზეა აგებული. ცეკვის ავტორი თავად ვარ. რაც შეეხება მემორიალურ დაფას, მისი ავტორია ცნობილი მოქანდაკე ირაკლი წულაძე, ხოლო მემორიალურ დაფაზე განთავსებული ბარელიეფი დაამზადა “ზარაფხანამ”, _ თქვა “გურია ნიუსთან” კობა დუნდუამ კონცერტის დასასრულს.
ავტორი: მარინა ჩიხლაძე
