გურიაში, ხაგნგრძლივი გვალვის შემდეგ, უხვმა ხანმოკლე წვიმამაც მეტ-ნაკლებად „მოითარეშა“, როგორც ზღვისპირა, ისე მთის ზონის სოფლები.
თუმცა, როგორც „გურია ნიუსის“ მოძიებული ინფორმაციებიდან და კადრებიდან ირკვევა, ნალექი უფრო უხვი გურიის ზღვისპირეთში იყო.
_წუხელ, მთელი ღამე დატბორილი იყო ურეკის ქუჩები. რაღაცნაირად წვიმდა, წამოვიდოდა თქეში, მერე ოდნავ შეჩერდებოდა. ზღვაზეც შტორმი იყო, თუმცა ღმერთს მადლობა, მსხვერპლი ან მნიშვნელოვანი ზარალი არ ყოფილა. ახლა გადაიღო, მზეც გამოჩნდა, თუმცა ქუჩებში წყალი მაინც დგას, _ გვეუბნება ურეკის მცხოვრები ლალი თავართქილაძე.
ოზურგეთის სოფლებში, განსაკუთრებით მთის ზონაში, როგორც ადგილობრივები და მუნიციპალიტეტის მერის წარმოადგენლები გვეუბნებიან, აქა-იქ გზები დაზიანდა ნიაღვრის გამო, თუმცა ახლა წვიმამ გადაიღო და დაზიანება არ არის იმდენად ძლიერი, რომ, ადგილობრივი ძალებით შეკეთება ვერ მოხერხდეს.
ჩვენ დილით ადრე დავუკავშირდით, ერთ-ერთ ყველაზე მაღალმთიან სოფელ მთისპირში, მუნიციპალიტეტის მერის წარმომადგენელს, ქალბატონ მაია ჩავლეშვილს.
_მაცადეთ, მაცადეთ, „ხრეშიან „კამაზს “ მივდევ სასაფლაოსკენ. წვიმის შემდეგ ნიაღვრებმა მაინც დატოვა კვალი გზებზე და რა იცი რა ხდება… მალე დაგირეკავთ, _ მოგვესმა ქალბატონ მაიას აღელვებული ხმა.
_რა ხდება, უამინდობამ რაიმე ზარალი გამოიწვია სოფელში?
__სასაფლაოზე შესასვლელი გზაა გასაკეთებელი. დაზიანებულია. გამოგვიგზავნეს ხრეში და მივყვები ამ სატვირთოს. მე რას ვიზამ, მაგრამ სადმე რომ სახიფათო მონაკვეთი ან დაზიანება იყოს, ხომ უნდა მოვიმოქმედო დასახმარებლად რაიმე. რა იყო. არ გჯერათ? აგერ, ფოტოს მოგცემ, ოღონდ სადმე არ გამოაჩინოთ. მაცალეთ, ახლა სულის მოთქმა, აღმართში ვართ, _ კვლავ ჩქარ-ჩქარა გამოგვძახა მან და ტელეფონი გაგვითიშა დაპირებით, მე თვითონ მალე დაგირეკავთო.
(მკითხველს შევახსენებთ, რომ ეს ის მაია ჩავლეშვილია, მთისპირის ადმინისტრაციული ერთეულს ხელმძღვანელი, გასულ წელს, ერთ-ერთი სტიქიის დროს, თავად რომ ჩაუვარდა მანქანა ხრამში, უბნების შემოვლისას და მაშინაც შემოგვწყა, მაცადეთ სულის მოთქმა, მანქანა ჩამივარდა და უნდა ამოვიყვანოო. ავტ.)
ქალბატონი მაია მართლაც მალე შეგვეხმიანა და გვითხრა, რომ ხრეში „დაასაწყობა“ კონკრეტულ ლოკაციაზე და მერე სოფლის უბების დასათვალიერებლად გავიდა.
_არსად არ არის მნიშვნელოვანი დაზიანება. გზებზე ცოტა ზიანი არის, მაგრამ ამას ორიოდე დღეში მივხედავთ. ეს წვიმა მართლა მალამოსავით იყო ბუნებისთვის, ბაღ-ბოსტნებისა თუ ყანებისთვის, – გვითხრა უკვე დამშვიდებულმა ქალბატონმა.
კიდევ ერთი მაღალმთიანი ზონის სოფლის, სილაურის ადმინისტრაციული ერთეულის ხელმძღვანელმა, გოგიტა ჯანხოთელმა გვითხრა, რომ ამ დროისთვის არ წვიმს და გზების მსუბუქი დაზიანება შეინიშნება მხოლოდ.
_ახლა ეს წვიმა მისწრებაა ყანებისთვის. სასუქია მისაცემი. სიმინდს ვეგეტაციის პერიოდი აქვს და გვალვისგან ძლივს „იდგა ფეხზე“- მხიარულად საუბრობს ჯანხოთელი.
ჩვენ დავუკავშირდით დაბლობში მდებარე სოფლების ხელმძღვანელებსაც.
_შემოქმედში მშვიდობაა. უხვი იყო წვიმა, მაგრამ ხანმოკლე, ამიტომ ახლა ეს ნალექი ძალიან საჭირო იყო. მთავარია , ახლა არ გაგრძელდეს ხანგრძლივად. სიმინდის ყანებს და თხილის კულტურას ისეთი პერიოდი აქვს , ზედმეტი წვიმაც და გვალვაც გაანადგურებს. ამიტომ არის ხალხი მიჩერებული ახლა განსაკუტრებით ამინდზე , _ გვითხრა შემოქმედის ადმინისტრაციის ერთეულის ხელმძღვანლმა, თამაზ ბურჭულაძემ.
_ბოხვაურში მშვიდობაა. გაუმარჯოს წვიმას, დამშრალი ჭები და ასევე კალაპოტში მილეული მდინარეები სეივსო. გვეშველა, ხასიათზეც მოვედით, _ გვიპასუხა სოფელ ბოხვაურის ადმინისტრაციული ერთეულის ხელმძღვანელმა, თემურ ჩავლეშვიმა.
ავტორი: მარინა ჩიხლაძე
