ვიტალი კილასონია, აგრარული მეცნიერებების მაგისტრი:
“მე გახლავართ ჩოხატაურის მუნიციპალიტეტიდან, ვიტალი კილასონია, აგრარული მეცნიერებების მაგისტრი. დავასრულე უნივერსიტეტი და შემდგომ, დავიწყე სტაჟირება გაეროს პროგრამაში, ქედის მუნიციპალიტეტში, სადაც ვმუშაობდი ექსტენციის მიმართულებით ფერმერთან. ეს პროგრამა იყო ევროკავშირის დაფინანსებით, რომელმაც შეცვალა მთლიანად მაშინდელი ქედის მდგომარეობა და განავითარა ის ძალიან მნიშვნელოვნად. მარტო ეს ერთი მაგალითიც კი კმარა და ძალიან ბევრი ასეთი მაგალითია, სადაც ევროკავშირის გრანტები მიზნობრივად მოხმარდა კონკრეტულ თემს, კონკრეტულ რეგიონს. მე ვუჭერ ამას მხარს, ესაა ჩემი პოზიცია, რომ ევროკავშირთან ინტეგრაცია იძლევა ამ სიკეთეებს და ის პროპაგანდა, რომელიც დღეს მედიაში არსებობს გეებთან და LGBTQ თემასთან მიმართებით, არის ძალიან აზრს და ლოგიკას მოკლებული.
პირველ რიგში, მიმაჩნია, რომ მნიშვნელოვანია ჩვენი ევროკავშირში ინტეგრაცია; ეს, ერთი მხრივ, არის ეკონომიკური უსაფრთხოება და მეორე მხრივ _ სამხედრო უსაფრთხოება ჩვენი ქვეყნისთვის, რადგანაც დღეს კრიტიკულად საჭიროა ჩვენნაირი ქვეყნებისთვის ასეთი პარტნიორი.
ჩოხატაურის მაგალითზე შემიძლია გითხრათ, რომ ძალიან ბევრი პროექტი მუნიციპალიტეტში გახორციელდა ევროკავშირის გრანტების მიმართულებით. მახსენდება შვედეთის განვითარების ფონდის გრანტი, რომელიც გურიის ეროვნულ პარკს მოხმარდა, ვმუშაობდი მოსამზადებელ პროცესებში და ჩართული ვიყავი კომუნიკაციის ნაწილში მოსახლეობასთან. ეს პროექტები, რეალურად, ქვეყნის სახელსაც წინ წასწევს და ასეთი მიზნობრივი პროექტები ევროკავშირს აქვს ძალიან ბევრი. ეს არის ფაქტი, შეგვიძლია ვნახოთ ევროკავშირის ანგარიშები საქართველოსთან მიმართებით და ვნახავთ, რომ ძალიან დიდი ჩამონათვალია. მაგრამ საპირისპიროს ვხედავთ მედიაში, სამწუხაროდ, და ეს პროპაგანდა ხალხზეც მუშაობს.
შეუძლებელია დღეს გონიერ ადამიანს რუსეთისკენ გეჭიროს თვალი და ისევ რუსეთი გინდოდეს, რადგან მოსკოვს იქეთ რუსეთი არ არსებობს, იმიტომ, რომ რუსეთში არ არსებობს პოლიტიკა, რომელიც განავითარებს რეგიონებს. ჩვენს ქვეყანაშიც, სამწუხაროდ, ცენტრალიზებული პოლიტიკა გვაქვს და ახლა ვმუშაობთ დეცენტრალიზაციის პოლიტიკაზე, რაც მნიშვნელოვნად გააუმჯობესებს საკითხებს. ავსტრიაში როდესაც გახლდით გაცვლითი პროგრამით, ვიყავით ერთ-ერთ ოლქში დასავლეთ პროვინციაში და ვიკითხე დაბეგვრის შესახებю დაბეგრილი თანხა მუნიციპალიტეტში მთლიანად რჩებოდა მუნიციპალიტეტს. ასეთი საკითხები მნიშვნელოვანია გავიაზროთ და გავითვალისწინოთ ევროკავშირის პრაქტიკიდან და ევროპის მაგალითებიდან.
მიმაჩნია, რომ ჩვენი ევროკავშირთან ინტეგრაციის პროცესი აუცილებლად უნდა გაგრძელდეს და ეს ძალიან დიდ როლს მოუტანს ჩვენს ქვეყანას. მთავარი კონტრიბუტორი ჩვენი მოსახლეობა იქნება, რომელიც მიიღებს იმ სიკეთეებს, რომლებიც ევროკავშირს თან ახლავს; მუნიციპალური განვითარების პროექტებს… იგივე სურსათი ვთქვათ თუ გნებავთ: სურსათში, როდესაც ვიყავით საბჭოეთში მუშაობდა რუსეთის გოსტი – სტანდარტი. დღეს ვმუშაობთ HACCP ის სტანდარტით, რამაც მნიშვნელოვნად გააუმჯობესა სასურსათო პროდუქტების წილი და რაოდენობა ქვეყანაში და მნიშვნელოვნად შეცვალა ხარისხობრივი მაჩვენებლები. იგივე სოფლის მეურნეობის სექტორში, ევროკავშირის მიერ დახარჯული თანხები ძალიან დიდი და ძალიან მიზნობრივია, რაც აისახება რეგიონებზეც, იგივე აჭარის მაგალითი შემიძლია მოვიყვანო. როდესაც გუნდი კარგად მუშაობს და ადგილობრივი თვითმმართველობა კარგად მუშაობს, უფრო ხელშესახებია პროექტების შედეგები და ეს ხდებოდა აჭარაში ჩემს თვალს წინ, რასაც პირადად ვეცნობოდი და ეს იყო ჩემი პირველი გამოცდილება, რამაც კონკურენტული გამხადა ბაზრისადმი. ამიტომაც ვფიქრობ, რომ ევროკავშირთან ინტეგრაცია არის შეუქცევადი პროცესი და ამ გზიდან გადახვევა იქნება ჩვენთვის ძალიან დამაზარალებელი… მოგიწოდებთ მეგობრებო ერთიანობისკენ და სიკეთისკენ, რაც არის მნიშვნელოვანი. ჩვენ ვართ ძალიან მცირე ერი რაოდენობაში და მასაში, ჩვენ გლობალურ ერებს ვერ შევედრებით, ამიტომ, ჩვენ გვჭირდება კოლაბორაცია და ხელის ჩამორთმევა და არ შეიძლება ადამიანების ისე დაყოფა როგორც ვყოფთ ჩვენ ადამიანებს. წარმატებებს გისურვებთ და ბრძოლას ევროკავშირთან ინტეგრაციისთვის!”
“გურია ნიუსმა” მიიღო დაფინანსება ამერიკის შეერთებული შტატების საერთაშორისო განვითარების სააგენტოსგან (USAID).
“გურია ნიუსი” ინარჩუნებს სრულ სარედაქციო დამოუკიდებლობას.
“გურია ნიუსის” მიერ გამოქვეყნებული მასალა არ ასახავს USAID-ის ან ამერიკის შეერთებული შტატების მთავრობის პოზიციას.
