მონსტერა მარადმწვანე ბუჩქოვანი და ლიანა ჯიშის მცენარეა. იგი ჩვენს გარემოს კარგად არის შეგუებული.
ჩვენი მკითხველები ხშირად ინტერესდებიან, თუ სჭირდება მას განსაკუთრებული მოვლა, უფრო ზამთრის პირობებში და ადვილია თუ არა მცენარის გამრავლება.
მონსტერას, პირველ რიგში, დიდი ზომის ქოთანი სჭირდება. ოთახის პირობებში აუცილებელია კარგი განათება და საშუალო ტემპერატურაზე ყოფნა. რაც მთავარია, მონსტერა ხშირად უნდა “ტიროდეს” ანუ ფოთლების კიდეებზე წყლის წვეთები უნდა ჩანდეს. ზოგი მიიჩნევს, რომ ეს ზედმეტი მორწყვის შედეგია, თუმცა, ასეთ შემთხვევაში ამ ტროპიკულ მცენარეს, როგორც გამოცდილებამ აჩვენა, არ აკლია ტენი და თავს კარგად გრძნობს. ყურადღებით უნდა ვიყოთ და არ მოგვივიდეს ზედმეტად მორწყვა, რაც აუცილებლად გამოიწვევს მცენარის ლპობას.
მონსტერას გამოზამთრებისას მხოლოდ მორწყვა არ კმარა _ ფოთლებზე უნდა ვაპკუროთ წყლის წვეთები, როგორც ქვედა მხრიდან, ისე ზედაპირზე.
გურიაში, აპრილის ბოლოდან, მონსტერა გარეთ უნდა გავიტანოთ. უმჯობესია, მოვათავსოთ ფოთლოვანი ხეების ქვეშ და არა მზის გულზე ან თუნდაც აივანზე. ეზოში, ფოთლოვანი ხე-ცენარეების ქვეშ მოთავსებული მონსტერა საუცხოოდ გრძნობს თავს და არაჩვეულებრივად იფოთლება. ასევე, ივითარებს კარგად დაკბილულ ფოთლებს, ტენისა და ჩრდილის წყალობით. თუ მზიან ადგილზე დავდგამთ, ადვილად გახმება ან ლამაზად დაკბილულ ფოთლებს არ გაიკეთებს.
რაც შეეხება მონსტერას გამრავლების მეთოდს, ზოგჯერ ბუჩქოვანი ჯიში იკეთებს ამონაყარს და ჩვეულებრივად ძირში მივაჭრით, შემდეგ კი წყალში დავაფესვიანებთ. ასევე, ადვილად ფესვიანდება ნიადაგშიც. ადვილად მრავლდება როგორც საჰაერო ფესვებით, ისე ღეროს მეშვეობით.
ღეროთი გამრავლება _ თებერვლის ბოლოს მოვაჭრათ შედარებით ზედმეტად მიჩნეული, ფესვთან ახლოს გამომავალი ღერო. მერე გადავჭრათ მუხლების ადგილზე და ჩავფლათ კარგად განოყიერებულ მიწაში, ოთახის პირობებში. ასევე, ადვილად დაფესვიანდება წყალშიც. დაფესვიანებული ტოტი ჯერ მოვათავსოთ პატარა ქოთანში და მაისამდე ეზოში არ გავიტანოთ.
მონსტერას ლიანა სახეობის ჯიში შეიძლება გავახაროთ ჰაეროვანი ფესვის მეშვეობით, იგივე წესით _ მოვჭრათ და წყალში ან კარგად განოყიერებულ ნიადაგში ჩავრგოთ.
ჩვენს პირობებში ადვილი მოსავლელი და ერთნაირად ლამაზია, როგორც ბუჩქოვანი, ისე ლიანა ჯიშის მონსტერა.
