“სცენარი იყო ძალიან კონკრეტული _ რუსეთს დიდი ხნით ადრე გადაწყვეტილი ჰქონდა კოსოვოს შემდეგ საქართველოში შემოჭრა” _ ეს განცხადება საქართველოს მესამე პრეზიდენტმა მიხეილ სააკაშვილმა სამაუწყებლო კომპანია ,,რუსთავი2-ის” ეთერში გადაცემა ,,არჩევანში” კითხვის _ შეიძლებოდა თუ არა 2008 წლის ომის თავიდან აცილება _ გააკეთა.
სააკაშვილის თქმით, საქართველოს ომის თავიდან აცილების შესაძლებლობა არ ჰქონდა და მას მაგალითად უკრაინა მოჰყავს _ პროვოკაციის თავიდან აცილების მიზნით უკრაინა ყირიმში საომარი მოქმედებების დაწყებისას არაფერი გააკეთა, თუმცა, უმოქმედობას მოჰყვა დომბასი და სისხლისღვრა.
„მსოფლიოში არც ერთი ტანკი არ დაფრინავს და რუსული ტანკი, მითუმეტეს. რანაირად აღმოჩნდა ის ტანკი ჩვენს ტერიტორიაზე?! ახლა ხდება სიტუაციის გაყალბება. რუსეთს დიდი ხნით ადრე გადაწყვეტილი ჰქონდა კოსოვოს შემდეგ საქართველოში შემოჭრა. მე გამაფრთხილა რუსეთის პრეზიდენტის მრჩეველმა, რომ მომზადებულია საქათველოში შეჭრის გეგმა. ჩვენ ეს ვიცოდით. მე გავაფრთხილე ამერიკაც, ამის შესახებ იწერებოდა სტატიები, გამოიცა წიგნები, რომ რუსეთი აპირებდა საქართველოში შემოჭრას.
სცენარი იყო ძალიან კონკრეტული. ამის შემდეგ ატყდა ამბავი ცხინვალში და ჩვენ იძულებული ვიყავით, გაგვემაგრებინა ხეობა. ისინი ღიად აცხადებდნენ, რომ გაწმენდდნენ ხეობას ბანდიტებისგან. შემდეგ იქ მოხდებოდა პატარა აჯანყებასავით, წამოვიდოდნენ წინ, გაწმენდდნენ ხეობას, ეს ლტოლვილები დაიძვრებოდნენ თბილისისკენ. შემდეგ თბილისში დაიწყებოდა არეულობა. ის ხალხი, ვინც ახლა გვადანაშაულებს, რომ პროვოკაციას წამოვეგეთ, ატეხდნენ ერთ გნიასს და ვაიუშველებელს, რომ სუსტი, არაფრის მაქნის მთავრობა გვყავს, რომელიც არ იცავს ჩვენს ლტოლვილებს და ჩვენს ხეობას. შემდეგ მოვიდოდა გაურკვეველი შეიარაღებული ძალები, რომლებზეც იტყოდნენ, რომ ეს არის ოსურ-ქართული დაჯგუფება, რომელიც აიღებდა ხელისუფლებას ხელში. ზუსტად ასე მოხდა ყირიმში. მხრებს აიჩეცავდა მსოფლიო _ რაღაც გაუგებრობა მოხდა, მოდი საერთაშორისო კომისია შევქმნათ, რა არის ეს ზუსტად… ეს იყო სცენარი. სცენარი იყო საქართველოს და თბილისი აღების. ჩვენ ეს სცენარი შევაჩერეთ, თუმცა მიმაჩნია, რომ გავაჩერეთ დაგვიანებით, მაგრამ ჩვენ გადავარჩინეთ ქართული სახელმწიფო და უფრო გაძლიერებული მივიყვანეთ 2012 წლამდე, სადაც რუსეთმა არ ჩაატარა შემდეგი სპეცოპერაცია არჩევნებში გამარჯვებით. თუმცა, ამ არჩევნებს წინ უძღოდა ბავშვის მკვლელობა და ციხის დადგმული კადრები“, _ განაცხადა მიხეილ სააკაშვილმა.
