გურიის რეგიონში იწყება ახალი პროექტი „მწვანე გურია – ადგილობრივი დემოკრატიისა და სოფლის განვითარების მხარდაჭერა ინკლუზიური და მდგრადი მწვანე ზრდისთვის“.
პროექტს ევროკავშირის ფინანსური მხარდაჭერით ახორციელებს CENN პარტნიორ ორგანიზაციებთან, ახალგაზრდა პედაგოგთა კავშირთან, დემოკრატიის ინსტიტუტთან და ქედის ადგილობრივი განვითარების ჯგუფთან (LAG) – თანამშრომლობით, ევროკავშირის მხარდაჭერით მიმდინარე სოფლისა და სოფლის მეურნეობის განვითარების ევროპის სამეზობლო პროგრამის ENPARD IV-ის ფარგლებში.
აღნიშულ პროექტთან დაკავშირებით, ჩოხატაურის, ლანჩხუთისა და ოზურგეთის მუნიციპალიტეტების მერიის თანამშრომლებთან საინფორმაციო შეხვედრები უკვე ჩატარდა.
რას ითვალიწინებს პროექტი „მწვანე გურია – ადგილობრივი დემოკრატიისა და სოფლის განვითარების მხარდაჭერა ინკლუზიური და მდგრადი მწვანე ზრდისთვის“ _ ამის შესახებ “გურია ნიუსი” ორგანიზაცია CENN-ის პროექტის მენეჯერს, ნინო გაფრინდაშვილს ესაუბრა.
“ CENN-მა ევროკავშირის მხარდაჭერით ოზურგეთის, ლანჩხუთის და ჩოხატაურის მუნიციპალიტეტებში დაიწყო პროგრამის განხორციელება „მწვანე გურია – ადგილობრივი დემოკრატიისა და სოფლის განვითარების მხარდაჭერა ინკლუზიური და მდგრადი მწვანე ზრდისთვის“.
ზოგადად, ევროკავშირი მხარს უჭერს საქართველოში სოფლის განვითარებას.
ENPARD IV –ის ფარგლებში, დავიწყეთ გურიაში მუშაობა. პროექტის ზოგადი მიზანია, სიღარიბის შემცირება და მოწყვლადი თემებისთვის ეკონომიკური, სოციალური, საცხოვრებელი პირობების გაუმჯობესება”,_ ამბობს გაფრინდაშვილი და აღნიშნავს, რომ პროექტი 4 ძირითადი კომპონენტისგან შედგება:
_ პირველი კომპონენტია ოზურგეთის, ლანჩხუთის და ჩოხატაურის მუნიციპალიტეტებში LAG-ების შექმნა და მათი ინსტიტუციონალური გაძლიერება. Local Action Group – ეს არის ერთგვარი აქტიურ მოქალაქეთა გაერთიანება, რომელიც გააერთიანებს როგორც საჯარო, ისე კერძო და სამოქალაქო სექტორის წარმომადგენლებს. მაგალითად, პედაგოგებს, ახალგაზრდებს, ყველა დაინტერესებულ ადამიანს, ვისაც სურს რომ აქტიურად ჩაერთოს სოფლის განვითარების მიმართულებით თავიანთ რეგიონში. პროექტი მთლიანად ითვალისწინებს ლიდერ მიდგომას, რომელიც გულისხმობს ადგილობრივი შესაძლებლობების გაძლიერებას ადგილობრივი სტრატეგიის შექმნისა და რესურსების გამოყენების გზით. ამ მიდგომით, სოფლის განვითარების მთავარი ინსტრუმენტი ადგილობრივი განვითარების ჯგუფებია, ხოლო განვითარების მთავარი რესურსი – სოფლის ადგილობრივი მოსახლეობა, რომელსაც შეუძლია, მიიღოს სწორი გადაწყვეტილებები არსებული სოციალურ-ეკონომიკური, კულტურული და გარემოსდაცვითი პირობების გათვალისწინებით. ამ ევროპული გამოცდილების მიხედვით, აღნიშნული LAG-ები გურიის სამივე მუნიციპალიტეტში შეიქმნება.
რაც შეეხება მეორე კომპონენტს, როდესაც ჩამოვაყალიბებთ აღნიშნულ LAG-ებს, სამივე მუნიციპალიტეტისთვის შეიქმნება ადგილობრივი განვითარების სტრატეგიები თანამონაწილეობორივი გზით და თვითონ ადგილობრივები გამოავლენენ იმ საჭიროებებსა და პრიორიტეტულ მიმართულებებს, რომელიც მათი ხედვით, მნიშვნელოვანია თავიანთი რეგიონის განვითარებისთვის.
მესამე კომპონენტი იქნება უკვე ადგილობრივი ეკონომიკის გამწვანება და დივერსიფიკაცია, ინოვაციური და სხვადასხვა სადემონსტრაციო ღონისძიებების გახორციელებით. საგრანტო რესურსი არის გამოყოფილი, რომლის ფარგლებშიც მოხდება სხვადასხვა ინიციატივების, ბიზნესების, სოციალური პროექტების განხორციელება.
მეოთხე კომპონენტი არის სამოქალაქო ჩართულობის პროცესების ხელშეწყობა და ქალების, ახალგაზრდების, ადგილობრივი სამოქალაქო ორგანიზაციებისა და საზოგადოების გაძლიერება, რათა მათ დაიცვან თავიანთი უფლებები და მოახდინონ სხვადასხვა საკითხის ადვოკატირება მოწყვლადი ჯგუფებისათვის ხარისხიანი სახელმწიფო სერვისებისა და სამართლიანი და მდგრადი პოსტკოვიდური მდგომარეობის უზრუნველსაყოფად.
რაც შეეება ჩვენს კითხვას იმის შესახებ, თუ როგორ უნდა მოხდეს ქალების და სხვდასხვა მოწყვლადი ჯგუფების პროექტში ჩაბმა, ნინო გაფრინდაშვილი გვპასუხობს, რომ საამისოდ ტრენინგები და ვორქშოპებია დაგეგმილი.
“პროექტის ფარგლებში დაგეგმილია სხვადასხვა ტრენინგები, ვორქშოპები, ვიზიტები, როგორც საქართველოს მასშტაბით, ასევე ევროპის ფარგლებში. შესაბამისად, ამ ცოდნის და უნარების გაძლიერებით მოხდება ქალებთან და სხვადასხვა მოწყვლად ჯგუფებთან მუშაობა”,_ ამბობს გაფრინდაშვილი.
ავტორი
