კოცონი, პლედი, ჰამაკი, ტყე, ნისლი, ცხელი ჩაი _ ეს ყველაფერი ზაფხულში, როცა ირგვლივ თითქმის ყველაფერი სიცხისგან იწვის, ბახმაროში დასვენების განუყოფელი ატრიბუტია.
თუმცა, წელს გურიის ლეგენდარული კურორტი დამსვენებლების ნაკლებობას განიცდის. ისინი კი, ვინც ბახმაროში იმყოფებიან, უამინდობისა და გზების სარეაბილიტაციო სამუშაოების გამო წუწუნებენ და ამბობენ, რომ ავტომობილებს ტალახში გადაადგილება უჭირთ. ბახმაროში დასვენების მსურველთა ნაწილს კი ფასები არ ეჭაშნიკება და ამბობენ, რომ ქირაში მოთხოვილი საფასური აღემატება იმ საყოფაცხოვრებო პირობებს, რისი შეთავაზებაც რეალურად გამქირავებლებს შეუძლიათ. ამის შესახებ სოციალურ ქსელებში არაერთი პოსტი იწერება.
რა ვითარებაა კურორტზე, რა კეთდება, როგორია გასაქირავებელი ბინების ფასები და ვინ ადგენს მას _ ამ საკითხების შესახებ ჩოხატაურის მუნიციპალიტეტის მერის წარმომადგენელს დაბა ბახმაროში, რომან კალანდაძეს ვესაუბრეთ.
რომან კალანდაძის ინფორმაციით, ბახმაროში წელს შარშანდელთან შედარებით ცოტა დამსვენებელი იმყოფება. ეს კი მერის წარმომადგენლის თქმით, კურორტზე დასვენების ღირებულების გამო კი არა უამინდობით არის გამოწვეული.
„დამსვენებლების რაოდენობა ბახმაროში ძალიან ცოტაა შარშანდელთან შედარებით ამინდებიდან გამომდინარე. სულ წვიმებია.
რაც შეეხება აქ დასვენების ფასებს, ჩემი ინფორმაციით, შარშანაც თითქმის იგივე იყო, ღირებულება, რაც წელსაა. ფასების განსაზღვრა ინდივიდუალურად, მესაკუთრის მიერ ხდება. მაგალითად, ყველაფრით მოწყობილი კარგი კოტეჯი, სადაც მარტო თეთრეული ესაჭიროება ადამიანს 2500-იდან 3 000- ლამდე ღირს. არის 1000-იანებიც. 600-700-იანებიც, მაგრამ კომფორტის მიხედვით. ეს ფასი განსაზღვრავს 22 დღეს“,_ ამბობს მერის წარმომადგენელი.
კალანდაძის თქმით, გზის სარეაბილიტაციო სამუშაოები მიმდინარეობს რამდენიმე მიმართულებით. ბეტონის საფარს აგებენ. მონტაჟდება ელექტროგაყვანილობის ბოძებიც. ძველი ბოძების დამონტაჟება კი შიდა საუბნო გზებზეა დაგეგმილი.
„მიმდინარეობს გზის რეაბილიტაცია ჩოხატაურის ქუჩაზე, გურიის ქუჩაზე ნამანევის მიმართულებით, დუმბაძის ქუჩაზე იგება ბეტონის საფარი. ახლა დაიწყება მოხრეშვის სამუშაოებიც. ასევე სანატორიუმის ეზოდან მანიშნებელ 2050-ამდე საქუჩო განათების მოწყობითი სამუშაოები უკვე დაწყებულია, ბოძებიც დასობილია და ა.შ. ამ ბოძებით, რომელიც მოითხარა, შევდივართ შიდა უბნებში. რაც შეეხება პარკს, სრულდება და 19 აგვისტოს ალბათ გაიხსნება“,_ ამბობს კალანდაძე.
ერთ-ერთი ყველაზე აქტუალური პრობლემა კი ბახმაროზე წყალს უკავშირდება. მოსახლეობას, ვისაც კერძო წყალი არ აქვს, წყალი მხოლოდ დილით, ისიც მერის წარმომადგენლის თქმით, ორი საათით მიეწოდება.
როგორც კალანდაძესთან საუბრის შედეგად ვარკვევთ, პრობლემის აღმოსაფხვრელად ახლა სამუშაოები მიმდინარეობს, თუმცა როგორც ჩანს, ინგოროყვას ბასეინებზე წყალგაყვანილობის დაერთების შემდეგ პრობლემა სრულად მაინც ვერ აღმოიფხვრება და მოსახლეობას წყალი ისევ გრაფიკით მიეწოდება.
„წყალს რაც შეეხება, რაც ჩვენ დაქვემდებარებაში არის ბუკნარის ქუჩა, ვაკიჯვარი, ინგოროყვა, მახარაძე, ხიდისთავი, ბაზრის დაღმართი, დიდი და პატარა დავითიანი, ამბულატორიის ქუჩა. წყალის გამოყვანა დაწყებულია, უკვე დამატებითი რესურსის და ალბათ, ხვალ ან ზეგ დაერთდება ინგოროყვას ბასეინებზე.
წყალი გრაფიკით არის, ახლა დებეტი დაემატება, გუშინ წინ დავიწყეთ რეაბილიტაცია და შარშანდელთან შედარებით უკეთესი მდგომარეობა გვექნება ამ ქუჩებზე წყალთან დაკავშირებით. წყალი მიეწოდება მოსახლეობას დილას 2 საათით, დაერთების მერეც იქნება გრაფიკი, მაგრამ მდგომარეობა გაუმჯობესდება.
დანარჩენ ქუჩებზე ყველას თავის კერძო წყალი აქვს“,_ ამბობს კალანდაძე.
ავტორი
