გენდერული თანასწორობის კვირეულის ფარგლებში, ჩოხატაურის მუნიციპალიტეტის გენდერული თანასწორობის საბჭომ სოფელ ზოტში გასვლითი სხდომა ჩაატარა.
აღსანიშნავია, რომ პანდემიის დაწყებიდან ეს პირველი შეხვედრაა, რომელიც მურთაზ ირემაძის სახელობის საჯარო სკოლაში გაიმართა.
საბჭოს შეხვედრას ესწრებოდნენ წარმომადგენლები მუნიციპალიტეტის მერიიდან, ზოტში მცხოვრები ქალები და ახალგაზრდები.
შეხვედრაზე განიხილეს რამდენიმე მნიშვნელოვანი თემა, რომლებიც ემსახურება გენდერული პოლიტიკის ადგილობრივ დონეზე გახორციელებას და ქალთა გაძლიერებას სხვადასხვა მიმართულებებით. ისაუბრეს პრობლემებსა და გამოწვევებზე.
შეხვედრა ზოტში
როგორც შეხვედრის გახსნისას გენდერული საბჭოს მდივანმა მარინე ბერაძემ თქვა, წელს გენდერული თანასწორობისა და სოლიდარობის კვირეული პირველად ტარდება.
“წელს პირველად მიიღო ჩვენმა ხელისუფლებამ გადაწყვეტილება, რომ არ იყოს მხოლოდ 3 მარტის და 8 მარტის აღნიშვნა და გამოაცხადა გენდერული თანასწორობისა და სოლიდარობის კვირეული, რომელიც მოიცავს გაზაფხულის დღესასწაულებს”, _ თქვა ბერაძემ.
დამსწრე საზოგადოების წინაშე სიტყვით გამოსვლისას ჩოხატაურის მუნიციპალიტეტის მერმა, ირაკლი კუჭავამ თქვა, რომ თანამედროვე ცხოვრებაში გენდერულ თანასწორობას დიდი მნიშვნელობა აქვს და ქალების მოხსენიება მხოლოდ სადღეგრძელოში საკმარისი არ არის:
“თანამედროვე ცხოვრებაში გენდერულ თანასწორობას გადამწყვეტი მნიშვნელობა აქვს. ინსიტუციების დონეზე უნდა მოხდეს ეს ყველაფერი. უნდა მოისპოს ადამიანებში განცდა, რომ კაცი არის განსაკუთრებული. ქალის როლი მარტო სადღეგრძელოში არ კმარა. არ უნდა დაგვემართოს ის, რაც ხანდახან ქალთა უფლებადამცველებს ემართებათ, მაგალითად, ჩოგბურთელ ბასილაშვილთან მიმართებაში _ კაცთმოძულეობაში არ უნდა გადავიდეს ქალთა უფლებების დაცვა. ქალიც დასაცავია და კაციც, ქალი და კაცი თანაბრად უნდა შრომობდნენ. ჩვენ თანაცხოვრების მეგზურს ისე თუ შევხედავთ, როგორც უნდა ვუყურებდეთ, უფრო გაგვიადვილდება ცხოვრება. ქალის და კაცის ერთობლივი ძალისხმევა ოჯახთან მიმართებაში გადამწყვეტია”, _ აღნიშნა ირაკლი კუჭავამ.
ჩოხატაურის მუნიციპალიტეტის საკრებულოს და გენდერული საბჭოს თავმჯდომარემ, ზაალ მამალაძემ თქვა, რომ მსგავსი შეხვედრების გამართვა მნიშვნელოვანია. მისი თქმით, რომ არა პანდემია, ამ შეხვედრის ჩატარება ჯერ კიდევ გასულ წელს იგეგმებოდა:
“შარშან თებერვალში დავგეგმეთ, რომ პირველი გასვლითი შეხვედრა იქნებოდა თქვენთან, მაგრამ პანდემიის გამო შევჩერდით ერთი წელი. როგორც კი გაჩნდა შეხვედრის, კონცერტის ჩატარების შესაძლებლობა, თქვენგან დავიწყეთ, იმიტომ, რომ ზოტი ჩვენი უსაყვარლესი სოფელია. რამდენიმე პროექტი გვაქვს დაწყებული და აუცილებლად ყველაფერში იქნებით ჩართულები, განსაკუთრებით, ქალბატონები”, _ თქვა ზაალ მამალაძემ.
ზაალ მამალაძე: “თქვენგან დავიწყეთ, იმიტომ, რომ ზოტი ჩვენი უსაყვარლესი სოფელია”
დარბაზში შეკრებილ ადამიანებს გააცნეს ის სოციალური პროგრამები, რითაც სარგებლობა შეუძლიათ.
გენდერული საბჭოს მდივანმა მარინე ბერაძემ დამსწრეთ დეტალურად მოახსენა კონკრეტული პროგრამის _ “გენდერული თანასწორობის უზრუნველყოფისა და ოჯახში ძალადობის აღმოფხვრის ხელშეწყობის” შესახებ.
ბერაძემ აღნიშნა, რომ დახმარების მიღება თანაბრად შეუძლიათ, როგორც ძალადობის მსხვერპლ ქალებს, ასევე, არასრულწლოვნებსსა და კაცებს. თუმცა, ბერაძის თქმით, დახმარების თხოვნით, ჯერჯერობით, კაცის მიმართვა არ დაფიქსირებულა:
“არ იგულისხმება მხოლოდ ძალადობის მსხვერპლ ქალთა დახმარება. პრაქტიკაში გვქონია შემთხვევა, რომ მოუმართავთ და გაგვიწევია დახმარება ოჯახში ძალადობის მსხვერპლ არასრულწლოვნებისთვისაც. ჯერ მამაკაცებს არ მოუმართავთ, მაგრამ თუ იარსებებს მსგავსი ფაქტი, ჩვენ ასევე ჩავერთვებით მათი რეაბილიტაციის პროცესში”, _ თქვა ბერაძემ.
შეხვედრაზე ყურადღება გამახვილდა იმ პრობლემებზე, რაც სოფლად მცხოვრებ ქალებს აწუხებთ.
როგორც შეხვედრაზე აღინიშნა, სოფელში არ არის კომუნიკაციის საშუალებები, არ არის კავშირგაბმულობის სისტემა, მობილური ტელეფონის გამოყენება მხოლოდ “ჯეოსელის” აბონენტებს შეუძლიათ, მაგრამ სიგნალი სუსტია.
როგორც შეხვედრაზე აღინიშნა, კომპანია “ჯეოსელი” სიგნალის გაძლიერებას აპირებს.
განხილვის შედეგად მნიშვნელოვან თემად დასახელდა ქალთა ეკონომიკური გაძლიერება, კონკრეტულად, ისაუბრეს მაღალმთიანი დასახლების თემში მცხოვრები ქალების საჭიროებებისა და დაბრკოლებების შესახებ მცირე მეწარმეობის განვითარების მიმართულებით.
ზოტის საჯარო სკოლის დირექტორი, ზაზა ანთაძე “გურია ნიუსთან” საუბრის დროს აღნიშნავს, რომ ქალები უფრო აქტიურად არიან სოფლის ცხოვრებაში ჩართული:
“ახლა ქალები და გოგონები უფრო აქტიურად არიან ჩაბმულები ყველა სფეროში, ვიდრე _ მამაკაცები. ჩემი მეუღლეც მასწავლებელია. აღარ არის ისე, როგორ ძველად როგორც იყო _ ქალს ჩადრი უნდა ჰქონოდა ჩამოფარებული, წინ ვერ წავიდოდა, მამაკაცს თავის თავზე უნდა ყველაფერი აეღო. მოკლედ რომ ვთქვა, “ქალი კუხნაში” აღარ არის. გასულ წლებთან შედარებით ძალიან დიდი პერსპექტივაა და უმეტესად, ქალები არიან ჩართული პროექტებში. ჩვენი სკოლის მასწავლებელმა კონკურსში _ “აწარმოე საქართველოსთვის”, გაიმარჯვა და სამკერვალო გახსნა. დაფინანსდა, ასევე, ჩემმა მეუღლის პროექტი და ინკუბატორი აქვს. ქალები აქტიურად არიან ჩართული სოფლის ცხოვრებაში”, _ გვითხრა ანთაძემ.
შეხვედრაზე დაიგეგმა სამომავლო თანამშრომლობა და აღინიშნა მოქალაქეთა ჩართულობის გაზრდის მნიშვნელობა მუნიციპალიტეტის გენდერული პოლიტიკის გახორციელებაში.
გარდა ამისა, როგორც ცნობილი გახდა, ზოტში მცხოვრებ ქალებს რძის გადამამუშავებელ საწარმოში დასაქმების საშუალება ეძლევათ, რაც მათ ფინანსურ დამოუკიდებლობას მოუტანს.
“შეიქმნა საკმაოდ მრავალრიცხოვანი კოოპერატივი _ გახორციელდა “სათიბ-საძოვრების რეაბილიტაციის პროექტი”. 240 000 ლარის დახმარება მიიღო კოოპერატივმა სახელმწიფოსგან. თანადაფინანსება შეადგენდა 10%-ს. გადაეცათ ახალი ტექნიკა, ტრაქტორი თავის მისაბმელებით და კოოპერატივს აქვს საშუალება, რომ აწარმოოს თივა. ამ კოოპერატივმა, რომელსაც 105 სული პირუტყვი ჰყავს თავის საკუთრებაში, კიდევ გაიმარჯვა ერთ კონკურსში და მიიღო დაფინანსება პროექტისთვის _ “რძის გადამამუშავებელი” და მიიღო 240 000 ლარი. თავიანთი სახსრებით ააშენეს შენობა, რაშიც ისევ სახელმწიფო პროგრამა _ “იაფი აგროკრედიტი” დაეხმარა. აშენდა შენობა, თვის ბოლოს დანადგარები უნდა ჩამოუვიდეთ და დაიწყებენ რძის პროდუქტების გადამუშავებას. რძის ქარხანა. აქ საქონელი ყველას ჰყავს და რძის ჩაბარებით დამოუკიდებელი შემოსავალი გაუჩნდებათ.
ქალი თუ კაცი, ვინც ფინანსურად დამოუკიდებელია, ძლიერია. უნდა შევქმნათ ფინანსური დამოუკიდებლობა ოჯახშიც და ოჯახს მიღმაც”,_ გვითხრა სოფლის მეურნეობის სამინისტროს საინფორმაციო საკონსულტაციო ცენტრის მთავარმა სპეციალისტმა ჩოხატაურში მანანა მინდაძემ.
შეხვედრის დასრულების შემდეგ, ჩოხატაურის მუნიციპალიტეტის კულტურის ცენტრთან არსებულმა ვარდო თოდრიას სახელობის ანსამბლმა “ნართმა” ადგილობრივი მოსახლეობისთვის კონცერტი გამართა.
