ჩვენ ახლახან ვწერდით, რომ ოზურგეთში, თაყაიშვილის ქუჩაზე, სადაც უამრავი სასურსათო მარკეტი თუ საყოფაცხოვრებო მაღაზიაა განთავსებული, ამკრძალავი საგზაო ნიშნები განათავსეს. ამას კი აქ დასაქმებულთა პროტესტი და გულისტკივილი მოჰყვა. ისინი ამბობდნენ, რომ არცერთი სხვა გზა არ არსებობს, საიდანაც ისინი მაღაზიებში საკმაოდ დიდი რაოდენობის ტვირთს შეიტანენ და უკვე დააჯარიმეს კიდეც სადისტრიბუციო მანქანები. ასევე ისინი გულისტკივილს გამოთქვამდნენ იმის გამო, რომ მათი, როგორც მეწარმის გასაჭირს, სჭირდება გულისყურით მიდგომა და დახმარება, რომ ეს დაბრკოლება არ გაჩნდეს მათ წინააღმდეგ.
_ ეს ყველაფერი ჩვენი საქმიანობის კი არადა, სუნთქვის აკრძალვის ტოლფასია. საიდანაც გინდათ, იქედან შეიტანეთ საქონელიო და ფრენა დავიწყოთ? თუ ტომრები, ყუთები როგორ შემოვიტანოთ, თუ დისტრიბუციის მანქანა არ გაჩერდა? _ აცხადებდნენ ისინი.
„გურია ნიუსს“ აღნიშნულის თაობაზე, მუნიციპალური ინსპექციის უფროსმა, გენადი კიშინსკიმ უპასუხა _ „მე ვინ ჯანდაბა ვარ, საკრებულოს გადაწყვეტილებაა და მათ ჰკითხეთო“.
ჩვენ შევხვდით ოზურგეთის მუნიციპალიტეტის მერიისა და საკრებულოს ხელმძღვანელ პირებს:
_ დღეს, დილიდანვე უკვე გვქონდა აღნიშნულის თაობაზე თათბირი. აუცილებლად, დუყოვნებლივ დავეხმარებით ამ ადამიანებს. აქ იყვნენ მოსული და იქაც, ადგილზე შევხვდებით, _ გვითხრა მუნიციპალიტეტის მერის მოადგილემ, გურამ გოლიაძემ.
_ საკრებულოს არანაირი გადაწყვეტილება არ მიუღია. ეს იყო საგზაო დეპარტამენტის მითითება. თქვენ იცით, რომ იქ გზაჯვარედინია და დიდი ტრაილერების გამო, იქმნება ხანგრძლივი საცობი. ამიტომ იყო მისაღები იქ საგზაო ნიშნის დადგმა. თუმცა, ჩვენ აუცილებლად მოვახერხებთ, რომ იქ დასაქმებულ ადამიანებს პრობლემა არ შეექმნათ და გამონაკლისის სახით დისტრიბუციის მანქანებს გარკვეული დროით გაჩერების შესაძლებლობა მიეცეთ. რა თქმაა „ჯანდაბა ვარ და საკრებულომ გადაწყვიტა“, რა გადავწყვიტეთ ჩვენ? _ თქვა ოზურგეთის მუნიციპალიტეტის საკრებულოს თავმჯდომარემ დავით დარჩიამ.
რაც შეეხება ოზურგეთის მუნიციპალიტეტის მუნიციპალური ინსპექციის უფროსს, გენო კიშინსკის, რომელმაც „ჯანდაბა“ თავად უწოდა საკუთარ თავს, საინტერესოა, რატომ ირჩია ეს სახელი და იმის ნაცვლად, რომ თავად ეზრუნა გარკვეული ფორმით მცირე მეწარმეთა დახმარებისთვის, უცნაური ტყუილი გვითხრა. თუ მისთვის მარტო ის არის მთავარი, რომ იმავე ქუჩაზე, ცენტრალურ ადგილზე განთავსებული მაღაზიების მეპატრონეებმა მისგანვე ნაქირავები (იქვე ცხოვრობს) ფართის ფული დროულად გადაუხადონ და მეტი არაფერი? არადა, უფროსი ჰქვია ამ კაცს, როგორც თავად გვითხრა, „ჯანდაბა” უფროსი.
რაც შეეხება თაყაიშვილის ქუჩაზე მომუშავე მცირე მეწარმეებს, ამ დილით კმაყოფილება გამოთქვეს, რომ მუნიციპალიტეტის ხელმძღვანელობამ მოუსმინა მათ და დაწყებულია შესაბამისი რეაგირება.
„გურია ნიუსი“ კვლავ მიუბრუნდება ამ საკითხს.
ავტორი
