მარტის ბოლოს და აპრილის დასაწყისში თუ ამ დროისთვის იშვიათი ბუნებრივი გამოვლინების _ თოვლის ან ძლიერი ყინვის გამო არ მოხდება შეფერხება, შესაძლებელია, ღია გრუნტში დავთესოთ ისეთი ბოსტნეული, როგორიცაა ოხრახუში, ნიახური, თვის ბოლოკი, მწვანე ხახვი, წიწმატი, ქინძი, ნიორი, მხალეული. ამ ბოსტნეულს საკმაო მედეგობა ახასიათებს შედარებით დაბალი ტემპერატურის მიმართ, ვიდრე კიტრს, გოგრას, პომიდორს თუ ბადრიჯანს.
თუ მეურნე დაინტერესებულია, მალე მოხდეს ბოსტნეულის ზრდა-განვითარება, მარტივი კვალსათბურის მოწყობა ადვილი მოსახერხებელია, რომელიც ცელოფნით უნდა გადავხუროთ. თუმცა, მათთვის, ვინც სისტემატურად თესავს შესაბამის დროს ბოსტნეულს და საბოსტნე მეურნეობა მოწესრიგებული აქვს, გასული წლის სექტემბრიდან დათესილი აღნიშნული ბოსტნეული, ამ დროისთვის, საკმაოდ აქვს ოჯახში მოსახმარად და ახლა დათესვა ჩასანაცვლებლად არის აუცილებელი. ამიტომ, ღია გრუნტში დათესვა არ უნდა შეგვეშინდეს იმის გამო, რომ ზრდის პროცესი, შესაძლოა, შედარებით დაბალი ტემპერატურის გამო, ნელი ტემპით მოხდეს.
რაც შეეხება გოგრასა და კიტრს, ზოგადად გოგროვანებს, ისინი ძალიან მგრძნობიარე არიან სიცივის მიმართ. ამიტომ დათესვისთანვე აუცილებლად უნდა დავხუროთ ცელოფნით ან სათბურში გამოვიყვანოთ ჩითილების სახით.
მარტის ბოლოდან, ასევე, უნდა ვიზრუნოთ ბადრიჯნის, წიწაკის, პომიდვრის, შაშტრამის და რეჰანის ჩითილების გამოყვანაზე. სასურველია ერთჯერადი ცელულოიოდის ჭიქებში ან სახელდახელოდ გაკეთებულ მცირე ზომის ქოთნებში ჩავყაროთ კარგად განოყიერებული მიწა, ჩავრგოთ და აპრილის ბოლომდე დავტოვოთ ჩითილები. შემდეგ კი გავიტანოთ ღია გრუნტში.
ამ დროისთვის სასურველია მოვასწროთ გადაბარვა, ორგანული ნაკელის შეტანა ჩვენს ნაკვეთებში. ასევე, საჭიროა, წინასწარ მოვამზადოთ პატარ-პატარა ორმოები ჩითილებისთვის. ჩავყაროთ ნეშომპალა, გადამწვარი ნაკელი და ასე დავტოვოთ აპრილის ბოლომდე, ვიდრე ჩითილებს არ ჩავრგავთ.
