როგორ უნდა ვიმოქმედოთ, თუ მანქანა წყალში გადავარდა და მანქანაში ვართ

მანქანის წყალში ვარდნისთანავე – ტბა იქნება ეს თუ მდინარე, შეიხსენით ღვედი და ჩაუწიეთ ფანჯარას, ასევე, განბლოკეთ კარები (ელექტრომოწყობილობები, მათ შორის, მინის ჩამწევი და ამწევი წყალში მოხვედრიდან 10 წუთის განმავლობაში მაინც იმუშავებს). კარის გაღება არ სცადოთ, რადგან წყლის ნაკადის დაწოლა მასზე ძლიერი იქნება, ვერც შეძლებთ და დროსაც დაკარგავთ. სწრაფად გამოძვერით ფანჯრიდან, სანამ ავტომობილი წყალში სრულად ჩაიძირება. გახსოვდეთ, რომ ყველაფრისთვის 1-1,5 წუთი გაქვთ.

გავრცელებულია არასწორი აზრი, რომ ჩაწეული ფანჯრებიდან მანქანაში წყალი უცებ შევა. ეს ასე არ არის – მანქანის საბურავები ტივტივას როლს თამაშობს, მანქანა რამდენიმე წუთით წყლის ზედაპირზე დარჩება. რა თქმა უნდა, სიტუაცია იცვლება, როცა მანქანა წყალში სახურავით ეცემა და ასევე რჩება, მაგრამ ეს იშვიათად ხდება, რადგან მოტორი ყველაზე მძიმეა და სიმაღლიდან ვარდნის დროს მანქანას თავისკენ ექაჩება. ამიტომაც, უმეტესწილად, მანქანა წყალში ცხვირით ვარდება.

თუ ფანჯის მინები ჩამოწეული არ არის, ნუ იფიქრებთ, რომ ჩაძირვის შემთხვევაში სალონში წყალი არ შევა და ჟანგბადის მარაგი სალონში გეყოფათ, სანამ მაშველები გიპოვიან – ეს ასე არ ხდება, ამიტომ მინა აუცილებლად უნდა ჩაწიოთ ან, თუ ამას ვერ იზამთ, უნდა დაამსხვრიოთ, რათა სალონიდან გააღწიოთ.

ფეხით, მუშტებით, ან სავარძელზე ზურგით მიყრდნობით საქარე მინაზე ფეხების რტყმას აზრი არა აქვს, თუ ძალიან კარგად არ იცით, სად უნდა დაარტყათ (კუთხეებში). უმჯობესია სპეციალური, მინის მსხვრევის ფუნქციის მქონე დანა ან მოწყობილობა გქონდეთ, რომელიც მარტივად ტეხას. თუ არ გაქვთ, გამოიყენეთ რკინის ნებისმიერი ხელსაწყო, ქანჩი, სახრახნისი, თქვენი ფეხსაცმლის ქუსლი ან იდაყვი: დაარტყით მთელი ძალით მინების კუთხეებში (შუაში დამსხვრევა მეტ ძალას მოითხოვს).

თუკი მინას გატეხავთ, გადაძვერით ფეხებით წინ. თუ მანქანის სალონში უკვე წყალია შესული, გადაძრომამდე ღრმად ჩაისუნთქეთ, ხოლო როცა სალონიდან ამოხვალთ, ხელების და ფეხები დაიხმარეთ, რათა რაც შეიძლება მალე ამოცურდეთ ზედაპირზე.

თუ ავტომობილში არიან ბავშვები– ამ შემთხვევაში ჯერ იხსნით ღვედს და ამტვრევთ მინას, ჯერ უფროს, შემდეგ კი უმცროს ბავშვს აძვრენთ ფანჯრიდან და ბოლოს თქვენ ძვრებით.

თუ ფანჯრიდან ვერ გაეტიეთ– ამ შემთხვევაში დაელოდეთ, სანამ ავტომობილის სალონი არ აივსება წყლით, მას შემდეგ კი კარს გააღებთ, რადგან როდესაც სალონშიც და გარეთ სივრცეშიც წყალია, ასეთ ვითარებაში წყლის ზეწოლა შიგნით და გარეთ თანაბრდება, შესაბამისად უფრო ადვილია კარის გაღება, მაგრამ ფეხის მოშველიება და ძალა მაინც დაგჭირდებათ. სანამ სალონი წყლით ივსება, მჭიდროდ ჩაეჭიდეთ კარის სახელურს, ჩაისუნთქეთ დარჩენილი ჰაერი, მიაწექით კარს მაგრად, მოიშველიეთ ფეხით მიწოლაც და გადადით მანქანიდან.

ზედაპირზე ამოცურეთ, მაგრამ ხედვის არეალი არ გაქვთ და არ იცით, საით უნდა გაცუროთ? – გაცურეთ იქეთ, საითაც ჰაერის ბუშტუკებს დაინახავთ.

აქ, ალბათ, მიხვდებოდით, რომ თუ ცურვა არ იცით, უნდა იფართხალოთ და რამენაირად თავი უნდა შეინარჩუნოთ წყლის ზედაპირზე, ოღონდ მთავარია, პანიკაში არ ჩავარდეთ და წყალი არ ყლაპოთ (რამდენიმე ყლუპს არა უშავს). აკონტროლეთ სუნთქვა, კარგად მოათვალიერეთ თქვენს ირგვლივ ზედაპირი, შესაძლოა, რამე ჩასაჭიდებელიც კი იპოვოთ.

ეს რჩევები პრაქტიკაში არასდროს დაგჭირვებოდეთ – მხოლოდ ისე, ცნობისთვის.

შეგიძლიათ, რჩევები დაამატოთ