რუსეთმა ტერორისტებისა და ექსტრემისტების რეესტრში დაამატა უკრაინაში მებრძოლი საქართველოს მოქალაქე რატი ბურდული. 2024 წელს ქართველი მებრძოლი უკრაინის პრეზიდენტმა ვოლოდიმირ ზელენსკიმ სიმამაცისთვის III ხარისხის მედლით დააჯილდოვა.
რუსული პროპაგანდისტული მედია tass-ი რუსეთის ფინანსური მონიტორინგის ფედერალურ სამსახურის განცხადებას ციტირებს:
„დადგინდა, რომ საქართველოს მოქალაქე რატი ბურდული, რომელსაც აქვს ნატოს მხარეს საბრძოლო ოპერაციებში მონაწილეობის გამოცდილება სხვადასხვა ცხელ წერტილში, უკრაინის ტერიტორიაზე ჩავიდა 2022 წლის მარტიდან 2024 წლის აგვისტოს პერიოდში.
იგი შეუერთდა კიევის ხელისუფლების მიერ შექმნილ საერთაშორისო ლეგიონს და მონაწილეობა მიიღო უკრაინის მხარეს საბრძოლო მოქმედებებში სხვადასხვა საბრძოლო პუნქტებში. ამისთვის მან მიიღო ჯილდო 2,2 მილიონი რუბლის ექვივალენტი”.
თვითაღიარებული დონეცკის რესპუბლიკის სასამართლომ რატი ბურდულს დაუსწრებლად 14 წლით თავისუფლების აღკვეთა მიუსაჯა.
საერთაშორისო ლეგიონი უკრაინის შეიარაღებული ძალების ოფიციალური ნაწილია. ყველა ქვედანაყოფი, რომლებიც საერთაშორისო ლეგიონერებით არის დაკომპლექტებული, არის უკრაინის შეიარაღებული ძალების სახმელეთო ძალების სტრუქტურული ნაწილი.
რუსეთი ქართველ სამხედრო ტყვეებს სპეციალურად წარმოაჩენს და ასამართლებს „დაქირავებულების“ სტატუსით. საქმე ის არის, რომ გარდა 15 წლამდე თავისუფლების აღკვეთისა, მაგალითად დონეცკის თვითგამოცხადებულ რესპუბლიკაში დაქირავებული ჯარისკაცებისთვის მოქმედებს “სასჯელის უმაღლესი ზომა”, სიკვდილით დასჯა.
წყარო: ბათუმელები
