როგორია პროდუქტის ფასები გურიაში, როცა ორიოდე დღე დარჩა აღდგომის ბრწყინვალე დღესასწაულამდე?
ოზურგეთის საბაზრო სივრცეში, ბოლო სამი დღის მანძილზე, მოულოდნელად სუფრის მწვანე ხახვის -გურიაში სოხვის სახელწოდებით ცნობილი ბოსტნეულის უკმარისობა იყო.
_ სოხვის დეფიციტი თუ იქნებოდა, აი, მართლა არ მეგონა, ამასაც მოვესწარით. ზამთარში და ყინვაში რომ არ იყოს მწვანილეული, კიდევ არ გამიკვირდებოდა, _ ამბობდნენ ოზურგეთის ბაზრის მომხმარებლები.
_ დათესეთ და გექნებათ. მაგის თესლი მაინც არ ღირს ძვირი და ამოსვლაც არ უჭირს. უკუღმა ისროლი, წაღმა ამოვა, _ იუმორით პასუხობდნენ გურულები მწვანე ხახვის მძებნელთ.
_ დედა, ეს რა დამემართა, ყველანირი ბოსტნეული მაქვს და ეს სოხვი გამითავდა მანდამაინც. არადა, ყველა მთხოვს. დავრეკე ქუთაისში, სასწრაფოდ მომაწოდონ სოხვი, რაც ექნებათ, _ ისმოდა ხილ-ბოსტნეულის მაღაზიებში დასაქმებული ქალბატონებისგან (თუ კაცებისგან).
დღეს, 10 აპრილს , ბაზრის დახლებზე თუ გარემოვაჭრეებთან მწვანე ხახვი ბლომად გამოჩნდა. ერთი კილოგრამის ღირებულება 13-15 ლარს შორის მერყეობს. ერთი საშუალო კონის ფასი 3-4 ლარია.
სააღდგომო ტრადიციაში ყველაზე მოთხოვნადი პროდუქტი კვერცხი (სოფლის ) 80 თეთრი ღირს. შარშან, ბოლო დღეებში ერთი ლარიც ღირდა. ერთი კილოგრამი ყველი 15 ლარი ღირს. ძვირია ქათამი და ინდაური. სოფლის ქათამს, წონის გარეშე, ერთ ფრთას 50 ლარს აფასებენ, ინდაურს კი _ 100 ლარს.
ასევე ძვირია საქონლის ხორციც. ერთი კილოგრამი 30 ლარი ღირს.
ბოსტნეულს რაც შეეხება, ამას წინ გაძვირეულ ბადრიჯანს, რომელიც 10-12 ლარი ღირდა, ახლა ბულგარული წიწაკა ჩაენაცვლა და ერთი კილოგრამი 13 ლარი ღირს. ბადრიჯანი შედარებით გაიაფდა _ ერთი კილოგრამი 6 ლარი ღირს.
არ გაძვირებულა სიმინდის ფქვილი. ის, ბოლო სამი წელია ერთი კილოგრამი სამი ლარი ან 3,50 ლარი ღირს.
ავტორი
