“საჭიროა ზედა რგოლების დახმარება” _ რა პრობლემებია ბახმაროში და რას აპირებს ხელისუფლება

კურორტ ბახმაროში არსებულ პრობლემებზე, მისი მოგვარების გზებზე და სამომავლო პროექტებზე ისაუბრეს გასულ კვირას, ჩოხატაურის მუნიციპალიტეტის საკრებულოს სხდომაზე.

ჩოხატაურის მუნიციპალიტეტის მერის, ირაკლი კუჭავას ინფორმაციით, მოქმედი კანონმდებლობის შესაბამისად, საკურორტო-სარეკრეაციო ზონაში, კურორტ ბახმაროში 2018 წლის 27 მარტამდე უნებართვო მშენებლობის მწარმოებელი სუბიექტები ჯარიმდებოდნენ 10 000 (ათი ათასი) ლარით. ამჟამად მოქმედი კანონის _ “პროდუქტის უსაფრთხოებისა და თავისუფალი მიმოქცევის კოდექსის” 44-ე მუხლის შესაბამისად, საჯარიმო თანხა შეადგენს 25 000 (ოცდახუთი ათასი) ლარს, ამასთან, მენაშენეს დაეკისრება უნებართვო მშენებლობის დემონტაჟი:

_ არ უარვყოფთ, რომ ბახმაროში არსებობს უკანონო მშენებლობების პრობლემა. გასულ წელს გაფრთხილებები დავაგზავნეთ, წელს დაჯარიმებას დავიწყებთ, _ თქვა ირაკლი კუჭავამ.

“ნაციონალური მოძრაობის” წევრმა მამუკა ბარამიძემ მერს სთხოვა, მისთვის დროულად მიეწოდებინათ ამ საკითხზე თებერვალში გამოთხოვილი საჯარო ინფორმაცია:

_ თებერვალში მოვითხოვეთ თქვენგან ინფორმაცია იმის შესახებ, თუ რამდენი უკანონო მშენებლობა დააფიქსირა ზედამხედველობის სამსახურმა. ასევე, გვაინტერესებს რამდენ ადამიანს გაუგზავნეთ გაფრთხილება. სამწუხაროდ, პასუხი ამ დრომდე არ მიგვიღია და იქნებ, მოგვაწოდოთ კანონით განსაზღვრული ინფორმაცია, _ მიმართა მერს ბარამიძემ, რაზეც კუჭავას პირობაც მიიღო:

_ არ ვფლობ მაგასთან დაკავშირებით ინფორმაციას. მოვიკითხავ და აუცილებლად მოგაწვდით, _ უპასუხა მერმა ბარამიძეს.

ჩოხატაურის მუნიციპალიტეტის მერის თქმით, უკანონო მშენებლობასთან ერთად, ბახმაროში ბევრი სხვა პრობლემაცაა და მის მოსაგვარებლად ხელისუფლების ზედა რგოლების დახმარებაა საჭირო:

_ ბევრი პრობლემაა მოსაგვარებელი. ეს ვიცით და არ ვამბობ, რომ ყველაფერი კარგადაა. პრობლემების მოსაგვარებლად საჭიროა ხელისუფლების ზედა რგოლების დახმარება. ჩვენ, ასევე, ძალიან გვინდა, რომ ქონებაც გადმოგვეცეს საკუთრებაში, რადგან ეს ჩვენთვის დამატებითი შემოსავალია, თუმცა, ასე არ ხდება, _ აღნიშნა ჩოხატაურის მერმა.

მისივე ინფორმაციით, წელს, ბახმაროში ნაგვის მოსაკრებელი დაწესდება და ეს საკითხი მოწესრიგებული იქნება.

საკრებულოს დეპუტატები კურორტის ტერიტორიაზე მოსიარულე პირუტყვის საკითხსაც შეეხნენ:

_ გასულ წელს ე. წ. ჩიხი გვქონდა მოწყობილი, საქონლის მეპატრონის დაჯარიმებაც შეგვეძლო, მაგრამ ამან შედეგი ვერ გამოიღო. კურორტის ტერიტორიაზე საშინელი მდგომარეობა გვქონდა. წელს საკრებულომ ეს დადგენილება გააუქმა, რადგან კანონს ეწინააღმდეგება. საინტერესოა, როგორ აპირებთ ამ პრობლემის მოგვარებას? _ დაინტერესდა მამუკა ბარამიძე, რომელსაც პასუხი კურორტის დირექტორმა დავით საჯაიამ გასცა.

მისი თქმით, წელს ბახმაროში მეველეები იქნებიან და კურორტის ტერიტორიაზე საქონელი არ ივლის.

_ იქნებ მეველეების ტელეფონის ნომრები გაასაჯაროოთ და ყველგან გამოაკრათ, რომ დამსვენებელს ჰქონდეს ინფორმაცია, _ სთხოვა საჯაიას “პატრიოტთა ალიანსის” დეპუტატმა მაია კუტუბიძემ, რაზეც თანხმობა მიიღო.

ბახმაროს საკითხზე მსჯელობისას საკრებულოს ინფრასტრუქტურის კომისიის თავმჯდომარე ზვიად მამალაძე დაინტერესდა, იქნება თუ არა წელს მოგვარებული წყალმომარაგების საკითხი და მოხერხდება თუ არა ბავშვებისთვის გასართობი პარკის მოწყობა.

კურორტის დირექტორის, დავით საჯაიას თქმით, წყალი დამსვენებელს გრაფიკით მიეწოდება:

_ წელს ახალი რეზერვუარები დავამატეთ, რამაც საშუალება მოგვცა რამდენიმე უბანს ეს პრობლემა მოვუხსნათ. ამ სეზონზე, წყალი გრაფიკით ექნება დავითიანის, მახარაძის ქუჩას, ბაზრის დაღმართის ქუჩას და მიმდებარე ტერიტორიებს. თუ საჭიროება გახდა, გვაქვს საშუალება წყალი ავტოცისტერნებით შევიტანოთ. რაც შეეხება სკვერს _ ჯერ კიდევ გაურკვეველია იფუნქციონირებს თუ არა იგი, გამომდინარე იქედან, რომ ტერიტორია არ არის მუნიციპალიტეტის საკუთრებაში და ამ თემაზე აქტიურად ვმუშაობთ ეკონომიკის სამინისტროსთან, _ თქვა საჯაიამ.

“ევროპული საქართველოს” დეპუტატი, ლია ჩიგოგიძე დაინტერესდა, რატომ ვერ ხერხდება წლების მანძილზე ბახმაროში კინოთეატრის ამუშავება, რომლის შენობა უფუნქციობისა და მოუვლელობისგან ფუჭდება.

_ სკვერის ტერიტორიის მსგავსად, კინოთეატრიც ეკონომიკის სამინისტროს ბალანსზეა. მუნიციპალიტეტის ხელმძღვანელობასთან ერთად, ამ თემაზეც ვმუშაობ. გაგზავნილი გვაქვს წერილები და ვართ კომუნიკაციაში, _ აღნიშნა დავით საჯაიამ.