„გურია ნიუსში“ გამოქვეყნებულ სტატიას, რომელშიც საუბარია ოზურგეთის მერიის მიერ გამოცხადებულ საკონკურსო თანამდებობაზე (საიდანაც ნატალია ხომერიკი იურისტების შეფასებით უკანონოდ გაათავისუფლეს) სახალხო დამცველის დედის, ქეთევან მოსახლიშვილის მონაწილეობაზე ნინო ლომჯარია გამოეხმაურა.
ომბუდსმენი „გურია ნიუსთან“ საუბრისას ამბობს, რომ დედამისმა კანონიერ კონკურსში მიიღო მონაწილეობა და ამ ყველაფრის მასთან დაკავშირება არასწორია:
_ მე გადავამოწმე ეს საკითხი საია-ში. მითხრეს, რომ ამ თემაზე გაკეთებული აქვს განცხადება ამ ორგანიზაციის ოზურგეთის ოფისის ხელმძღვანელს, რომელიც ეხება პირის თანხმობის გარეშე გადანიშვნას. როგორც მითხრეს, სასამართლომ არ შეაჩერა კონკურსი ხომერიკის მოთხოვნის მიუხედავად და გამოცხადდა, სადაც განაცხადი შეტანილი აქვს 14 კანდიდატს.
ვერ ვხვდები რა შუაშია აქ დედაჩემი _ ყველა კანდიდატი იმოქმედებს ისე, რასაც იტყვის სასამართლო და რასაც კანონი ამბობს. მე რა შუაში ვარ? დედაჩემის კარიერა დღეს და გუშინ არ დაწყებულა. დედაჩემი იყო რესურსცენტრის თავმჯდომარეობის კანდიდატი ყველაზე მაღალი ქულებით და დირექტორობის კანდიდატი ყელაზე მაღალი ქულებით. დღეს, თბილისში, ერთ-ერთ პრესტიჟულ კერძო სკოლაში მუშაობს, _ ამბობს სახალხო დამცველი.
ლომჯარიას თქმით, ყველაფერი კანონის შესაბამისად იქნება:
_ საია არ ამბობს, რომ უკანონოდ გათავისუფლება იყო. საია ამბობს, რომ მისი სხვა ადგილზე დანიშვნა იყო უკანონო და არა კონკურსის გამოცხადებაზე ან უკანონოდ გათავისუფლებაზე. თუმცა, თუ რაიმე კითხვებია, არც ეგ არ იქნება პრობლემა. დედაჩემს არც სამსახურის პრობლემა აქვს და ახლა უკეთეს სამსახურშია უკეთეს ანაზღაურებაზე, _ გვითხრა ლომჯარიამ.
მისივე თქმით, თუკი ნატალია ხომერიკს სახალხო დამცველის დახმარება სჭირდება ეს პრობლემა არ იქნება:
_ შემოიტანოს განცხადება, ჩვენ შევისწავლით და ყველანაირად დავეხმარებით,. რაც შეეხება დედაჩემის დაკავშირებას ჩემთან და მის პროფესიულ კარიერას და საქმიანობას, დედაჩემის პროფესიული რეპუტაცია არც დაწყებულა ჩემით და არასწორი მგონია ამის ჩემთან დაკავშირება ამ ყველაფრის. თუმცა, კიდევ ერთხელ ვამბობ _ თუ მაინცდამაინც დედაჩემზეა პრობლემა, არც დედაჩემი არ გხდება პრობლემა. ამის პირობას გაძლევთ, _ აღნიშნა ჩვენთან საუბრისას ნინო ლომჯარიამ.
ამ თემაზე კომენტარი ქეთევან მოსახლიშვილმაც გააკეთა და აღნიშნა, რომ ხომერიკის მიერ სასამართლოში შეტანილი სარჩელის შესახებ მისთვის ცნობილი არაფერი იყო:
_ გამოცხადდა ოფიციალური კონკურსი და მივიღე მონაწილეობა. მე ნატალია ხომერიკს არ ვიცნობ. „გურია ნიუსის“ საშუალებით ვიცოდი, რომ რაღაც გაუგებრობას ჰქონდა ადგილი და ეს პროცესი დასრულებული მეგონა, რადგან საჯარო სამსახურის გვერდზე გამოცხადდა კონკურსი.
ყველა კონკურსს ვადევნებ თვალს, რადგან ძალიან მინდა ოზურგეთში დაბრუნება. ყველაფერი კანონის შესაბამისად გავაკეთე და არ მესმის რატომ გახდა ეს პრობლემა. მე ჩემი კარიერა მქონდა მანამდე, სანამ ჩემი შვილი სახალხო დამცველი გახდებოდა. არასდროს უკანონო არაფერი გამიკეთებია და არც გავაკეთებ. ახლაც, არაფერია უკანონო. თუმცა, თუ ამის გამო რაიმე პრობლემა ექმნება ნინოს, დამერწმუნეთ, ნამდვილად არ დავაყენებ არცერთ თანამდებობას ჩემს შვილზე წინ, _ აღნიშნა ჩვენთან საუბრისას მოსახლიშვილმა.
შეგახსენებთ, რომ ოზურგეთის მუნიციპალიტეტის მერმა განათლების, კულტურის, სპორტისა და ახალგაზრდულ საქმეთა სამსახურის უფროსად ნატალია ხომერიკი გასული წლის 12 დეკემბერს დანიშნა.
თუმცა, როგორც “გურია ნიუსისთვის“ გახდა ცნობილი, დანიშვნიდან მეორე დღეს _ 13 დეკემბერს, ახალი ბრძანება დაიწერა და ხომერიკი სამსახურის უფროსობიდან განყოფილების უფროსად გადანიშნეს.
უფრო კონკრეტულად კი, 12 დეკემბერს შარაშენიძე წერს #40 ბრძანებას და ნატალია ხომერიკს ნიშნავს ოზურგეთის მერიის განათლების, კულტურის, სპორტისა და ახალგაზრდულ საქმეთა სამსახურის უფროსად.
14 დეკემბერს წერს ახალ ბრძანებას ნომრით 42 და 12 დეკემბერის #40 ბრძანებას ძალადაკარგულად აცხადებს ისე, რომ მიზეზს არ განმარტავს.
იმავე დღეს, შარაშენიძე კიდევ ერთ ბრძანებას წერს (#43) და ხომერიკს მერიის განათლების, კულტურის, სპორტის და ახალგაზრდულ საკითხთა სამსახურის კულტურის განყოფილების უფროსის მე-2-ე რანგის მეორადი სტრუქტურული ერთეულის ხელმძღვანელის თანამდებობაზე ნიშნავს.
20 დეკემბერს, შარაშენიძე წერს კიდევ ერთ ახალ, #94 ბრძანებას, რომელშიც წერია: „ ბათილად იქნას ცნობილი ნატალია ხომერიკის ოზურგეთის მუნიციპალიტეტის მერიის განათლების, კულტურის, სპორტის და ახალგაზრდულ საკითხთა სამსახურის უფროსის, პირველი რანგის პირველადი სტრუქტურული ერთეულის ხელმძღვანელის თანამდებობაზე მობილობის წესით გადაყვანის შესახებ ოზურგეთის მუნიციპალიტეტის მერის 2017 წლის 12 დეკემბრის #40 ბრძანების ძალადაკარგულად გამოცხადების შესახებ ოზურგეთის მუნიციპალიტეტის მერის 2017 წლის 14 დეკემბრის #42 და ნატალია ხომერიკის ოზურგეთის მუნიციპალიტეტის მერიის განათლების, კულტურის, სპორტი და ახალგაზრდულ საკითხთა სამსახურის კულტურის განყოფილების უფროსის მე-2-ე რანგის მეორადი სტრუქტურული ერთეულის ხელმძღვანელის თანამდებობაზე მობილობის წესით გადაყვანის შესახებ ოზურგეთის მუნიციპალიტეტის მერის 2017 წლის 14 დეკემბრის ბრძანებები“.
შარაშენიძეს ამ ბრძანებაში ბათილობის მიზეზი არ დაუკონკრეტებია, თუმცა იმავე დღეს კიდევ ერთი #95 ბრძანება გამოსცა, რომელიც #40 ბრძანების ბათილად ცნობას ეხება და რომელშიც აღნიშნულია, რომ ხომერიკის სამსახურის უფროსად დანიშვნის ბრძანებისას, გამოყენებული იქნა ელექტრონული სისტემა, სადაც „დაშვებული იქნა არსებითი შეცდომა.“
ამ ამბავს დიდი გამოხმაურება მოჰყვა _ ახალგაზრდა იურისტთა ასოციაციაში თქვეს, რომ კონსტანტინე შარაშენიძემ, ამ გადაწყვეტილებით, კანონი დაარღვია. ფაქტს საპარლამენტო უმრავლესობის ლიდერი, ოზურგეთის მაჟორიტარი დეპუტატი არჩილ თალაკვაძეც გამოეხმაურა და აღნიშნა, რომ ამ თემაზე ოზურგეთის მერთან საუბარი ჰქონდა.
სამართლმცოდნე ლევან ალაფიშვილი „გურია ნიუსთან“ საუბრისას ამბობდა, რომ „მერის აღიარება, შესაძლოა, გამოძიების დაწყების საფუძველი გახდეს“.
„ადმინისტრაციული აქტის ბათილად ცნობა შეიძლებ, თუკი მისი მომზადებისას ან გამოცემისას დარღვეულია კანონი ან არსებითად დარღვეულია მომზადების წესი.
ეს უკანასკნელი, როგორც წესი, კოლეგიურ ორგანოზე ვრცელდება. განსახილველ შემთხვევაში, ბათილად ცნობის ბრძანებებით მერი თვითონვე ადასტურებს, რომ წინა ბრძანებების გამოცემისას დაირღვა კანონი, მან გააფორმა კანონის დარღვევა.
ეს კი ნიშნავს, რომ საკითხი, მერის აღიარება, შესაძლოა, გახდეს გამოძიების დაწყების საფუძველი, კანონდარღვევისას ადგილი ხომ არ ჰქონდა თანამდებობრივი უფლებამოსილების გადამეტებას ან სხვა სისხლისსამართლებრივ თუ ადმინისტრაციულ გადაცდომას.
გამოსცე ბრძანება, ორ დღეში ძალადაკარგულად გამოაცხადო და ორ დღეში ორივე ბათილად სცნო _ ეს სამართლებრივად ნონსენსია, არაკომპეტენტურობის საუკეთესო ნიმუში.
ბათილად ცნობა შესაძლებელია მხოლოდ ძალაში მყოფი აქტისა, ძალადაკარგულად გამოცხადების შემდეგ, თავდაპირველმა აქტმა ძალა დაკარგა, სამართლებრივად და ფაქტობრივად არ არსებობს და თუ ასეა, რა სცნო ბათილად მერმა?! ადვილად დასანახია სამართლებრივი აბსურდი და არაკომპეტენტურობა“, _ აღნიშნა ჩვენთან საუბრისას ლევან ალაფიშვილმა.
ნატალია ხომერიკმა, ამ ყველაფრის შემდეგ, სასამართლოს მიმართა და საკუთარი უფლებების დაცვა დაიწყო. თუმცა, ოზურგეთის მერისთვის ეს შემაბრკოლებელი ფაქტორი არ აღმოჩნდა და მან მერიის განათლების, კულტურის, სპორტისა და ახალგაზრდულ საქმეთა სამსახურის უფროსის თანამდებობაზე კონკურსი გამოაცხადა.
ჩვენი ინფორმაციით, სამსახურის უფროსობის მსურველები, მიუხედავად იმისა, რომ ყოფილი უფროსი უკანონოდ გაუთავისუფლეს, ბევრნი აღმოჩნდნენ. მათ შორის არის პედაგოგი ქეთევან მოსახლიშვილი, რომელიც საქართველოს სახალხო დამცველის _ ნინო ლომჯარიას დედაა.
ნატალია ხომერიკი ამბობს, რომ ამ ფონზე ბევრი შეკითხვა გაჩნდა:
_ ყველასთვის ცნობილია, რომ ჩემი თანამდებობიდან გათავისუფლება მოხდა უკანონოდ. ეს ბევრმა იურისტმა დაადასტურა _ მათ შორის საქართველოს ახალგაზრდა იურისტთა ასოციაციამაც. საქმე სასამართლოშია და ველოდებით პროცესის ჩანიშვნას. ამ თემაზე ბევრი დაიწერა, ითქვა და ასეთ დროს ვიგებ, რომ გამოცხადებულ კონკურსზე (სხვათაშორის, სასამართლოს მე ამ კონკურსის შეჩერებაც ვთხოვ, რადგან ვფიქრობ, რომ ესეც უკანონოა) განაცხადი, სხვა პირებთან ერთად, შეაქვს სახალხო დამცველის დედას.
შეიძლება ვინმემ თქვას _ დედაა და რა შუაშიაო, მაგრამ სახალხო დამცველის ინსტიტუტი ასეთ საკითხებს უნდა სწავლობდეს, ჩემს უფლებებს იცავდეს და როცა ასეთ დროს ომბუდსმენის დედა კონკურსში მონაწილეობს, ბუნებრივია, კითხვები ბევრი მაქვს. ვის ვესაუბრო სამართლიანობაზე ასეთ დროს?!“ _ აღნიშნა ჩვენთან საუბრისას ხომერიკმა.
