“სოფელ დვაბზუში წყალსადენის გაკეთება უნდა დაჩქარდეს”

ოზურგეთის მუნიციპალიტეტის სოფელ დვაბზუში (გაღმა დვაბზუსთან ერთად) 940 კომლი ცხოვრობს. ისევე, როგორც ყველგან, აქაც მოსახლეობა მრავალი კარგად ნაცნობი პრობლემის შესახებ საუბრობს. ამბობენ იმასაც, რომ დვაბზუში ბევრი კარგი საქმე გაკეთდა, რასაც სხვადასხვა ხელისუფლების დროს, წლების მანძილზე ითხოვდნენ და ყურადღებას არავინ აქცევდა.

 სოფელში, მოსახლეობის საარსებო წყარო და ძირითადი შემოსავალი თხილია. თუმცა, თხილის კულტურის დაავადებამ, აქაც, როგორც ადგილობრივები ამბობენ, ეკონომიკურად უკან დასწია ისედაც გასაჭირში მყოფი მოსახლეობა:

_ პრობლემები სულ იყო და ხალხს ყოველთვის უჭირდა, მაგრამ დღეისთვის ყველაზე ძალიან, რაც სოფელს უმუშევრობას თუ სხვადასხვა პრობლემას ავიწყებს, პანდემიაა _ საშიში ვირუსის არსებობამ ყველაფერი დაგვავიწყა. ახლა, პირველ რიგში, ამ პრობლემას უნდა გავუმკლავდეთ.

ჯერჯერობით, სოფელში კორონავირუსის ოთხი დადასტურებული შემთხვევაა. დაინფიცირებულები გადაყვანილები არიან ბათუმში. ისინი ქობულეთში, ფაბრიკა “აჭარა ტექსტილში” მუშაობდნენ. ეს ახლა ჩვენი ყველაზე მეტი საწუხარია, _ გვეუბნებიან აქაურები. შემდეგ კი, ძირითადად, უმუშევრობაზე, საარსებო წყაროსა და სოფელში აუცილებლად გასახორციელებელი ინფრასტრუქტურული პროექტების შესახებ საუბრობენ:

_ ყოველ შემთხვევაში, სანამ თხილს ყველაფერი სიავე არ დაემართებოდა, ჩვენი საარსებო წყარო იყო. ახლა ფაროსანამ “მოათავა”. მოკლედ, გვინდა სამუშაო ადგილები, არ გვინდა ფაროსანა, გვინდა შემოსავალი, არ გვინდა უმუშევრობა და გასაჭირი, გვინდა წყალი, _ საუბარს იუმორს აყოლებს ადგილობრივი მცხოვრები დოდო ღლონტი და აგრძელებს: _ საკმაოდ ბევრი გაკეთდა სოფელში. ყოველ შემთხვევაში, რაც აქამდე არასდროს გაკეთებულა, მაგრამ ჯერ გასაჭირზე მოგვისმინეთ _ წყლის გამოყვანაა ჩვენი უპირველესი მოთხოვნა. ამხელა სოფელში მხოლოდ ჭების ამარაა ხალხი. კი იცით, ნახევარჯერ შრება ეს ჭები. გზაც ბევრ უბანშია გასაკეთებელი, მაგრამ წყალი თუ არ გავაკეთეთ, ისე გზა არ იქნებაო, გვეუბნებიან და ვართ ამ მოლოდინში.

მისივე თქმით, ბევრი არხია გასაწმენდი:

_ მუნიციპალიტეტის მერიამ ტრაქტორი გამოგზავნა და სადაც გაწმინდეს არხები, ნახეთ, როგორ მიდის წყალი. აქ კი წვიმის დროს და შემდეგ კიდევ ორ დღეს, ვერ გაივლი. სოფელი ვაკე ადგილია მთლიანად და წვიმის დროს ქუჩაზე მდინარე მოდის. კი, ბატონო, ერთად არ კეთდება ყველაფერი, მაგრამ დაჩქარებაა საჭირო, _ განაგრძობს ქალბატონი დოდო.

ყველა ადგილობრივი მცხოვრები უწყლობის პრობლემაზე საუბრობს. დვაბზუს და გაღმა დვაბზუს (დვაბზუს თემი) მცხოვრებთა მრავალწლიანი პრობლემა წყალგაყვანილობის სიტემის არქონაა:

_ კომუნისტებისდროინდელი წყალგაყვანილობის ნაშთებია შემორჩენილი. ან რაღა დროს მაგაზე საუბარია? გვპირდებიან. იყვნენ მოსული დამპროექტებლები. დაათვალიერეს ადგილები. შეგვპირდნენ, რომ ერთ თვეში დასრულდებოდა ეს პროექტი, მაგრამ კარგა ხანი გავიდა მას შემდეგ. გვეუბნებიან, რომ მომავალ წელს აუცილებლად გაკეთდება, ვნახოთ. ასევე, გასაკეთებელია გზა, _ გვეუბნებიან აქაურები.

ადგილობრივები განსაკუთრებით კმაყოფილები არიან “მაღელას” ხიდის გაკეთების გამო:

_ ეს, ალბათ, საუკუნოვანი პრობლემა იყო ჩვენი სოფლის ორი მხარისთვის. პატარა მდინარე “მაღელა”, რომლის კალაპოტი ძალიან გაშლილია, წარმოუდგენელ პრობლემას გვიქმნიდა. იქით მხარეს ხალხს აქვს სახნავ-სათესი ფართობები, ცხოვრობს თხუთმეტამდე ოჯახი და ცხემლისხიდიდან შემოვლა უხდებოდათ. ეს პრობლემა კი მოგვარდა, მაგრამ ახლა წყალიც გვინდა, მარტო ჭების იმედად რომ არ იყოს ათასკომლიანი სოფელი. გვპირდებიან, რომ გააკეთებენ, არაერთხელ იყვნენ მოსულები, მაგრამ არ უნდა გადაიდოს ეს გაურკვეველი დროით. კორონავირუსი კი არის, მაგრამ იმასაც ვიგებთ, რომ ინფრასტრუქტურული სამუშაოები არსად ჩერდება, _ გვეუბნებიან დვაბზუელები.

ხიდი, რომელიც ორ სოფელს აკავშირებს, ახლახან გაკეთდა

სოფელში საუბრობენ იმაზე, რომ სოფლის რელიეფი მთლიანად ვაკეა და უამრავი სანიაღვრე არხი არსებობს. ბევრი გაიწმინდა, თუმცა, ბევრი კვლავ გასაწმენდია, რასაც ტექნიკა დასჭირდება, რადგან, ადგილობრივთა თქმით “ბარით და ნიჩბით ასი კაციც ვერაფერს გახდება”.

მოსახლეობა კმაყოფილებას გამოთქვამს გარე განათების სისტემის მთლიანად განახლების და გაკეთების გამო, რასაც სოფლის პროგრამის ფარგლებში მიაღწიეს და დღეისთვის, ყველგან არის გარე განათება.

დვაბზუელთა თქმით, სოფლის ცენტრში მდებარე სკვერის განახლება და კეთილმოწყობა, მუნიციპალიტეტის მერიის დაპირებით, სარეზერვო ფონდიდან მოხდება.

თუმცა, სკვერისთვის განსაზღვრული ფართობის საკმაო ნაწილი, რომელიც სოფლის ცენტრშია და იქვეა სამედიცინო ამბულატორიაც, ეკალ-ბარდითაა დაფარული. იქვე მდგარ, ამჯერად უფუნქციოდ დარჩენილ ტუალეტში, ბამბუკის ხეებია ამოსული. ბარდები და ჭინჭარია, ასევე, ამოსული სამედიცინო უბნის კედლების გასწვრივ.

ტუალეტში ბამბუკია ამოსული

ჩვენს კითხვაზე, რატომ არის აღნიშნულ ტერიტორიაზე ასეთი მდგომარეობა და შესაძლებელია თუ არა აქვე მომუშავეთა მიერ, დასუფთავების დღის მოწყობა, ადგილობრივებმა გვითხრეს, რომ ნამდვილად არ უნდა იყოს ცენტრში ასეთი ანტისანიტარიული ადგილი:

_ მოვახერხებთ, დავალაგოთ და მოვაწესრიგოთ აქაურობა, _ გვითხრეს მათ.

ჩვენი მხრივ, ვიტყვით, რომ აქაურობის იერსახის მოწესრიგება, დასუფთავება და მოვლა, ხელისუფლების ადგილობრივ წარმომადგენლებს, დეპუტატს თუ სხვადასხვა სფეროში მომუშავეებს საკუთარი ინიციატივითაც შეუძლიათ მოახერხონ.

_ აქ მალე სკვერი უნდა გაკეთდეს. ზოგადად, კოორდინირებული მუშაობით, ადგილობრივ ხელისუფლებასთან და ჩვენს მოსახლეობასთან ერთად, ბევრი რამის გაკეთება შევძელით, _ გვითხრა მუნიციპალიტეტის მერის წარმომადგენელმა სოფელში, მამუკა გოგუაძემ.

სოფლის ამბულატორიის ექთანმა, ქეთევან ხავთასმა, რომელსაც ამბულატრიის ინტერიერში სისუფთავის მაღალი ხარისხი და წესრიგი აქვს, კითხვაზე, შენობის გარეთ რატომ არის ასეთი მოუვლელი გარემო, გვიპასუხა, რომ მუშის მოყვანა დაუგვიანდათ:

_ დაგვიგვიანდა, მუშა უნდა მოგვეყვანა, _ გვითხრა ხავთასმა.

სოფლის ახალგაზრდობის ერთ-ერთი უპირველესი სურვილი, როგორც აქ გვითხრეს, სოფლის საფეხბურთო სტადიონის რეკონსტრუქციაა:

_ მალე შევუდგებით მოედნის მოწესრიგებას. აქ სიგრძივად უნდა დაემატოს ტერიტორიის ნაწილი. ასევე, მიზანშეწონილი არ არის ასე მაღალი ხეები მოედნის გასწვრივ (ალვის ხის ხეივანი ორ მხარეს აკრავს სტადიონს). თვითნებურად ხეს ვერავინ მოჭრის, ამიტომ დაგვჭირდება კოორდინირებული შეთანხმების მიღწევა. მოედნის ოთხივე მხარეს გასაწმენდია არხები, სოფელ დვაბზუს აქვს დიდი საფეხბურთო ტრადიციები _ თავის დროზე, სოფლის გუნდი საქართველოს პირველობაზე თამაშობდა და სერიოზული წარმატებები ჰქონდა. ახლა, პანდემიის გამო, დროებით შეჩერებულია ვარჯიში, თორემ ახალგაზრდა მწვრთნელი, მიშა ღლონტი ავარჯიშებს ნორჩ ფეხბურთელებს, _ გვითხრა მამუკა გოგუაძემ.

მამუკა გოგუაძე ამბობს, რომ სტადიონს რეკონსტრუქცია უნდა გაუკეთდეს

მისივე თქმით, ფეხბურთთან დაკავშირებით, დაგეგმილია სერიოზული ცვლილება, რომლის ინიციატორი მუნიციპალიტეტის მერიაა. სტადიონის რეკონსტრუქციასთან დაკავშირებით, ცოტა ხნის წინ, აქ, გურიის ფეხბურთის ფედერაციის პრეზიდენტი დავით მუჯირი თავად იყო, დაათვალიერა და გასცა სათანადო მითითებები, რა და როგორ უნდა გაკეთდეს.

ოზურგეთის მუნიციპალიტეტის მერიის ინფრასტრუქტურის სამსახურის უფროსმა, თემურ გიორგაძემ, სოფელში არსებული უწყლობის პრობლემის თაობაზე მოკლე კომენტარი გააკეთა:

_ ჩვენთვის კარგად არის ცნობილი სოფელ დვაბზუში არსებული სასმელი წყლის არქონის შესახებ. ასევე, გასაკეთებელია გზაც, რომელსაც მოსახლეობა წყალთან ერთად ითხოვს. რა თქმა უნდა, თუ არ მოწესრიგდა მიწისქვეშა კომუნიკაციები, ისე წყლის გაყვანა არ და ვერ მოხდება. ჩასატარებელია საძიებო სამუშაოები. დღის წესრიგში დგას ეს საკითხი, თუმცა, კონკრეტულ რიცხვს, კონკრეტულ ვადებს, თუ როდის გაკეთდება, ახლა ვერ გეტყვით _ გაკეთდება უახლოეს მომავალში, _ გვითხრა გიორგაძემ.