ფაქტია, რომ ლანჩხუთის მუნიციპალიტეტში საგზაო ინფრასტრუქტურის მოწყობის სამუშაოებისთვის ხელისუფლების მხრიდან დიდი თანხები იხარჯება. მაგალითად, რეგიონებში გასახორციელებელი პროექტების ფონდის დაფინანსებით ამ ეტაპზე მუნიციპალიტეტში 13 ქუჩის რეაბილიტაცია მიმდინარეობს, რომელთა ჯამური ღირებულება 6 მილიონ ლარს აღემატება. თუმცა, ისიც ფაქტია, რომ ხშირ შემთხვევაში, დახარჯული თანხები ვერ აგვარებს იმ პრობლემებს, რომლებიც მოსახლეობას რეალურად აწუხებს.
თუნდაც ლანჩხუთის მერიის ოფიციალურ გვერდზე მოქალაქეთა მიერ გაკეთებული კომენტარებით თუ ვიმსჯელებთ, მუნიციპალიტეტში მწვავედ დგას შიდა გზების პრობლემები. განსაკუთრებით კი ეს თვალშისაცემი სოფლებშია, სადაც რიგ შემთხვევებში შესაბამისი სარეაბილიტაციო სამუშაოებისთვის გარკვეული თანხები დაიხარჯა, თუმცა, მოხრეშილი გზები წყალმა წაიღო და პრობლემა მაინც მოუგვარებელი დარჩა.
მერიის ოფიციალურ გვერდზევე გაკეთებული კომენტარების მიხედვით, საგზაო ინფრასტრუქტურის მოწყობასთან დაკავშირებით პრობლემები მძლავრობს სუფსის ადმინისტრაციული ერთეულში. მით უმეტეს, რომ ამ დასახლების რელიეფი იმდენად დაბალია ზღვის დონიდან, ნალექის მცირე რაოდენობის შემთხვევაშიც კი, გარკვეული დისკომფორტი იქმნება. შესაბამისად, ეს ფაქტორი თავიდანვე გასათვალისწინებელია და ამა თუ იმ სამუშაოს შესრულების შემთხვევაში მუნიციპალიტეტის სხვა სოფლებისგან განსხვავებით აქ უფრო სპეციფიკური და ეფექტური ნაბიჯების გადადგმაა საჭირო.
“სოფელი სუფსა რომ წაიღო წყალმა და ერთი არავის არ უკითხავს, თუნდაც ზრდილობის გამო, რას აპირებთ ნეტა??? უსინდისო და უნამუსო მმართველობა!!!!” _ წერს პრობლემით შეწუხებული მოქალაქე მერიის ფეისბუქგვერდზე.
ნაირა მექვაბიშვილი: “სუფსას მიხედეთ, სუფსას, ვიხრჩობით ხალხი წყალში”.
ანა ებრალიძე: “სუფსას პატრონი არ ჰყავს”.
“სუფსაშიც ველოდებით გზას”, _ მიმართავს ლანჩხუთის მერს გიო ჟღენტი.
საგზაო ინფრასტრუქტურის მოწყობის კუთხით პრობლემებია მუნიციპალიტეტის სხვა სოფლებშიც:
თამუნა სარიშვილი: “ლანჩხუთთან ახლოსაა გვიმბალაური, მარა ხოფერიას უბანში ფეხს ვერ გადაადგამ, “იამებით” და თხრილებითაა სავსე”.
“მე მაინტერესებს ლანჩხუთის მუნიციპალიტეტს თუ ეკუთვნის სოფელი გვიმბალაური, სადაც არც გზაა და არც წყალი, ზაფხულში განსაკუთრებით ურთულესი მდგომარეობაა…ოდესმე მოგვაქცევს ვინმე ყურადღებას???” _ კითხვით მიმართავს ლანჩხუთის მერიას თეა გვარჯალაძე.
ზურა გოგიბერიძე: “ლესაში “კორეის უბანში” როდის დაიგება ასფალტი?”
ბესო ხუხუნაიშვილი: “შუხუთში, გორისგვერდზე ჭადრამდე რომ აიყვანეს ასფალტი, შესახვევებმა რა დააშავა? სასაფლაომდე მაინც აეყვანათ ის ბეტონის გზა”.
მაყვალა ცინცაძე: “რკინიგზის სადგურთან მოედანს როდის გააკეთებთ? საშინელი მდგომარეობაა, დაბომბილს გავს იქაურობა”.
ქეთევან ცინცაბაძე: “სოფელ ჭანჭათსაც მიხედეთ. გზები გაფუჭებულია, წყლის გაყვანა დაიწყეს და შუა გზაზეა მიტოვებული. მიხედეთ სოფლებსაც”.
მამუკა გოგიტიძე: “წყალწმინდასაც გადმოხედეთ”.
მაკა იმნაძე: “წყალწმინდა ვის ახსოვს. 2 წელია წყალს აკეთებენ და ვერ მოაბეს თავი სამარცხვინოდ”.
ციური ფირცხალაიშვილი: “ბარათაშვილის ქუჩის 49 ნომერთან შესახვევს მიაქციეთ ყურადღება, მანდაც ცხოვრობს ხალხი”.
“სოფლებში ისეთი გზებია, რომ მანქანით კი არა, ფეხითაც უჭირს მოსახლეობას გადაადგილება”, _ წერს გვანცა ნაკაიძე.
მოქალაქეთა მხრიდან გაჟღერებული პრობლემების პასუხად ლანჩხუთის მერიის პიარი, მაკა სულაბერიძე მერიის ოფიციალურ გვერდზე განმარტავს, რომ “ეტაპობრივად მიმდინარეობს გზების რეაბილიტაცია, მათ შორის, სოფლებშიც”.
ავტორი
