ლანჩხუთის მუნიციპალიტეტის სოფელ ჭანჭათში მოსახლეობას უგზოობის პრობლემა, რომ აწუხებს, ეს ახალი ამბავი არაა. წლებია _ უგზოობა ამ სოფლის ერთგვარ “სავიზიტო ბარათად” იქცა. ადგილობრივთა თქმით, პერიოდულად, რაღაც ეტაპზე თითქოს ხდებოდა კიდეც ამ საკითხის გადაჭრა, მაგრამ ორმოებში ჩაყრილი ხრეში მალევე მიაქვს ნიაღვარს და გზა ისევ ძნელად გასავლელი რჩება _ “ლამის მდინარეების კალაპოტებს გავს ამ სოფლის გზები“.
“ეს სოფელი ჩვენი მუნიციპალიტეტის არაა?! იქ არაფერი არ არსებობს. ჭანჭათი “მე-13 რაიონია?” _ ოპოზიციის მხრიდან მსგავსი შენიშვნები არაერთხელ გაჟღერებულა კიდეც ლანჩხუთის საკრებულოს სხდომაზე, ამ სოფელში არსებულ პრობლემებზე საუბრისას,
უგზოობის თაობაზე ადგილობრივი მოსახლეობის მხრიდანაც ითქვა საჯაროდ არაერთხელ:
“გზა აუცილებელია. ფეხითაც ვერ გაივლის ადამიანი, ისეთი მდგომარეობაა. ბავშვები ყოველდღე როგორ უნდა მივიდნენ სკოლაში?
პრიორიტეტია, ჩემს კუთხეს გზა ეღირსოს წესიერი, რომ ტალახში არ ვეფლობოდეთ და მანქანა ჭიშკრამდე მიგვყავდეს“.
გასული წლის დეკემბერში ლანჩხუთის საკრებულომ მოიწონა განკარგულება 2026 წელს მუნიციპალიტეტში გასახორციელებელი ინფრასტრუქტურული პროექტების შესახებ. ამ დოკუმენტის მიხედვით, რეგიონული განვითარების ფონდით გასახორციელებელი პროექტების ნუსხაში აკეთის ადმინისტრაციულ ერთეულში ორი პროექტი იყო შეტანილი: გაგურის ცენტრიდან ნაგომრის ხიდამდე ასფალტ-ბეტონის გზის მოწყობა (243 0645 ლარის ღირებულების) და ასევე, გაგურის ცენტრიდან ზომლეთის ხიდის მიმართულებით გზის ახალი საფარის დაგება (199 8898 ლარი). ეს უკანასკნელი კი სოფელ ჭანჭათის ტერიტორიას მოიცავდა.
აღმოჩნდა, რომ ამ ორი პროექტიდან მუნიციპალიტეტმა პრიორიტეტი პირველს მიანიჭა, რაც ჭანჭათის მიმართულებას გამორიცხავს და გაგურიდან ქვემო აკეთის გავლით დაიგება გზა, რომელიც ნაგომრის ხიდით შეუერთდება ოზურგეთი-ჩოხატაურის გზის მონაკვეთს. ამით, სამწუხაროდ, კვლავ სამომავლოდ გადაიდო ჭანჭათელთა ყველაზე მთავარი პრობლემის გადაჭრა, რასაც იქაურები უკვე ოც წელზე მეტია ამაოდ ელოდებიან.
ლანჩხუთის მუნიციპალიტეტის საკრებულოს ბოლო სხდომაზე “ძლიერი საქართველო-ლელოს” ლანჩხუთის ორგანიზაციის ლიდერმა, გოჩა ჯანაშიამ მუნიციპალიტეტის მერს ჭანჭათის გზის პრობლემის შესახებ კიდევ ერთხელ შეახსენა და დაინტერესდა, როდის უნდა ეღირსოს ამ სოფელს ახალი გზა.
ალექსანდრე სარიშვილმა პასუხად თქვა, რომ ეს გზა მართლაც გასაკეთებელია, “თუმცა, ამ ეტაპისთვის არ არის გათვალისწინებული”.
“ირკვევა, რომ წელს გასახორციელებელ ინფრასტრუქტურულ პროექტებში ჭანჭათის გზის თემა არ მოიძებნება და ეს ძალიან ცუდია. ეს სოფელი ერთადერთია მუნიციპალიტეტში, სადაც ასფალტის გზის ერთი მეტრიც არ დაგებულა, მაშინ, როცა საკმაოდ ავარიული და ძნელადგასავლელი გზის რეაბილიტაცია ჭანჭათელთა ორ ათეულ წელზე მეტი ხნის ოცნებაა, რომელიც სამწუხაროდ, ვერ ახდა. არადა, ცენტრისგან საკმაოდ მოშორებულ ამ ლამაზ სოფელში ეს ის საჭირო და ლამის ერთადერთი ინფრასტრუქტურაა, რომელიც ყველა დანარჩენ პრობლემას წონის და გზის დაგებით იქ მცხოვრებლებს სხვა საწუხარიც ნაკლები ექნებათ. არსებული პროექტით ჭანჭათელებს როგორც ლანჩხუთის, ასევე, ჩოხატაურის ადმინისტრაციულ ცენტრებთან, მისასვლელი ექნებათ და ეს საკმაოდ გააიოლებს მათ მძიმე ყოფას“, _ ამბობს ჯანაშია.
ადგილობრივი მოსახლეობა მუნიციპალიტეტის გადაწყვეტილებით უკმაყოფილოა და მერთან საუბარს ითხოვს.
“რა გახდა ჩვენი პრობლემის გადაჭრა ამდენი ხანი, გაუგებარია. რას ვითხოვთ ასეთს, გზაა ჩვენი ერთადერთი მოთხოვნა, რომ გადაადგილების საშუალება გვქონდეს ნორმალური. ოცდამეერთე საუკუნეა, ამაზე საუბარიც სირცხვილია, მაგრამ ამდენი ხანი ჩვენი იგნორირება უფრო სირცხვილი არაა?! მერთან გვინდა შეხვედრა და კეთილი ინებოს, აგვიხსნას, სად წავიდა ის უამრავი დაპირება, რომელიც ყველა წელს გვესმის, თუნდაც მისი მხრიდან. კი ბატონო, ნაგომრის მიმართულებითაც არის გზა გასაკეთებელი, მაგრამ რამდენი წელია, ეს გზა უნდა დაგებულიყო? ოთხი თუ ხუთი წელია, ხიდამდე მისვლა ვერ მოახერხეს და მაინცდამაინც ჩვენი გზის თემას დაუკავშირეს და ასე დაგვჩაგრეს?” _ ცხარობენ ჭანჭათელები და სამართლიანადაც.
ავტორი
