კონსტანტინე შარაშენიძე უკვე მეორედ უხელმძღვანელებს ოზურგეთს. პირველად ის 2012 წლის 10 დეკემბერს გახდა გამგებელი და პოსტს 2012-2014 წლებში იკავებდა, “ქართული ოცნების” პარტიას ხელმძღვანელობდა ოზურგეთში და ბიძინა ივანიშვილის ძმის, ადიკო ივანიშვილის კადრად ითვლებოდა.
გამგებლის პოსტიდან წასვლის შემდეგ, 2015 წელს მუშაობა “ქართუ ჯგუფში”დაიწყო. 2017 წლის ნოემბერში კი მერის არჩევნებში გაიმარჯვა, მანამდე “ქართული ოცნებიდან” გარიცხეს.
2012 -2014 წლებში, გამგებლობის პერიოდში, მის სახელს არა ერთი სკანდალი უკავშირდება. მას სიტუაცია დაეძაბა მმართველ გუნდთან, რის მიზეზიც რამდენიმე თემა გახდა _ კრიმინალურ ქრონიკაში მისი სახელის გაჟღერება, საბიუჯეტო თანხების არამიზნობრივი ხარჯვა, “ოცნების” გუნდის წევრების თანამდებობებზე არდანიშვნა, ჟურნალისტისთვის სიტყვიერი შეურაცხყოფის მიყენება. პირველი დაპირისპირების მიზეზი კი საკრებულოს სხდომაზე საკრებულოს თავმჯდომარის პოსტზე თანაგუნდელის _ დიმიტრი კვერღელიძისთვის მხარის არდაჭერა გახდა.
შარაშენიძე იმ პერიოდში “ხელშეუხებელი” იყო და მას ბევრ რამეს პატიობდნენ, დღეს, ოზურგეთის ამომრჩეველთა 51 პროცენტის მხარდაჭერით მერი გახდა.
უნდა აღინოშნოს, რომ მმართველი გუნდის უმრავლესობა შარაშენიძესთან გაერთიანდა და მისი მერად არჩევას მხარი ღიად დაუჭირა. მას ოფიციალურად არა, თუმცა, მახარს უჭერდა თითქმის ყველა ოპოზიციური პარტიის ადგილობრივი ლიდერები და მათი მხარდამჭერები.
შარაშენიძე ინტერვიუში ხშირად აღნიშნავდა, რომ იყო კარგი მენეჯერი, თუმცა მას, ოპონენტები და საზოგადოების ნაწილი ემოციურ არასტაბილურობას, თვითკონტროლის არქონას და ჟურნალისტებთან კონფლიქტს უწუნებდა, ამის გამო ის ხშირად ხდებოდა საზოგადოების კრიტიკის ობიექტი.
მოდით, კიდევ ერთხელ თვალი გადავავლოთ შარაშენიძის გამგებლობის პერიოდს, რაშიც “გურია ნიუსის” არქივი დაგვეხმარება:
ოპონენტები, რომელთა ნაწილიც საკრებულოს დეპუტატები იყვნენ, 2013 წლიდან უკვე ღიად აკრიტიკებდნენ და ადანაშაულებდნენ შარაშენიძეს, რომ სტიქიით დაზარალებულთა დასახმარებლად გამოყოფილი თანხები არამიზნობრივად დახარჯა ან მიითვისა. ამის გამო მას პროკურატურაშიც უჩივლეს.
შარაშენიძე მათ ასე პასუხობდა: _ ესენი ოპონენტები არა არიან. ესენი არიან ხელმოცარული ადამიანები, რომლებსაც რაღაც ბოღმა აწუხებთ. ჩემს პიროვნებას უპირისპირდებიან ისეთი ადამიანები, რომლებიც წლების მანძილზე ყველა არჩევნებში რაღაცის გამო იმყოფებოდნენ, _ამბობდა შარაშენიძე.
შარაშენიძეს ყოფილი მაჟორიტარი დეპუტატი ზვიად კვაჭანტირაძეც დაუპირისპირდა _ სწორედ დღევანდელ მერს ბრალდებოდა მაშინ ყოფილი გამგებლის წინააღმდეგ გამართული საპროტესტო აქციები და გამგეობის წინ გაშლილი კარვები.
ამ დაპირისპირების მიზეზი საკრებულოს თავმჯდომარის პოსტზე ავთანდილ სურგულაძის არჩევა გახდა _ მაშინ შარაშენიძემ მხარი აღნიშნულ პოსტზე ზვიად კვაჭანტირაძის კანდიდატურას _ დიმიტრი კვერღელიძეს არ დაუჭირა.
იმ დროს “ქართული ოცნება” რამდენიმე ნაწილად იყო გახლეჩილი, საკრებულოს თავმჯდომარის პოსტზე ავთანდილ სურგულაძის არჩევამ კი მუნიციპალიტეტის შენობის პიკეტირება გამოიწვია _ “ქართული ოცნების” მხარდაჭერილ გამგებელს “ქართული ოცნებისვე” წევრები დაუპირისპირდნენ.
შარაშენიძე ამის შემდეგ კიდევ ხდება ერთი ყველაზე ხმაური ინციდენტის მონაწილე _ “ქურდული გარჩევები” მასსა და “ქართული ოცნების” მხარდამჭერ ნესტორ რამიშვილს შორის, რომელიც გამგებლისგან საფეხბურთო გუნდ “მერცხალის” ხელმძღვანელად დანიშვნას ითხოვდა, ფიზიკური დაპირისპირებისა და რამიშვილისთვის იარაღის ტარის თავში ჩარტყმით სრულდება.
პოლიციას მაშინ რვა მოქალაქემ მისცა ჩვენება, დაიწყო გამოძიებაც, რომელსაც პოლიციის მაშინდელი უფროსი შეეწირა, რადგან დავით დარჩიამ ის ბიძინა ივანიშვილთან “დაასმინა”. რაც შეეხება რამიშვილსა და შარაშენიძეს, ინციდენტს ორივე უარყოფდა.
კოტე შარაშენიძის მთავარ ლობისტად და მისთვის გზის “გამკვლევად” “ქართულ ოცნებაში” ბიძინა ივანიშვილის ძმა, ადიკო ივანიშვილი სახელდებოდა:
_ კოალიციის წევრებს არ გვაქვს შეცდომების დაშვების უფლება. ბატონი კ. შარაშენიძე იყო და რჩება ჩვენი გუნდის წევრად. ჩვენ დაინტერესებული ვართ მისი წარმატებით”, _ აღნიშნავდა მაშინ მმართველი კოალიცია.
ყველაფერი ამით არ მთავრდება _ შარაშენიძე კვლავ სკანდალში ეხვევა და “გურია ნიუსის” ჟურნალისტს შეურაცხყოფას აყენებს, რის შემდეგაც ჟურნალისტს, “გურია ნიუსის” რედაქციას და მკითხველს ბოდიშს უხდის:
“კიდევ ერთხელ გამოვთქვამ ღრმა პატივისცემას ზოგადად მედიის, მათ შორის, “გურია ნიუსის”, მისი მრავალრიცხოვანი აუდიტორიის მიმართ და ბოდიშს ვიხდი ჩემი, როგორც საჯარო მოხელის არაეთიკური, არაადეკვატური საქციელის გამო”.
კონსტანტინე შარაშენიძე 1996-1997 წლებში სოფელ დვაბზუს გამგებელი იყო; 1997-1998 წლებში _ გურიის მხარეში საქართველოს პრეზიდენტის სახელმწიფო რწმუნებულის აპარატი-სამდივნოს უფროსი; 1998-1999 წლებში _ გურიის მხარეში საქართველოს პრეზიდენტის სახელმწიფო რწმუნებულის აპარატი-წამყვანი მრჩეველი; 2000-2002 წლებში _ საქართველოს ანტიმონოპოლიურში სამსახურში კონკურენციის განვითარების განყოფილების მთავარი სპეციალისტი; 2002-2006 წლებში _ გურიის აგრობიზნესცენტრში ფერმერულ ასოციაციებთან ურთიერთობის მენეჯერი; 2008-2010 წლებში _ სს “”ვისოლ პეტროლიუმ ჯორჯია” ოზურგეთის რაიონის დაბა ურეკის ავტოგასამართი სადგურის მენეჯერი.
