საკრებულოს ბოლო რიგგარეშე სხდომაზე, ლანჩხუთელმა დეპუტატებმა ხმათა უმრავლესობით, მიმდინარე წლის მთავარ საფინანსო დოკუმენტში ცვლილების გახორციელებას დაუჭირეს მხარი. სხდომაზე საკითხის მომხსენებელმა, მერიის საფინანსო სამსახურის შეფმა როლანდ ლაშხიამ ის გარემოებები განმარტა, რამაც ბიუჯეტში ცვლილება განაპირობა.
გაირკვა, რომ ქალაქის ცენტრალურ მოედანზე მდებარე საათის დემონტაჟი და მის ადგილას სახელმწიფო დროშის აღსამართად შესაბამისი ინფრასტრუქტურის მოწყობა იგეგმება, საამისოდ კი, ბიუჯეტს, დაახლოებით, 23 ათასი ლარის გაღება მოუწევს. ლაშხიას განმარტებით, პროექტის დაფინანსება განხორციელდება მუნიციპალიტეტისთვის მთავრობის მიერ გამოყოფილი გრანტით. მთავრობისვე გრანტით იგეგმება, ჯიპ იეს მოწყობილობის შეძენა 35 ათასი ლარის ღირებულების ფარგლებში.
ბიუჯეტში გახორციელებული ცვლილების მიხედვით, ქალაქის, მაჩხვარეთისა და ჩოჩხათის ადმინისტრაციულ ერთეულებში გზების რეაბილიტაციისთვის 20508,07 ლარი მიიმართება. ჩიბათის ადმინისტრაციულ ერთეულში, სოფელ წალაში მისასვლელი გზის რეაბილიტაციას კი, 293 137 ლარი უნდა მოხმარდეს. აქედან, 15 429 ლარი ადგილობრივი ბიუჯეტის წილია.
როგორც მერიის საფინანსო სამსახურის უფროსმა განმარტა, 1 011 829,82 ლარით გაიზარდა მუნიციპალიტეტის საჯარო სკოლების მოსწავლეთა ტრანსპორტით უზრუნველყოფის დაფინანსება. მერიაში საქონელი და მომსახურების ხარჯი კი, 16 571 ლარით გაიზარდა. ხოლო ცელიაკით დაავადებულთა (18 წლამდე ასაკის) კვებითი დანამატით უზრუნველყოფის პროგრამის დასაფინანსებლად ბიუჯეტიდან დამატებით სამი ათასი ლარი მიიმართება.
მერიის საფინანსო სამსახურის მიერ წარმოდგენილი განმარტებითვე, ბიუჯეტში გახორციელებული ცვლილებებით, დაკმაყოფილდება საფეხბურთო სკოლის მოთხოვნა დამატებით 50 ათასი ლარის დაფინანსების გამოყოფის თაობაზე. როგორც ითქვა, აღნიშნული თანხის ფინანსური უზრუნველყოფა მოხდება ტურიზმის განვითარების ხელშეწყობის ღონისძიებების შემცირების ხარჯზე. გარდა ამისა, საფეხბურთო სკოლაში სხვა ხარჯების მუხლის ხუთი ათასი ლარის შემცირების ხარჯზე 4050 ლარი მიიმართება საქონელი და მომსახურების კუთხით, დარჩენილი 950 ლარის გახარჯვა კი, მერიისგან წარმოდგენილი განმარტებების მიხედვით, არაფინანსური აქტივების კუთხით გაიხარჯება.
რაც შეეხება სპორტულ ცენტრს, ბიუჯეტში გახორციელებული ცვლილებების მიხედვით, ირკვევა, რომ აქ 912 ლარით შემცირდება საქონელი და მომსახურების ხარჯი და შესაბამისი თანხის ოდენობით გაიზრდება არაფინანსური აქტივების ხარჯი.
ბიუჯეტში გასახორციელებელ ცვლილებებთან დაკავშირებით საფინანსო სამსახურის მხრიდან გაკეთებული განმარტებების შემდეგ საკრებულოს წევრებმა შეკითხვები თუ შენიშვნები გააჟღერეს მერიის მიერ წარმოდგენილ საკითხთან დაკავშირებით.
ენმ-ის წარმომადგენელი ლანჩხუთის საკრებულოში, გია გოგუაძე დაინტერესდა, თუ ვინ ჩათვალა მიზანშეწონილად ცენტრალურ მოედანზე მდებარე საათის დემონტაჟი და რამ განაპირობა მისი მოხსნა. გოგუაძემ მმართველ გუნდს ურჩია, კარგად შეეხედათ, თუ რა სავალალო მდგომარეობაშია მუნიციპალური სამსახურების შენობებზე განთავსებული დროშები. იგი იმითაც დაინტერესდა, დემონტაჟის შემდეგ რა ბედი ეწეოდა ამ ძვირადღირებულ საათს.
დეპუტატის შეკითხვისა და შენიშვნის უშუალო ადრესატი სხდომაზე მყოფი მუნიციპალიტეტის პირველი პირი ალექსანდრე სარიშვილი გახლდათ და კითხვასაც, შესაბამისად, მან გასცა პასუხი. მერის თქმით, არაერთი მცდელობის მიუხედავად, ვერ მოხერხდა საათის გამართვა, რის გამოც დადგა დღის წესრიგში მისი დემონტაჟი.
„საათის ღირებულებაზე ვერაფერს გეტყვით, მაგრამ ბოლო ორი წლის განმავლობაში არაერთი სპეციალისტი გვყავდა ჩამოყვანილი და ის ვერ გაკეთდა, უბრალოდ, არ მუშაობს. რაც შეეხება თქვენს ნათქვამს დაზიანებულ დროშებთან დაკავშირებით, გეთანხმებით, ქარში, ავდარში ხშირად იხევა, თუმცა, მომართვის საფუძველზე სისტემატურად ხდება მათი გამოცვლა. არც ამ კონკრეტულ შემთხვევაში იქნება პრობლემა, რომ როგორმე წელიწადში ორ-სამჯერ გამოვნახოთ სახსრები და დაზიანების შემთხვევაში, შევცვალოთ. ქალაქის ცენტრში დროშა რომ იდგეს, მგონი ამის წინააღმდეგი არავინ არ ვიქნებით“, _ განმარტა სარიშვილმა. თუმცა, თუ რა ბედი ეწევა დემონტაჟის შემდეგ საათს, ეს მერმა, დეპუტატის ჩაძიების მიუხედავად, ვეღარ დააკონკრეტა _ არ ვიცი, ვნახოთო, _ იყო პასუხი.
მერისგან მიღებული პასუხების მიუხედავად გია გოგუაძისთვის გაუგებარი დარჩა, თუ სხვა მუნიციპალიტეტებში წარმატებით ხდება მსგავსი საათების შეკეთება, რატომ ვერ მოხერხდა იგივე ლანჩხუთშიც და რატომ მიანცდამაინც დემონტაჟი.
ალექსანდრე სარიშვილის მიერ გაკეთებული განმარტებებით გაირკვა, რომ ქალაქის ცენტრალურ მოედანზე დროშა 20 მეტრის სიმაღლეზე აღიმართება.
„შესაბამისი ინფრასტრუქტურა, რაზეც ეს დროშა უნდა აღიმართოს 20 მეტრის სიმაღლის იქნება და მისი ღირებულება 23 ათას ლარამდე აღწევს. შეიძლებოდა 40-მეტრიანის გაკეთებაც და მისი ღირებულება 60 ათას ლარია“, _ დასძინა ალექსანდრე სარიშვილმა.
საბოლოოდ კი, ბიუჯეტში გასახორციელებელ ცვლილებებთან დაკავშირებით, ჯერი კენჭისყრაზე მივიდა და დეპუტატებმა, ხმათა უმრავლესობით (22 ერთის წინააღმდეგ), მხარი დაუჭირეს მერიის საფინანსო სამსახურის მიერ წარმოდგენილ საკითხს.
ავტორი
