ოზურგეთის მუნიციპალიტეტის დაბა ურეკის მოსახლეობამ აქცია გამართა. აქ მცხოვრებლები დაბა ურეკში, ე.წ. მაგნეტიტში მდებარე “რუსთავის აზოტის კოტეჯების“ ტერიტორიაზე ზღვაზე გასასვლელის სავარაუდო ჩაკეტვას აპროტესტებდნენ.
აქციაზე იმყოფებოდნენ ოზურგეთის მუნიციპალიტეტის საკრებულოს თავმჯდომარე დავით დარჩია და მუნიციპალიტეტის გამგებელი მერაბ ჭანუყვაძე, ასევე გარემოს დაცვითი ზედამხედველობითი დეპარტამენტის გურიის სამსახურის უფროსი გურამ ასათიანი და შსს გურიის პოლიციის დეპარტამენტის მაღალჩინოსნები. აქციას თვალს ადევნებდა მიხეილ ჩხარტიშვილის წარმომადგენელი გია ნინიძეც.
„ვართ ურეკის უძველესი მცხოვრებლები. ჩვენი დასახლება განლაგებულია შავი ზღვის მიმდებარე ტერიტორიაზე, ხოლო დასახლების წინ, ზღვის ნაპირას მდებარეობს დასასვენებელი ტყე–პარკი, თავისი სპორტული მოედნებითა და სხვა გასართობი ადგილებით. იმ თავიდან ვარსებობთ ტურიზმით, რადგან ურეკში სხვა შემოსავალი არ არსებობს. ტურიზმი კი აქ, სულ ორ თვეს მოიცავს. ტყე პარკის უკანონო მითვისებასთან დაკავშირებით გამოძიება წლების განმავლობაში მიმდინარეობდა, მესაკუთრე კი უკვე ბიზნესმენ ვანო ჩხარტიშვილის შვილი მიხეილ ჩხარტიშვილია.
დღეს ვხედავთ, რომ ტერიტორიაზე მიმდინარეობს ინფრასტრუქტურული სამუშაოები, კეთდება ჯებირები და ძალიან მალე ჩაიკეტება პარკში ზღვამდე მისასვლელი ცენტრალურიგზაც.
კანონით დაუშვებელია პლაჟის გამიჯვნა, შემოღობვა კაპიტალური და გაუვალი ნაგებობებით. როგორც უკვე ვხედავთ, ე.წ. “რუსთავის აზოტის კოტეჯების” ტერიტორიაზე თავისუფლად გადაადგილების საშუალება არ გვექნება არც მოსახლეობას და არც დამსვენებელს. ამის უფლება ვის აქვს, ეს რა ხდება, გაგვაგებინეთ!“ _ აცხადებენ დაბა ურეკში მცხოვრებლები “გურია ნიუსთან” საუბრიას.
მოსახლეობის ინფორმაციით, ტყე -პარკის გასხვისების ისტორია კი ასეთია:
2004 წელს, მაისის დასაწყისში, მოსახლეობისგან მოულოდნელად დაიწყეს ტყე-პარკის ნგრევა, მრავალწლიანი ხეებისა და ნარგავების გაჩეხვა და ტყე-პარკის სინკარებით შეღობვა. წინააღმდეგობა გავუწიეთ ტექნიკურ სამუშაოებს, იმ წუთიდან ათასი განცხადებით მივმართავდით იმდროინდელ მთავრობას, პრეზიდენტს, პარლამენტის თავმჯდომარეს, პრემიერს,, ინფრასტრუქტურისა და ეკონომიკის მინისტრს, რომ მომხდარიყო ამ ვანდალური აქტის შეჩერება, მაგრამ ამაოდ, მოსახლეობა გავნადგურდით.
აღმოჩნდა, რომ ჩვენი ტყე-პარკი 2003 წლის დასაწყისში აუქციონის წესით შეუსყიდია ჩხარტიშვილებს, რომლის შესახებაც არავის არაფერი გაუგია. შესყიდვა მოხდა საბაზრო ღირებულების ასჯერ ნაკლებ ფასად, 1 კვადრატული მიწა 4 ლარად. მას შემდეგ ტყე-პარკი განადგურდა, ტურისტები აღარ შემოედინება დასახელებულ პუნქტში, სადაც ბუნებრივი მაგნიტური ველია და ადამიანები დასვენებასთან ერთად მკურნალობენ.
„ვეღარ ვიხდით ბანკის გადასახადებს და უმსხვილესი სესხების გამო, ქონება დაგვიყადაღეს, გაუსაძლისი გაგვიხდა არსებობა, ვართ სიმწრით მოპოვებული სახლკარის დაკარგვის ლოდინში და სრულ უსახსრობაში. ყველაფერთან ერთად, შიმშილით სიკვდილიც გვემუქრება“, _ აცხადებენ ადგილობრივები.
“ვისი საკუთრებაა პლიაჟი? ყველას საკუთრებაა,, ნებისმიერი ჩვენგანის, რომელიც თაღლითურად მიითვისეს და დაიკანონეს, ვის ჰქონდა ამის უფლება? _ განაცხადა “გურია ნიუსთან” ტყე–პარკთან შეკრებილმა მოსახლეობამ, მათივე თქმით, ისინი ითხოვენ “რუსთავის აზოტის კოტეჯების“ მიმდებარე ტერიტორიაზე კორიდორის სისტემით 3 მეტრიანი გზის დატოვებას“.
_ეს იყო სულ გზა და დარჩება გზად,არ მივცემთ მაგის უფლებას არავის,იღობება უკვე რკინის მესერით,ამ პარკში ჩვენი მშობლების დარგული ხეებია, აქ ვცხოვრობდით წლების მანძილზე“,_ამბობენ “გურია ნიუსთან“ ნინომურვანიძე, მზიახელაძე და რუსუდანშარაშიძე.
აღნიშნულ ფაქტთან დაკავშირებით კომენტარი არ გააკეთა ოზურგეთის მუნიციპალიტეტის საკრებულოს თავმჯდომარემ დავით დარჩიამ.
“რაგითხრათ,რა კომენტარი გავაკეთო? დაწერე არ აკეთებს კომენტარს სანამ არ დაიჭერენ მანამდეო (!) “, _გვითხრა დარჩიამ.
ოზურგეთის მუნიციპალიტეტის გამგებელი მერაბ ჭანუყვაძე აღნიშნავს, რომ ის აქციაზე მოსახლეობის თხოვნის საფუძველზე ავიდა:
“მოსახლეობას შევხვდი, მათი მოთხოვნიდან გამომდინარე, ეს ტერიტორია არის კერძო საკუთრება, მე დავეხმარები მათ იმისთვის, რომ რაღაც ადგილი გამოიძებნოს, რომ კერძო მესაკუთრემ დაუთმოს ზღვაზე გასასვლელი, ჩვენ შეხვდებით მეპატრონეს, მოსახლეობის თხოვნასაც გადავცემთ და შემდეგ ცნობილი გახდება ყველასთვის რა გადაწყვეტილებას მივიღებთ“, _ გვითხრა მერაბ ჭანუყვაძემ.
აქციაზე კომენტარი არ გააკეთა მიხეილ ჩხარტიშვილის წარმომადგენელმა გია ნინიძემ.
