კომპანია “ელიზის” მფლობელი თამაზ ელიზბარაშვილი, ოჯახის წევრებთან ერთად, 2010 წლის 5 ივლისს, ყალბი საექსპერტო დასკვნისთვის ქრთამის გადახდის ბრალდებით დააკავეს. ელიზბარაშვილების ოჯახი 5 თვის შემდეგ 6 მილიონი ლარის გირაოს გადახდის სანაცვლოდ გაათავისუფლეს.
“სიგარეტის უმსხვილესი იმპორტიორი კომპანიის “ელიზის” მფლობელი ვიყავი, დაჭერის შემდეგ კი იძულებული გავხდი წილი დამეთმო. ინტერნეტ სივრცეში გაჩნდა არა ერთი სტატია ჩემი კრიმინალობის შესახებ და რადგანაც ჩემი უცხოელი პარტნიორი ამას გამადიდებელი შუშით აკვირდებოდა, იძულებული გავხდი ბიზნესის წილი სხვებზე გადამეფორმებინა. 2010 წლიდან რომ დაიწყო ჩემი სასამართლო, დღემდე გრძელდება. საქმის განხილვა 2 წელი იყო გაჩერებული, ახალი ხელისუფლების მოსვლის შემდეგ კი კვლავ განახლდა. მანამდე 5 თვის განმავლობაში მაწამებდნენ გლდანის ციხეში. საპროცესო შეთანხმებაზე ვერ დამითანხმეს და გამოვედი 6 მილიონი ლარის გირაოს გადახდის შემდეგ. 2012 წლის ოქტომბრის არჩევნებამდე აქტიურად ვუჭერდი მხარს ოპოზიციას. შემდეგ კი მოვიდა ახალი ხელისუფლება, რომლის მოსვლისთვისაც საკუთარი სიცოცხლე საფრთხის ქვეშ დავაყენე,” _ ამბობს ბიზნესმენი “გურია ნიუსთან”.
თამაზ ელიზბარაშვილმა განახლებულ პროკურატურას ბრალის უკან გატანა სთხოვა, რადგან, მისი თქმით, აბსურდული ბრალდებით ასამართლებდნენ.
“იმის მაგივრად, რომ ბრალი უკან წაეღოთ, რადგან ძალიან კარგად იცოდნენ, ყველაფერი ადეიშვილის მიერ იყო შეთხზული, ახალმა პროკურატურამ ძველი ტრადიციების გააგრძელა და ბრალის გატანას ვაჭრობა არჩია. ქალაქის პროკურატურიდან ბესო თხელიძე დამიკავშირდა და მითხრა, იმ შენი 6 მილიონიდან 1 მილიონი საპროცესოში გავუშვათ, 5 მილიონი კი უკან დაგიბრუნდებაო.”
ელიზბარაშვილმა ბესო თხელიძეს უარი უთხრა და მეორე დღესვე პრესკონფერენცია ჩაატარა. მას ეგონა, რომ უკანონო გარიგებაში მხილების შემდეგ პროკურორს დასჯიდნენ.
“მოხდა სასწაული _ პროკურატურამ იმის ნაცვლად, რომ მისთვის ყური აეწია, თხელიძე დააწინაურა და მთავარ პროკურატურაში გადაიყვანა. ამის შემდეგ მოდის ახალი შემოთავაზება, რომ პროკურატურის მაღალჩინოსნებს გარკვეული ბიზნესინტერესები აქვთ. კვლავ უარით გავისტუმრე შუამავალი და ამაზე გაბრაზებულებმა ქალაქის პროკურატურიდან გამომიგზავნეს გენერალი ჯახუტაშვილი, რომელიც მეუბნება, რომ იმ 6 მილიონსაც დავკარგავ და ჩემი ოჯახის წევრებსაც ციხეში შეაბრუნებენ,” _ ამბობს ელიზაბარაშვილი.
ბიზნესმენის თქმით, პროკურატურა მას სამაგიეროს იმით უხდის, რომ უსაშველოდ აჭიანურებს მისი საქმის სასამართლო განხილვას. 2012 წლის ოქტომბრის შემდეგ პროცესზე გამომსვლელი 7 პროკურორი შეიცვალა. ახალი პროკურორები საქმის გაცნობისათვის ერთთვიან ვადას ითხოვენ, შემდეგ კვლავ ახალი მოდის და მასაც დრო სჭირდება. ზოგჯერ ისეც ხდება, რომ პროცესზე ძველი პროკურორი ბრუნდება, საქმეს კი დასასრული არ აქვს.
“რადგან პროკურატურამ ომი გამომიცხადა, მეც გამოვუცხადე ომი და მე და ჩემმა ადვოკატებმა კუბლაშვილის სასამართლოს პირობებში მოვახერხეთ 6 მილიონი გირაოს უკან დაბრუნება მოსამართლე ეკა არეშიძის დამსახურებით. პროკურატურა კბილებით იცავდა, რომ ეს ფული არ დამებრუნებინა, მაგრამ სამართალს მათთან გარიგების გარეშეც მივაღწიე. ამან კიდევ უფრო გააცოფა პროკურატურა, ყველანაირად ცდილობენ ჭკუიდან გადამიყვანონ. ჩემი პროცესი არ სრულდება, ბიზნესპარტნიორებს საზღვარგარეთ ვერ ვხვდები, იმიტომ, რომ საქართველოდან გასვლის უფლება არ მაქვს. იმავე მიზეზით ვერ ვმონაწილეობ ბიზნეს-ფორუმებში, გარდა ამისა, ჩემი ბიზნეს პარტნიორები შეზღუდულად მუშაობენ ჩემთან, რადგან სასამართლო განაჩენით ჩემი უდანაშაულობა ჯერ არ დამტკიცებულა. პროკურატურა მაზარალებს მორალურადაც და ფინანსურადაც”.
ბიზნესმენ თამაზ ელიზბარაშვილს ბიძინა ივანიშვილთან შეხვედრა სურს, რათა პირადად უთხრას რომელი მაღალჩინისანი ცდილობს მისთვის წილის წართმევას.
“პრემიერი დაინტერესებულია ქვეყნის განვითარებით, არჩევნების შემდეგ მან თქვა, რომ თუ რომელიმე ბიზნესმენს ჩინოვნიკი ხელს შეუშლის ან წილში ჩაჯდომას მოსთხოვს, პირადად შევხვდები იმ ბიზნესმენსო. მე ვითხოვ ბატონ ბიძინასთან შეხვედრას, თორემ, ისე არაფერს აზრი არ აქვს, რაც არ უნდა ვწერო და პრესკონფერენციები გავმართო.”
ელიზბარაშვილის თქმით, მისი ბიზნესის მიმართ ინტერესი ქალაქის პროკურატურას სცდება და გაცილებით მაღლა მიდის. რეკეტიორი ჩინოვნიკის სახელს ის არავის უმხელს, რადგან მისი თქმით მხოლოდ ივანიშვილს ენდობა.
თამაზ ელიზბარაშვილის ბრალდებებზე პროკურატურას კომენტარი ამ დრომდე არ გაუკეთებია.
