როგორც მიხეილ სააკაშვილმა განაცხადა, დიცსა და დვანში მიმდინარე მოვლენები სუვერენიტეტზე, სახელმწიფოებრიობასა და მომავალზე შეტევაა. პრეზიდენტი მიიჩნევს, რომ შექმნილ ვითარებაში ხელისუფლების ყველა შტომ და საზოგადოებამ ერთად უნდა იმოქმედოს.
“კონსოლიდირებული პოზიცია გვინდა, ეს ვითარება ერთმანეთისთვის ნიშნის მოგებისთვის არ უნდა გამოვიყენოთ. საფრთხის წინაშე ვდგავართ. ჩვენი ძალა ერთობაშია. პოლიტიკის ახალი მიმართულება უნდა ჩამოვაყალიბოთ – საერთაშორისო თანამეგობრობასთან მწყობრი კოორდინაცია. რამდენი კაპიტულაციაც იქნება, მეტად გადაგივლიან, ჩაგქოლავენ. მტაცებლის თვისება არის ის, რომ რაც უფრო გარბიხარ, უფრო მეტად მოგდევს, რომ შეგჭამოს. რუსეთის მტაცებლური ინსტიქტები დღეს მრავალმხრივ ვლინდება. ერთი საერთო ფრონტი გახსნა პუტინმა და მას სჭირდება რამე განსაკუთრებულის გაკეთება, რომ თავი გადაირჩინოს”, _ განაცხადა სააკაშვილმა.
პრეზიდენტისვე განცხადებით, ბოლო კვირეებსა და თვეებში უფრო მეტი სახნავ-სათესი დავკარგეთ, ვიდრე იყო ქურთაში და თამარაშენში ერთად აღებული ისე, რომ მსოფლიოს საერთოდ არაფერი გაუგია.
“ერთი სროლის გარეშე დავკარგეთ ხალხნო მეტი სახნავ-სათესი, ვიდრე დიდი ომის და დიდი საერთაშორისო ფასის შედეგად, რომელიც რუსებმა გადაიხადეს. დღეს რა ფასი გადაიხადეს – ნული.
“ჩვენი მტერი რას გვეუბნება – ყველას გაეთიშეთ, ყველას გადაეკიდეთ. იქ აზერბაიჯანთან სასაზღვრო პრობლემები გაქვს, იქ სომხებთან სხვა პრობლემები გაქვთ, თურქეთი არაერთმორწმუნეა და პირიქით, უნდა გადაემტეროთ. იქ, რა გინდათ ევროპაში, მოდი ჩემთან. არ არსებობს არც ერთი კონკრეტული შემთხვევა, როცა რომელიმე მეზობელმა, ცალკე, იზოლირებულმა და სუსტმა დაალაგა რუსეთთან ურთიერთობა ისე, რომ რუსეთმა ის არ შეახრამუნა”, _ განაცხადა სააკაშვილმა.
საქართველოს პრეზიდენტმა გასული წლების მოვლენები გაიხსენა და აღნიშნა, რომ რუსეთის მიერ საქართველოში ორგანიზებული ტერაქტების სერია და ოკუპირებული ტერიტორიების აღიარების მუდმივი მცდელობა საერთაშორისო თანამეგობრობისა და აშშ-ის დახმარების შედეგად შეწყდა.
“ასე ხდება მაშინ, როცა იცი, რა გინდა და როცა არ გგონია, რომ რუსეთთან კუდის ქიცინით რამეს გააწყობ. რუსეთს ვერავინ მოატყუებს და სწორედ ამიტომ კონსოლიდირებული პოზიცია უნდა დაუპირისპირო”, _ აღნიშნა პრეზიდენტმა
